La politica d'uffants e da giuvenils è in champ politic ed in champ d'incumbensas che dispona da basas giuridicas e ch'è caracterisà tras cumpetenzas multifaras sco er tras la repartiziun da las incumbensas tranter la Confederaziun, il chantun e las vischnancas. Il focus è drizzà sin ils secturs tematics «promoziun», «protecziun» e «participaziun». Quests trais secturs influenzeschan in l'auter. La finamira surordinada da la politica d'uffants e da giuvenils è quella da concepir las cundiziuns da viver dals uffants e giuvenils uschia, ch'els pon sviluppar optimalmain lur persunalitad.

Lescha chantunala d'uffants e da giuvenils

Il Departament d'economia publica e fatgs socials ha l'intenziun da stgaffir ina nova basa legala per la politica d'uffants e da giuvenils en il Grischun. A l'occurrenza publica «Dialog per l'avegnir – giuventetgna e lescha» ils 17 da matg 2025 a Glion han persunas giuvnas survegnì la pussaivladad da discutar cun auters giuvenils sco er cun represchentantas e represchentants da las vischnancas davart lur ideas per la nova lescha. Lur ideas e contribuziuns han ellas gia pudì inoltrar gia ordavant online. Plinavant han gì lieu en pliras regiuns lavuratoris preparatorics. Ins ha ramassà ils resultats e quels influenzeschan ussa la lavur suandanta vi da la lescha. Actualmain vegnan elavuradas las basas per la consultaziun.

Ulteriuras infurmaziuns: gr.ch/jugend

Fegl sgulant davart la campagna

Program «politicad'uffants e da giuvenils en il chantun Grischun»

Il program «Politica d'uffants e da giuvenils en il chantun Grischun» tenor l'art. 26 LPUG è terminà. Las finamiras impurtantas dal program èn stadas quellas da sclerir il basegn e da serrar largias da purschidas en ils trais champs d'acziun da la politica d'uffants e da giuvenils, numnadamain protecziun, promoziun e participaziun, sco er da garantir la coordinaziun tranter ils plauns statals. En il rom dal program èn tut en tut 17 mesiras vegnidas sviluppadas e realisadas. La realisaziun dallas mesiras sa basa sin in proceder interdepartamental.

Per concepir ina politica d'uffants e da giuvenils cumplessiva ha il Departament d'economia publica e fatgs socials l'intenziun da stgaffir sco proxim pass ina nova basa giuridica per la politica d'uffants e da giuvenils en il Grischun. Dapli davart questa tematica chattais Vus en la communicaziun a las medias «Realisaziun da la politica d'uffants e da giuvenils 2020–2022: Stadi intermediar e perspectiva» ubain en la newsletter «Actualitads da la politica d'uffants e da giuvenils GR 4».

Politica federala d'uffants e da giuvenils

Sin la plattafurma per politica d'uffants e da giuvenils Svizra chattais Vus infurmaziuns davart la politica d'uffants e da giuvenils federala, chantunala e communala.