2025
20-08-2025 – Vinavant blers novs cas per l'Agid a victimas dal Grischun
Er l'onn 2024 èn bleras persunas sa drizzadas per l'emprima giada a l'Agid a victimas dal Grischun: Tut en tut han 501 novas persunas tschertgà sustegn – quasi uschè bleras sco l'onn 2023 (508). Il dumber total da cas che han fatg diever d'ina cussegliaziun è sa reducì levamain en cumparegliaziun cun l'onn precedent. Ulteriuras infurmaziuns survegnis Vus en la communicaziun a las medias.
14-08-2025 – La Regenza ha dà glisch verda per in nov post da contact e da consultaziun per persunas dependentas a Cuira
La Regenza ha approvà la realisaziun dal nov post da contact e da consultaziun al Seilerbahnweg 7 a Cuira. L'uniun Agid da survivenza dal Grischun (UHG) vegn incumbensada cun la realisaziun operativa e cun il manaschi. Il nov post da contact e da consultaziun (C+C) duai esser avert durant 365dis da las 11.00 fin las 19.00 e render accessiblas en moda simpla e nunbirocratica purschidas d'agid a persunas dependentas. La purschida da basa cumpiglia pussaivladads da sa trategnair e da sa retrair, ina cuschina per persunas senza tetg, cussegliaziun ed intermediaziun, provediment medicinal da basa, la consegna e la dismessa da meds auxiliars da consum, ina bursa da jobs, pussaivladads da tgirar il corp e da lavar la vestgadira sco er in'adressa postala ed in deposit da bagascha per persunas senza abitaziun. Tar la communicaziun da la Regenza.
07-05-2025 – Il chantun Grischun sensibilisescha per il tema violenza a chasa cunter persunas cun impediments
Il chantun Grischun metta er l'onn 2025 in cler signal cunter la violenza a chasa. A chaschun dals dis d'acziun dals 25 da november fin ils 10 da december 2025 vegn la publicitad sensibilisada davart il tema e rendida attenta a las purschidas d'agid. Il focus da quest onn è la violenza cunter persunas cun impediments. Il chantun appellescha la populaziun, organisaziuns ed instituziuns da participar e sustegna finanzialmain occurrenzas u acziuns. Ulteriuras infurmaziuns survegnis Vus en la communicaziun a las medias.
07-05-2025 – La tgira d'uffants cumplementara a la famiglia vegn pli favuraivla a partir da la stad 2025
Il chantun Grischun metta in accent per cundiziuns favuraivlas a las famiglias: A partir dal 1. d'avust 2025 survegnan las famiglias dapli sustegn per la tgira d'uffants. A partir da questa data metta la Regenza en vigur la revisiun totala da la Lescha davart la promoziun da la tgira d'uffants cumplementara a la famiglia en il chantun Grischun (LTGU). Ina midada da sistem tar la finanziaziun garantescha il tractament egual da las famiglias en l'entir chantun. In calculatur online procura per transparenza davart las reducziuns. Tar la communicaziun a las medias.
22-04-2025 – Il Grischun lantscha in dialog per la nova lescha davart uffants e giuvenils
A l'occurrenza publica «Dialog per l'avegnir – giuventetgna e lescha» ils 17 da matg a Glion survegnan giuvnas e giuvens la pussaivladad da discutar lur ideas cun autras persunas giuvnas sco er cun represchentantas e represchentants da las vischnancas e da las scolas. Lur ideas e lur contribuziuns pon ellas ed els inoltrar gia ordavant online sut gr.ch/jugend. Ultra da quai han lieu en pliras regiuns lavuratoris preparatorics. Ulteriuras infurmaziuns per giuvenils / annunzia per scolas e vischnancas.
09-04-2025 – La quota d'agid social sa reducescha per la segunda giada en fila
L'onn 2023 han 2187 Grischunas e Grischuns retratg almain ina giada agid social economic. Quai èn 141 persunas damain che l'onn 2022. La quota d'agid social sa sbassa cun quai ad 1,1 pertschient ed è vinavant sut la media naziunala da 2,8 pertschient. Tar la communicaziun a las medias.
06-02-2025 – Il Grischun rinforza la diagnosa tempriva en la protecziun d'uffants
La stad 2025 lantscha il chantun in project da pilot da 4 onns sut il titel «Post spezialisà e da coordinaziun per la protecziun d'uffants». A persunas dal fatg e da referiment porscha quest post da consultaziun ina cussegliaziun anonima, svelta e gratuita, en cas ch'il bainstar dals uffants pudess esser periclità. La finamira è quella da reducir malsegirezzas, da mussar pussaivladads d'agir concretas e d'involver – en cas da basegn – persunas spezialisadas dal sectur da la protecziun d'uffants. Ulteriuras infurmaziuns survegnis Vus en la communicaziun a las medias.
06-02-2025 – La Regenza ha mess en vigur las revisiuns parzialas da la Lescha davart il sustegn da persunas basegnusas
La Regenza ha mess en vigur retroactivamain per il 1. da schaner 2025 las revisiuns parzialas da la Lescha davart il sustegn da persunas basegnusas concernent las Svizras ed ils Svizzers cun ina moda da viver nomada sco er concernent la restituziun da prestaziuns da sustegn tenor il dretg d'agid social. Il Cussegl grond aveva concludì questas duas revisiuns parzialas en la sessiun d'october 2024. Il termin da referendum per ils dus relaschs è scadì ils 28 da schaner 2025. Entaifer quest termin n'èn vegnids inoltrads nagins referendums.
Per Svizras e Svizzers cun moda da viver nomada duai star a disposiziun ina purschida suffizienta da plazzas da transit e da staziunament. Cun la segunda revisiun parziala concernent la restituziun vegnan stgaffidas reglas unitaras e cleras davart l'obligaziun da restituziun sco er las excepziuns latiers, per exempel per persunas giuvnas creschidas durant in'emprima scolaziun.
2024
13-11-2024 – Dis d'acziun cunter violenza a chasa 2024 – «vias or da la violenza»
Mintgin da nus po esser pertutgà da violenza a chasa. Per sustegnair las persunas ch'èn pertutgadas da violenza sin lur via en ina vita senza violenza èsi impurtant, che las purschidas d'agid e da sustegn sajan enconuschentas ad ina vasta publicitad. Il tema central dals «Dis d'acziun cunter violenza a chasa» da quest onn en il Grischun è perquai «vias or da la violenza». Dals 25 da november fin ils 10 da december 2024 han lieu numerusas occurrenzas ed acziuns en l'entir chantun. Tar la communicaziun a las medias.
26-08-2024 – L'Agid a victimas dal Grischun ha danovamain fatg dapli cussegliaziuns
L'onn 2023 ha l'Agid a victimas dal Grischun cusseglià tut en tut 869 victimas da violenza. Il dumber da cussegliaziuns è s'augmentà er durant l'onn 2023. Quest svilup correspunda al trend naziunal. Ulteriuras infurmaziuns survegnis Vus en la communicaziun a las medias.
05-06-2024 – La quota d'agid social sa sbassa vinavant
L'onn 2022 han 2328 Grischunas e Grischuns retratg almain ina giada agid social economic. Quai èn 210 persunas damain che l'onn 2021. La quota d'agid social sa sbassa cun quai ad 1,2 pertschient e sa chatta vinavant sut la media naziunala da 2,9 pertschient. Tar la communicaziun a las medias.
02-05-2024 – La Regenza ha surdà ina incarica da prestaziun per stgaffir spazi d'abitar per persunas cun basegn da sustegn
La Regenza ha approvà da surdar fin ils 31 da december 2025 ina incarica da prestaziun a l'uniun Oase per il project da pilot «Housing First». Durant la fasa da pilot dal project metta l'uniun Oase a disposiziun a partir da l'avust 2024 ina purschida da basa per tschintg persunas. La contribuziun chantunala munta a maximalmain 198 300 francs. Tar la communicaziun da la Regenza.
03-04-2024 – «Vias or da la violenza» en il focus dals Dis d'acziun cunter violenza a chasa
Dals 25 da november fin ils 10 da december 2024 metta il Grischun puspè in signal cunter la violenza a chasa. Ils dis d'acziun da quest onn mettan il focus sin il tema «Vias or da la violenza». Il chantun appellescha la populaziun, organisaziuns ed instituziuns da participar e po sustegnair finanzialmain occurrenzas u acziuns. Tar la communicaziun a las medias.
23-01-2024 – La Regenza rinforza ils dretgs da las persunas cun impediments
La Regenza stgaffescha in post spezialisà e da coordinaziun per l'egualitad e per ils dretgs da las persunas cun impediments. Cun coordinar e cun accumpagnar differentas activitads entaifer ed ordaifer l'administraziun chantunala sco er cun sensibilisar la societad per ils giavischs da las persunas cun impediments rinforza quest post ils dretgs da las persunas cun impediments. Ulteriuras infurmaziuns survegnis Vus qua u en la communicaziun a las medias.
03-01-2024 – Dis d'acziun per ils dretgs da las persunas cun impediments 2024
Dals 15 da matg fin ils 15 da zercladur 2024 han lieu en l'entira Svizra ils dis d'acziun 2024. Ils motivs èn il giubileum da 10 onns da la CRPD da la ONU (Convenziun davart ils dretgs dals umans cun impediments) ed il giubileum da 20 onns da la LImp (Lescha federala davart l'eliminaziun dals dischavantatgs envers persunas cun impediments).
Infurmaziuns per partenarias e per partenaris d'acziun u per occurrenzas chattais Vus sin Futur-Inclusiun Grischun.
2023
20-12-2023 – La Regenza ha decidì da sviluppar vinavant l'organisaziun da l'agid social
Il «Model grischun» per organisar e finanziar il sistem da l'agid social ha success. A questa conclusiun vegn in studi che la Scola auta spezialisada da la Svizra Orientala (OST) ha fatg per incumbensa dal chantun. Il studi recumonda tschertas adattaziuns per rinforzar la collavuraziun tranter il chantun e las vischnancas. Sin basa da quai ha la Regenza concludì da sviluppar vinavant l'organisaziun da l'agid social. Ulteriuras infurmaziuns chattais Vus qua.
19-12-2023 – La Regenza ha deliberà la Strategia chantunala Dependenzas
La Regenza ha deliberà ina strategia chantunala davart il tema da dependenzas. En l'avegnir coordineschan ils posts da servetsch pertutgads pli fitg lur activitads, quai davent da la prevenziun fin a l'execuziun da chastis. Ulteriuras infurmaziuns survegnis Vus qua.
07-12-2023 – La Regenza ha lantschà duas consultaziuns tar la revisiun parziala da la Lescha davart il sustegn da persunas basegnusas
La Regenza ha deliberà ils sbozs per duas revisiuns parzialas da la Lescha davart il sustegn da persunas basegnusas. Ina da las revisiuns tracta la repartiziun dals eventuals custs da l'agid social da Svizras e Svizzers cun moda da viver nomada che utiliseschan ina plazza da staziunament en ina vischnanca dal chantun. En connex cun l'autra revisiun duain las regulaziuns davart la restituziun da las prestaziuns d'agid social vegnir surlavuradas. Ulteriuras infurmaziuns survegnis Vus en la communicaziun a las medias.
15-11-2023 – La violenza a chasa na cumenza betg pir cun in egl blau
Bleras giadas cumenza la violenza a chasa en moda subtila e zuppada. Il tema central dals «Dis d'acziun cunter violenza a chasa» da quest onn en il Grischun è perquai la violenza psichica. Dals 25 da november fin ils 10 da december 2023 èn planisadas numerusas occurrenzas ed acziuns en l'entir chantun. Tar la communicaziun a las medias.
Ulteriuras infurmaziuns survegnis Vus qua.
09-08-2023 – Ina quota d'agid social stabila er durant il segund onn da la pandemia da corona
L'onn 2021 han 2538 Grischunas e Grischuns retratg almain ina giada agid social economic. Quai èn 50 persunas damain che l'onn 2020. Cun 1,3 pertschient resta la quota d'agid social stabila e sa chatta vinavant sut la media naziunala da 3,1 pertschient. Ulteriuras infurmaziuns survegnis Vus qua.
27-02-2023 – Forensic Nursing – nova purschida per victimas da violenza
Il Grischun porscha a partir d'immediat a tut las victimas da violenza ina «Ura da consultaziun Forensic Nursing». Uschia duain persunas pertutgadas da violenza survegnir in instrument per pudair cumprovar meglier avant dretgira e tar autras autoritads ch'ellas èn stadas victimas da violenza. En la Svizra tudestga è la purschida a l'Ospital chantunal dal Grischun a Cuira l'emprima da quest gener. Ella vegn finanziada dal chantun Grischun sur ina incarica da prestaziun da 4 onns. Ulteriuras infurmaziuns survegnis Vus qua u en la communicaziun a las medias.
2022
21-11-2022 – Dis d'acziun cunter violenza a chasa 2022 cun il focus sin «femicidi»
Dals 25 da november fin ils 10 da december 2022 han lieu en il Grischun ils dis d'acziun annuals cunter violenza a chasa. Il tema central da quest onn è «femicidi». Planisadas èn numerusas occurrenzas ed acziuns variadas en l'entir chantun – da l'acziun da stans cun punsch d'oranschas sur l'illuminaziun d'edifizis fin a l'installaziun sin la plazza dal teater a Cuira. Tar la communicaziun a las medias.
Savair dapli20-09-2022 – La Regenza vul rinforzar la cumpatibilitad da la famiglia cun l'activitad da gudogn
Cun la revisiun da la Lescha davart la promoziun da la tgira d'uffants cumplementara a la famiglia en il chantun Grischun (LTGU) vul la Regenza rinforzar la cumpatibilitad da la famiglia cun l'activitad da gudogn sco er promover il svilup dals uffants. Per quest intent duai la finanziaziun da la tgira d'uffants cumplementara a la famiglia vegnir reglada da nov. Ultra da quai duai vegnir realisada ina midada da sistem, davent da la finanziaziun da l'object a la promoziun orientada al subject. Ulteriuras infurmaziuns survegnis Vus qua u en la communicaziun a las medias.
12-07-2022 – La quota d'agid social en il chantun Grischun è restada stabila durant l'emprim onn da la pandemia da COVID
L'onn 2020 han 2588 Grischunas e Grischuns retratg almain ina giada agid social economic. Quai èn 59 persunas dapli che l'onn 2019. Cun 1,3 pertschient resta la quota d'agid social dentant stabila, ed ella sa chatta cleramain sut la media naziunala da 3,2 pertschient. Ulteriuras infurmaziuns survegnis Vus qua.
05-04-2022 – Nus midain chasa!
A partir dals 7 d'avrigl 2022 mida chasa il Servetsch social regiunal da Cuira/Plessur/Imboden da la Loëstrasse 14/16 da nov a la Grabenstrasse 8.
A partir dals 12 d'avrigl 2022 n'è la direcziun da l'Uffizi dal servetsch social chantunal dal Grischun betg pli a la Loëstrasse 32, mabain da nov a la Grabenstrasse 8.
Il Servetsch social per dumondas da dependenza, il Post spezialisà per uffants confidads ed adopziuns ed il Servetsch social regiunal da Cuira/Plessur/Imboden, ch'èn situà a la Loëstrasse 37, èn a partir dals 20 d'avrigl 2022 medemamain a la Grabenstrasse 8.
20-01-2022 – La Regenza ha approvà l'incumbensa da prestaziun «Streetwork Cuira» ed extenda uschia la purschida per persunas pertutgadas da dependenza en il chantun Grischun
La Regenza ha approvà l'incumbensa da prestaziun «Streetwork Cuira» 2022 fin 2025 ed ha mess en vigur quella retroactivamain per il 1. da schaner 2022. Uschia extenda la Regenza la collavuraziun existenta cun l'Uniun per l'agid da survivenza dal Grischun. Cun questa incumbensa da prestaziun supplementara cumplettescha il chantun Grischun sia purschida multifara en il sectur da l'agid per persunas dependentas.
La cuntinuaziun da la lavur sociala extra muros a Cuira fa part da la purschida meglierada che la Regenza ha decidì en il sectur da l'agid per persunas dependentas. Durant la sessiun da december 2021 ha il Cussegl grond approvà ils meds finanzials correspundents en il preventiv.
18-01-2022 – Realisaziun da la politica d'uffants e da giuvenils 2020–2022: Stadi intermediar e perspectiva
L'installaziun e l'ulteriur svilup da la politica chantunala d'uffants e da giuvenils èn sin fitg buna via. Cun rinforzar la politica chantunala d'uffants e da giuvenils vul la Regenza stgaffir cundiziuns da viver attractivas per famiglias, per uffants e per giuvenils. Gia èn dus terzs da la durada dal program absolvids. En la realisaziun sa mussi ch'igl exista in basegn d'agir sin plaun da la legislaziun. Ulteriuras infurmaziuns survegnis Vus qua.
2021
23-11-2021 – Dis d’acziun «AVRA ILS EGLS! - Cuminaivlamain cunter violenza a chasa»
Il Grischun metta in accent cunter la violenza a chasa. Dals 25 da november fin ils 10 da december 2021 realisescha il chantun – ensemen cun differentas organisaziuns – occurrenzas ed acziuns per render attent a questas violaziuns quotidianas dals dretgs umans. Ulteriuras infurmaziuns survegnis Vus qua.
25-08-2021 – Revisiun totala da la Lescha davart la promoziun da la tgira d'uffants cumplementara a la famiglia en il chantun Grischun
La Regenza dat en consultaziun il sboz da la revisiun totala da la Lescha davart la promoziun da la tgira d'uffants cumplementara a la famiglia en il chantun Grischun (DG 548.300). Tras la proposta qua avant maun duai vegnir reglada da nov la finanziaziun da la tgira d'uffants cumplementara a la famiglia en la vegliadetgna prescolara. En il center da la proposta stat la midada da la finanziaziun da l'object vi a la promoziun sin basa da la finanziaziun dal subject. Ulteriuras infurmaziuns chattais Vus en la communicaziun a las medias ni sin la pagina da web dil chantun Grischun davart las consultaziuns currentas.
03-08-2021 – «AVRA ILS EGLS!» - dis d'acziun cunter violenza a chasa 2021
Dals 25 da november fin ils 10 da december 2021 metta il Grischun in signal cunter la violenza a chasa. Ils dis d'acziun da quest onn mettan il focus sin il tema «violenza sexuala». Il chantun po sustegnair finanzialmain organisaziuns participantas che organiseschan in'occurrenza u in'acziun.
07-07-2021 – La Regenza ha concludì d'extender las purschidas d'agid per persunas dependentas
La Regenza ha concludì ina meglieraziun successiva da las purschidas da l'agid simpel per persunas dependentas. La lavur sin via duai vegnir cuntinuada e cumplettada tras in post da contact e da consultaziun nov e pli grond en in lieu central. Ultra da quai vegn il focus mess sin la meglieraziun da las purschidas da l'abitar assistì. Per realisar questas mesiras ha la Regenza dumandà il Cussegl grond ulteriurs meds da 400 000 francs per il preventiv 2022.Ulteriuras infurmaziuns survegnis Vus qua.
06-04-2021 – Il chantun examinescha la purschida per persunas pertutgadas da dependenza
Il chantun Grischun dispona d'ina vasta purschida d'agid per persunas dependentas. Quai è il resultat d'in rapport che Infodrog, il Center naziunal da coordinaziun per dumondas da dependenza, ha elavurà per incumbensa da la Regenza. En il rapport èn dentant er vegnidas constatadas purschidas mancantas. Perquai examinescha la Regenza la purschida per persunas pertutgadas da dependenza en il chantun.Ulteriuras infurmaziuns survegnis Vus qua.
2020
23-11-2020 – «AVRA ILS EGLS!» - Dis d'acziun cuminaivels cunter violenza 2020
Il Grischun metta in segn cunter violenza a chasa. Dals 25 da november fin ils 10 da december 2020 rendan il chantun e differentas organisaziuns attent cuminaivlamain a questas violaziuns dals dretgs umans en il mintgadi, e quai cun occurrenzas e cun acziuns. In'attenziun speziala dattan ils dis d'acziun quest onn als uffants ed als giuvenils che pateschan spezialmain da la violenza a chasa. Ulteriuras infurmaziuns survegnis Vus qua.
29-09-2020 – Nov med d'instrucziun «Agid u sforz? - Mesiras repressivas per motivs da provediment en il chantun Grischun»
En il rom da l'elavuraziun istorica da las mesiras repressivas per motivs da provediment cumpara in nov med d'instrucziun en tut las trais linguas chantunalas. Il carnet da leger «Agid u sforz?» ed il material accumpagnant appartegnent duain pussibilitar da tematisar en l'instrucziun en scola quest chapitel difficil da l'istorgia grischuna. Ils documents pon vegnir retratgs tar la Chasa editura per meds d'instrucziun.
24-08-2020 – Agid social - uffants e giuvenils pertutgads spezialmain
L'onn 2018 han 2674 Grischunas e Grischuns retratg almain ina giada agid social economic. Quai èn circa tantas persunas sco l'onn avant. Uschia è er la quota d'agid social restada constanta tar 1,4 pertschient. Stabil è er stà il dumber d'uffants e da giuvenils che retiran agid social: quasi mintga terza persuna che retira agid social ha main che 18 onns. Ulteriuras infurmaziuns survegnis Vus qua.
22 d'avust 2020 - 29 d'avust 2021 – Exposiziun speziala «Emblidads da la ventira. Mesiras repressivas per motivs da provediment en il Grischun»
Il Museum retic mussa l'exposiziun speziala «Emblidads da la ventira. Mesiras repressivas per motivs da provediment en il Grischun» en il rom da l'elavuraziun istorica da las mesiras repressivas per motivs da provediment. L'exposiziun metta il focus sin tschintg persunas pertutgadas ch'èn naschidas tranter ils onns 1881 e 1957. Gieus auditivs e documents d'archiv raquintan lur destins.
13-08-2020 – Nus midain chasa!
A partir dals 18 da settember 2020 n'è la direcziun da l'Uffizi dal servetsch social chantunal dal Grischun betg pli a la Gürtelstrasse 89, mabain da nov a la Loëstrasse 32.
A partir dals 22 d'october 2020 mida chasa er il Servetsch social regiunal da Cuira/Plessur/Imboden da la Rohanstrasse 5 da nov a la Loëstrasse 14/16.
09-04-2020 – Agid e sustegn en cas da violenza en la lètg, en il partenadi ed en la famiglia
La situaziun actuala cun mesiras cunter la derasaziun dal coronavirus po chaschunar conflicts e provocar violenza en relaziuns ed en famiglias. Las persunas pertutgadas n'èn betg sulettas. Violenza a chasa è scumandada e n'è betg ina chaussa privata. En il Grischun porschan differents posts agid, protecziun e cussegliaziun. «AVRA ILS EGLS!», «HAJAS CURASCHI!»: las purschidas da cussegliaziun e da sustegn stattan a disposiziun er vinavant a persunas pertutgadas. Ulteriuras infurmaziuns survegnis Vus qua.