Il chantun Grischun metta er l'onn 2025 in cler signal cunter la violenza a chasa. A chaschun dals dis d'acziun dals 25 da november fin ils 10 da december 2025 vegn la publicitad sensibilisada davart il tema e rendida attenta a las purschidas d'agid. Il focus da quest onn è la violenza cunter persunas cun impediments. Il chantun appellescha la populaziun, organisaziuns ed instituziuns da participar e sustegna finanzialmain occurrenzas u acziuns.
Violenza a chasa n'enconuscha nagins cunfins geografics, culturals u socials. Ella exista en differentas furmas – corporala, sexuala, psichica ed economica – e pertutga persunas entaifer la famiglia u exista tranter partenarias e partenaris (anteriurs). Er la violenza en furmas d'abitar assistidas sco instituziuns da tgira u gruppas d'abitar fa part da la violenza a chasa, cun quai che las persunas pertutgadas vivan en in ambient social dependent e savens stretg. Violenza a chasa n'è betg ina chaussa privata – ella è chastiabla e na vegn betg tolerada en nossa societad.
Ristga pli gronda per persunas cun impediments
Tenor l'Uffizi federal da statistica vivan en Svizra tut en tut circa 1,9 milliuns persunas cun impediments. Ellas han ina ristga pli gronda da daventar victimas da violenza. Quai è cunzunt lura il cas, sch'ellas dovran sustegn en il mintgadi u sche lur abilitads da communitgar e da proteger sasezzas èn reducidas. Periclitadas èn spezialmain dunnas e mattas cun impediments.
Sensibilisar, gidar, agir
Bleras victimas taschan per tema u per vargugna. Er tgi che suppona u observa violenza a chasa sa senta bleras giadas pers. Ils Dis d'acziun porschan ina plattafurma per sensibilisar e per discutar avertamain. En il chantun Grischun datti numerusas purschidas d'agid per persunas pertutgadas e per confamigliars. Questas purschidas duain vegnir rendidas enconuschentas. Ulteriuras infurmaziuns èn disponiblas sut las purschidas d'agid e sin www.findhelp.gr.ch.
Il chantun coordinescha e sustegna finanzialmain
Ils Dis d'acziun cunter violenza a chasa vegnan accordads cun la campagna «16 dis cunter violenza envers dunnas» e cun ils «Orange Days». En il Grischun è il Post da coordinaziun Violenza a chasa responsabel per l'organisaziun. Il chantun sustegna finanzialmain las occurrenzas ed acziuns davart il tema violenza a chasa sco er spezialmain davart il tema central «violenza cunter persunas cun impediments». Ultra da quai fa el attent a las occurrenzas e metta a disposiziun material da campagna als organisaturs.
Exposiziun ambulanta davart violenza a chasa 2025
Dals 4 fin ils 26 da november 2025 vegn preschentada l'exposiziun ambulanta «Bainvegni a chasa – In'exposiziun davart violenza en famiglia ed en il partenadi» a la Scola auta da pedagogia dal Grischun. Durant quest temp è ella averta per la publicitad ils lavurdis da las 8.00 fin las 12.00 e da las 13.00 fin las 17.00.
Per classas da scola vegnan purschidas visitas guidadas cun persunas spezialisadas. L'exposiziun sa drizza a scolaras ed a scolars a partir da 15 u 16 onns. Ella sensibilisescha per il tema da la violenza a chasa, infurmescha davart impurtantas purschidas d’agid chantunalas ed animescha da reflectar cun agid d'elements interactivs.
Impressiuns da l'exposiziun ambulanta pon vegnir consultadas sut il suandant link.
Persunas d'instrucziun che vulan sa participar cun lur classa da scola ad ina visita guidada, pon s'annunziar per e-mail u per telefon: haeusliche.gewalt@soa.gr.ch / 081 257 26 11. Per dumondas concretas davart la visita guidada u davart ulteriur material da scola stat a disposiziun il Post da cussegliaziun per l'agid a victimas: opferhilfe@soa.gr.ch / 081 257 31 50.
Participaziun als dis d'acziun cunter violenza a chasa
annunziar in'occurrenza
Il chantun po sustegnair finanzialmain occurrenzas ed acziuns concernent il tema da la violenza a chasa en general sco er concernent il tema central «violenza cunter persunas cun impediments» che han lieu durant ils dis d'acziun en il Grischun.
inoltrar ina dumonda per sustegn finanzial
Annunzias e dumondas correspundentas ston vegnir inoltradas fin ils 13 d'avust 2025.
Resumà en lingua facila
Violenza a chasa cunter persunas cun impediments
Violenza a chasa è in dachasa violent.
Quai po capitar en mintga dachasa.
Las persunas cun impediments subeschan dapli violenza a chasa che autras persunas.
Nossa societad na tolerescha nagina violenza.
Ins po clamar la polizia.
Violenza po vegnir chastiada.
Has ti gia experimentà violenza?
Vuls ti discurrer cun insatgi da quai?
Ti chattas agid sin www.violenza-a-chasa.gr.ch u www.findhelp.gr.ch.
Emprim inscunter en matg davart il tema violenza
I dat in inscunter davart il tema violenza.
Cura?
Ils 21 da matg 2025 da las 16.30 fin las 18.30.
Nua?
En la ibW Scola spezialisada superiura da la Svizra Sidorientala.
Il chantun organisescha quai.
Persunas spezialisadas ed organisaziuns èn da la partida.
Là datti referats e discussiuns.
Er ti pos vegnir e tadlar e ta participar a la discussiun.
T'annunzia per e-mail u per telefon.
Il e-mail è: madlaina.baselgia@soa.gr.ch
Il numer da telefon è: 081 257 26 11.
Has ti basegn d'agid per l'inscunter?
Communitgescha quai tar l'annunzia.
Has ti dumondas davart l'inscunter?
Communitgescha quai tar l'annunzia.
T'annunzia fin ils 15 da matg 2025.
Dis d'acziun il november ed il december
Violenza a chasa cunter persunas cun impediments è adina in tema.
I dat dis d'acziun davart il tema.
Cura?
Dals 25 da november fin ils 10 da december 2025.
Nua?
En l'entir Grischun.
Organisaziuns e persunas pon far in'acziun cunter violenza.
In'acziun è in'occurrenza.
Il chantun infurmescha tuts davart questas occurrenzas.
Has ti ina idea per in'occurrenza?
Ans scriva tia idea fin ils 13 d'avust 2025.
Ans scriva qua.
Il chantun ta gida cun material e cun daners.
Ulteriuras informaziuns
Ulteriuras infurmaziuns davart ils dis d'acziun cunter violenza a chasa chattais Vus en il fegl d'infurmaziun . Per dumondas stat a disposiziun il Post da coordinaziun Violenza a chasa.
Eco da medias
2024
- RTR, 25-11-2024 (03:50): «Vias or da la violenza»
- Südostschweiz, 25-11-2024: Graubünden in Orange: Eine Kampagne gegen häusliche Gewalt
- Südostschweiz, 22-11-2024 (02:45): Häusliche Gewalt: Immer mehr Menschen getrauen sich, Hilfe zu holen
- SRF 1, 27-11-2024 (07:37): Madlaina Baselgia, Leterin Koordinationsstelle Häusliche Gewalt, Der Kanton Graubünden sucht nach neuen Wegen aus der Gewalt in der Partnerschaft
- Südostschweiz, 14-12-2024: «Zwei Frauen setzen ein Zeichen gegen häusliche Gewalt»
- Südostschweiz, 15-12-2024: «Wo Gewaltverletzungen korrekt dokumentiert werden»
- RTR, 17-12-2024 (6:00): «Chantar per la pasch»
2023
«Toxic Love»
Il Grischun ha plinavant inizià la campagna da sensibilisaziun interchantunala «Toxic Love» che ha la finamira d'identifitgar a temp la violenza a chasa. A persunas pertutgadas ed a persunas participadas, dentant er a terzas persunas betg participadas duai vegnir gidà a percorscher ils signals d'avertiment e da dumandar agid a temp.
Website «Toxic Love»
Dis d'acziun sin l'entir mund
Dals 25 da november, il Di internaziunal cunter la violenza envers dunnas, fin ils 10 da december, il Di dals dretgs umans, sa preschentan mintga onn differentas organisaziuns a la publicitad per sensibilisar per la tematica e per s'engaschar a favur d'ina societad senza violenza.
En il Grischun han lieu mintga onn «Dis d'acziun cunter violenza a chasa». Il chantun coordinescha e sustegna las occurrenzas e las acziuns regiunalas che mettan en il focus mintga onn ina furma da la violenza a chasa.
Ils «Dis d'acziun cunter violenza a chasa» en il Grischun èn inspirads da las iniziativas dals dus moviments internaziunals «Orange-Days» e «16 dis cunter la violenza envers dunnas». L'illuminaziun oranscha dals edifizis, ch'è visibla durant quests 16 dis sin l'entir mund, metta simbolicamain in signal cunter violenza.