Il Grischun metta in segn cunter violenza a chasa e cunter violenza envers dunnas. Dals 25 da november fin ils 10 da december 2020 rendan il chantun e differentas organisaziuns attent cuminaivlamain a questas violaziuns dals dretgs umans en il mintgadi, e quai cun occurrenzas e cun acziuns. In'attenziun speziala dattan ils dis d'acziun quest onn als uffants ed als giuvenils che pateschan spezialmain da la violenza a chasa.

Avrir ils egls ed intermediar agid

Ils dis d'acziun cumenzan cun il Di internaziunal cunter violenza envers dunnas. Ils 25 da november 2020 vegnan illuminads cun glisch oranscha plirs edifizis en tut il chantun per render visiblas simbolicamain questas furmas da violenza. Cun il slogan «AVRA ILS EGLS!» duain la publicitad e persunas spezialisadas vegnir sensibilisadas da guardar nà, d'identifitgar indizis e d'intermediar agid. Ultra da quai vegni rendì attent a purschidas da cussegliaziun e da sustegn en il chantun Grischun per facilitar a persunas pertutgadas l'access a talas e per dar curaschi ad ellas da tschertgar agid e sustegn.

Tema central 2020

Uffants e giuvenils pateschan particularmain da violenza a chasa. Els na pon betg ir ord via a la violenza e n'èn savens betg en cas da tschertgar sezs agid. Il tema central da quest onn «Violenza a chasa – uffants e giuvenils entamez» metta il focus sin els. Violenza envers uffants e giuvenils ha savens lieu en il sistem da referenza famigliar. Là èn uffants e giuvenils pertutgads da differentas furmas da violenza. Latiers tutgan en spezial maltractaments corporals e psichics, abus sexual, negligientscha corporala ed emoziunala sco er l'experientscha da violenza tranter ils geniturs. Uffants e giuvenils che creschan si cun violenza a chasa èn exponids a grevezzas considerablas. Savens cun consequenzas gravantas per lur svilup individual e per lur avegnir.