Acquist da bains immobigliars tras persunas a l'exteriur
Acquist da bains immobigliars / d'immobiglias
La lescha federala davart l'acquist da bains immobigliars tras persunas da l'exteriur (LAIE u usità "Lex Koller"), l'ordinaziun appartegnenta e la legislaziun introductiva chantunala reglan la correspundenza giuridica pertutgant proprietad funsila tras persunas residentas a l'exteriur. La lescha federala ha l'intent da restrenscher l'acquist da bains immobigliars per impedir ch'il funs indigen subeschia ina surpopulaziun estra, cunzunt pertutgant la proprietad d'abitar.
La legislaziun sin il champ da l'acquist da bains immobigliars tras persunas a l'exteriur cuntegna ina retscha da restricziuns per l'acquist da proprietad e da dretgs sumegliants a bains immobigliars tras persunas a l'exteriur, q.v.d. tras persunas che n'han betg il dretg da sa domiciliar en Svizra, ubain tras burgaisas e burgais dals stadis commembers da la UE/AECL che n'han betg lur domicil legal ed effectiv en Svizra.
Permissiuns
La lescha cuntegna disposiziuns pertutgant l'obligaziun da dumandar ina permissiun en connex cun l'acquist da bains immobigliars, la definiziun da persunas a l'exteriur sco er ils motivs per conceder e per refusar ina permissiun.
L'inspecturat dal register funsil e register da commerzi (IRFRC) è en il chantun Grischun l'autoritad da permissiun da la Lex Koller. Il IRFRC è cumpetent per conceder permissiuns e per relaschar disposiziuns da constataziun en connex cun las restricziuns da dretg public.
En spezial èn quai:
- permissiuns da vender proprietad d'abitar tras alienaders svizzers a persunas a l'exteriur
- permissiuns da vender proprietad d'abitar tras alienaders esters ad autras persunas estras
- permissiuns generalas en connex cun surbajegiadas cumplettas
- constataziuns davart l'obligaziun da dumandar ina permissiun da persunas giuridicas
- constataziuns davart il domicil da persunas natiralas
- constataziuns davart l'obligaziun da dumandar ina permissiun da lieus da manaschi
Abitaziuns da vacanzas
Ultra da quai administrescha il IRFRC ils contingents d'abitaziuns da vacanzas che vegnan attribuids mintga onn.