Supplementarmain a la permissiun dovran purschidas da la tgira d'uffants cumplementara a la famiglia en il chantun Grischun ina renconuschientscha, per che las famiglias che fan diever da lur purschida, possian survegnir reducziuns dals custs da tgira. Las premissas las pli impurtantas per conceder la renconuschientscha èn l'observaziun da las prescripziuns chantunalas davart las tariffas e la correspundenza da la planisaziun da la purschida. Plinavant èn purschidas renconuschidas confessiunalmain neutralas e betg limitadas a tschertas gruppas.

Per la tgira da canortas d'uffants e d'organisaziuns da geniturs da di admessas extrachantunalas vegnan reducids ils custs. Ina purschida da tgira extrachantunala vegn admessa, sch'ella metta a disposiziun al chantun las infurmaziuns necessarias per exequir la lescha davart la promoziun da la tgira d'uffants cumplementara a la famiglia en il chantun Grischun e sche la purschida vegn permessa da l'autoritad cumpetenta dal chantun respectiv, è confessiunalmain neutrala e betg limitada a tschertas gruppas.

Concernent l'admissiun pon purschidas extrachantunalas contactar l'uffizi dal servetsch social sur la suandanta adressa:

Uffizi dal servetsch social dal Grischun
Reducziun da la tgira d'uffants cumplementara a la famiglia
Grabenstrasse 8
7001 Cuira
Tel. +41 81 257 53 96
quint@soa.gr.ch

En il chantun Grischun vegnan las canortas d'uffants finanziadas tras tariffas da las persunas responsablas per l'educaziun sco er tras donaziuns e tras contribuziuns da terzas varts. Il chantun conceda a las persunas responsablas per l'educaziun reducziuns dals custs per la tgira d'uffants. Las reducziuns dals custs vegnan pajadas directamain a las purschidas da tgira. Quellas mettan a quint a las famiglias la tariffa cumplaina minus la reducziun individuala. Il Cussegl grond fixescha en il preventiv il credit per finanziar las reducziuns dals custs. Il total da las reducziuns dals custs surpiglian mintgamai per la mesadad il chantun e las vischnancas. La cumpetenza da las vischnancas fixescha il domicil dals uffants tgirads. Per finanziar la tgira d'uffants cumplementara a la famiglia vegnan calculads custs normads. Ils custs normads sa basan sin la media dals custs da las purschidas renconuschidas ed economicas. La basa furman las calculaziuns dals custs controlladas dals 3 onns passads. Plinavant sustegna la confederaziun instituziuns da tgira cun contribuziuns per installar, per extender la purschida sco er per coordinar la tgira en famiglias da di. Infurmaziuns pli detagliadas èn cuntegnidas sin la pagina d'internet da l'uffizi d'assicuranzas socialas.

Per conceder las reducziuns dals custs è vegnida sviluppada la software quint. Tut ils process tranter l'Uffizi chantunal dal servetsch social e las purschidas da tgira vegnan liquidads sur quint. Quai cumpiglia l'annunzia dals uffants e las relaziuns da tgira concludidas, l'annunzia da las uras da tgira effectivas (datas d'utilisaziun) sco er il rendaquint da las reducziuns dals custs. Purschidas da tgira renconuschidas survegnan access a quint.

La KITAplus pussibilitescha da sa participar a la tgira d'uffants cumplementara a la famiglia ad uffants cun in impediment. Il chantun surpiglia ils custs supplementars che resultan pervia da l'impediment. Ils geniturs d'in uffant cun impediments pajan ils custs da tgira regulars. Per l'admissiun en la canortaplus èn decisivs il basegn da tgira pli grond en la canorta d'uffants pervia da l'impediment ed il basegn dal persunal da tgira per il coaching e per l'intermediaziun da savida tras ina persuna spezialisada. En la canorta d'uffants sezza na vegn purschida – en il rom dal KITAplus – ni dal persunal da tgira ni tras l'educaziun prescolara pedagogic-curativa ina promoziun speziala en il senn terapeutic. Anzi, la canorta porscha conturns favuraivels. En cas d'ina dumonda decida la canorta d'uffants, sch'ella ha la capacitad da recepir in uffant cun impediments. Per lescha n'exista nagina obligaziun d'admissiun.