En cas ch'i exista in suspect ch'il bainstar d'in uffant saja periclità, èsi per las persunas participadas savens ina gronda sfida da far in discurs cun ils geniturs. Sch'i vegnan tematisadas chaussas privatas u intrafamigliaras en in discurs e sch'ils geniturs vegnan dumandads davart eventuals deficits en lur cumportament d'educaziun, pon els resentir quai sco critica. Quai po provocar reacziuns defensivas sco ina ferma emoziunalitad ubain ch'els refusan cumplettamain la cooperaziun.

Princips

Ina buna preparaziun gida a reducir malsegirezzas ed ad elavurar soluziuns cuminaivlas. Agi cun respect, cun stima e cun chapientscha. Cussegliai e n'inculpai betg.

Preparaziun

Agi cun respect, cun stima e cun chapientscha. Cussegliai e n'inculpai betg.

Na manai betg il discurs en preschientscha da terzas persunas u d'uffants. Procurai per in'atmosfera agreabla, per exempel cun offrir bavrondas u cun dumandar da tscherner sez la plazza da seser. Fixai in spazi da temp fix (max. 1 ura). Infurmai ordavant las collegas ed ils collegas u las persunas superiuras davart il discurs, per il cas ch'i dess in'escalaziun.

Princips fundamentals da manar discurs

As exprimi en moda objectiva, curtaschaivla e chapibla.

• Duvrai messadis ord Vossa atgna perspectiva. Exempels: «Jau fatsch quitads per Voss uffant, perquai che....», «A mai èsi dà en egl, che...».
• Faschai dumondas avertas: «Tge pensais Vus, pertge...?»
• Tadlai en moda activa. Tegnai il contact cun Voss egls. Resumai sentiments, ponderaziuns u observaziuns en pleds u formulai ina constataziun cun auters pleds, per esser segira u segir d'avair chapì tut endretg.
• Renconuschai las prestaziuns dals geniturs: «I reussescha bain a Vus da...»
• Purschai agids simpels.

Las suandantas dumondas directivas gidan tar la preparaziun dal cuntegn

• Tge è mia responsabladad?
• Dovrel jau mezza u mez in discurs da cussegliaziun u in barat specific per reflectar?
• Tge finamira hai jau cun il discurs e tge tematisesch jau?
• Tge infurmaziuns ma mancan davart la situaziun famigliara?
• Tge resursas ha la famiglia?
• Enconusch jau purschidas d'agid adattadas?

Realisaziun

Cumenzai cun in discurs che fa ina punt (p.ex. davart l'aura). Laschai discurrer a fin la persuna visavi, reprendai tschertas ponderaziuns ed evitai giudicaments. Garanti confidenzialitad.

Numnai ils quitads e scleri las modas da vesair

• Numnai il motiv per il discurs: «Jau fatsch quitads, perquai che jau hai observà, che...»
• Dumandar la moda da vesair dals geniturs: «Co vesais Vus quai?»
• Elavurar las differenzas: «Hai jau chapì Vus endretg, che...?» ubain «Jau ves quai auter....»

Formulai finamiras cuminaivlas

• Stgaffir ina basa cuminaivla: «Vus vulais ch'i giaja bain cun Voss uffant. Quai è er mes giavisch.»
• Tematisar en moda objectiva in cumportament problematic: «Ils uffants pon esser pretensius, ed igl è impurtant da sa fatschentar cun lur basegns.»
• Encuraschar ils geniturs: «Tge manegiais Vus, tge pudess esser in bun proxim pass?»

Sondai las resursas ed il basegn da sustegn

• Dumondas: «Tge savais Vus far bain?», «Tge As ha gidà pli baud?»
• Porscher sustegn: «In bun post da consultaziun fiss ...», «Jau pudess m'imaginar che ... As pudess gidar.»

Tematisai las emoziuns ed empruvai da deescalar

• Numnar ils sentiments: «Vus As grittentais davart ...», «Vus avais tschiffà tema pervia da ...»
• Parafrasar: «Cun auters pleds ...», «Sche jau As chapesch endretg, vai per ...»
• Mussar pazienza e calma, er en situaziuns difficilas: «Jau chapesch, che Vus essas grit.»
• Sch'il discurs daventa fitg emoziunal, po quel er vegnir interrut: «Nus faschain ussa ina pausa e cuntinuain pli tard cun il discurs.»
• En cas da difficultads: Faschai ir la persuna visavi en moda curtaschaivla ord il local u giai eventualmain per sustegn (p.ex. persunas superiuras, en cas d'urgenza la polizia).

Terminai il discurs e faschai ina prospectiva

• Resumar il discurs: «Tge avain nus ussa fatg giu exactamain?», «Tgenin è il proxim pass?»
• Sclerir l'ulteriur barat ed eventualmain fixar in proxim termin.

Elavuraziun Posteriura

La documentaziun è la basa per ulteriurs discurs. Igl è impurtant da documentar ils resultats essenzials dal discurs, quai per metter en scrit en moda chapibla ils cuntegns, las cunvegnas e las decisiuns. Faschai cleras cunvegnas cun ils geniturs e nudai quellas eventualmain en scrit en in protocol dal discurs. Particularmain las cunvegnas, ils proxims pass e las modas da vesair divergentas duessas Vus nudar en scrit.

Reflectai adina en moda critica Vossas atgnas valitaziuns. I capita savens, che l'emprima impressiun ch'ins ha d'ina famiglia, na vegn betg pli messa en dumonda.

Dapli en chaussa chattais Vus en ils dus suandants documents (mo per tudesg):

• Elterngespräch bei Verdacht auf Kindeswohlgefährdung (Anhang 12 des Handlungsleitfadens «Kindeswohlgefährdung» des Kantons Schaffhausen)
• Gesprächsleitfaden - Das Führen von Elterngesprächen in vermuteten kindeswohlgefährdenden Situationen (Region Neubrandenburg)