Permissiun
L'admissiun d'uffants e da giuvenils dovra ina permissiun, sch'i vegnan tgirads durant il di u la notg il medem mument quatter u dapli uffants da la vegliadetgna prescolara u scolara. L'uffizi dal servetsch social è cumpetent per conceder la permissiun. Ultra da quai ha el la surveglianza.
L'uffizi dal servetsch social conceda resp. renovescha ina permissiun da manaschi, sch'ils purschiders observan las prescripziuns da las directivas da qualitad da l'uffizi dal servetsch social. Las directivas da qualitad cumpletteschan l'ordinaziun federala davart il plazzament d'uffants per la tgira e l'adopziun sco er la lescha davart ils uffants confidads dal chantun Grischun.
Canortas d'uffants
Tut las canortas d'uffants en il chantun Grischun dovran ina permissiun da manaschi da l'uffizi dal servetsch social.
Directivas da qualitad per canortas d'uffants pitschens / centers dal di per uffants en il chantun Grischun
Raster da permissiun da manaschi per canortas d'uffants pitschens / centers dal di per uffants en il chantun Grischun (mo per tudestg)
Persunas spezialisadas en il sectur da las canortas d'uffants
Perfecziunaments per la direcziun da canortas d'uffants
Attest dal medi per la direcziun da canortas d'uffants (mo per tudestg)
Uniuns da geniturs da di
Sch'ina uniun da geniturs da di assista ina u pliras grondas famiglias da di, dovra l'uniun da geniturs da di ina permissiun. Famiglias da di che tgiran il medem mument dapli che trais uffants da la vegliadetgna prescolara u scolara valan sco grondas famiglias da di.
Geniturs da di che n'èn betg associads ad in'uniun da geniturs da di
Tgi che tgira il medem mument durant il di u la notg cunter indemnisaziun maximalmain trais uffants sut 12 onns sto s'annunziar.
Annunzia per ina plazza da tgira durant il di (3 formulars)
Annunzia per ina plazza da tgira durant il di
Annunzia d`in uffant da di
Contract da tgira
Segirezza en chasa
Grondas famiglias da di che n'èn betg associadas ad in'uniun da geniturs da di
Geniturs da di che tgiran il medem mument dapli che trais uffants da la vegliadetgna prescolara u scolara valan sco grondas famiglias da di. Els dovran ina permissiun.
Directivas per grondas famiglias da di (mo per tudestg)
Dumonda da permissiun per grondas famiglias da di
Attest dal medi grondas famiglias da di
Gruppas da gieu
En gruppas da gieu n'ha betg lieu in'assistenza regulara. Perquai n'èn las gruppas da gieu betg suttamessas a l'obligaziun da permissiun u d'annunzia.
Finanziaziun
La finanziaziun da purschidas d'assistenza sa differenziescha en il chantun Grischun tut tenor purschida.
Canortas d'uffants ed uniuns da geniturs da di
En il chantun Grischun vegnan las canortas d'uffants sco er las uniuns da geniturs da di finanziadas tras contribuziuns dals geniturs, tras donaziuns sco er tras contribuziuns dal chantun e da las vischnancas. Las contribuziuns sa basan sin ina tariffa dals custs normads per unitad d'assistenza, che vegn fixada da la regenza dal chantun Grischun. Per tut las instituziuns ed uniuns da geniturs da di vala la medema tariffa dals custs normads. Las suandantas purschidas survegnan contribuziuns chantunalas e communalas.
- Purschidas da tgira per uffants da la vegliadetgna prescolara (p.ex. canortas d'uffants, uniuns da geniturs da di)
- Purschidas d'assistenza per uffants da scola durant las vacanzas da scola
Actualmain sustegnan il chantun e las vischnancas novas purschidas durant ils emprims 3 onns cun mintgamai 25 pertschient dals custs normads e purschidas existentas cun mintgamai 20 pertschient. Las premissas las pli impurtantas per survegnir contribuziuns èn:
- la purschida sto vegnir manada sin basa d'utilitad publica;
- la purschida sto correspunder a la planisaziun dal basegn da la vischnanca;
- in'assistenza suffizienta e qualifitgada sto vegnir garantida, e quai en localitads ch'èn adattadas per quai;
- las tariffas ston vegnir graduadas tenor la capacitad economica da las persunas cun la pussanza dals geniturs.
Dumonda per la renconuschientscha da la contribuziun (canortas d'uffants / uniuns da geniturs da di)
Finanziaziun: Annunzia posteriura da basegn (canortas d'uffants / uniuns da geniturs da di)
Agids finanzials da la confederaziun
La confederaziun sustegna instituziuns d'assistenza cun contribuziuns per installar, per extender la purschida sco er per coordinar l'assistenza en famiglias da di. Infurmaziuns pli detagliadas chattais Vus sin la pagina d'internet da l'uffizi federal d'assicuranzas socialas (UFAS).
Geniturs da di e grondas famiglias da di che n'èn betg associadas ad in'uniun da geniturs da di
Ils geniturs da di e las grondas famiglias da di, che n'èn betg associads ad in'uniun da geniturs da di, na survegnan betg contribuziuns sin basa da la lescha davart la promoziun da la tgira d'uffants cumplementara a la famiglia en il chantun Grischun. Las purschidas vegnan finanziadas tras las contribuziuns dals geniturs. Tant ils geniturs da di sco er las grondas famiglias da di ston observar las taxas maximalas che la regenza dal chantun Grischun ha fixà.
Gruppas da gieu
Las gruppas da gieu na survegnan betg contribuziuns sin basa da la lescha davart la promoziun da la tgira d'uffants cumplementara a la famiglia en il chantun Grischun. Las purschidas vegnan finanziadas tras donaziuns e tras contribuziuns dals geniturs.