La Punt/Rehanau, punt sur il Rain. Fotografia TMG 2015
Incumbensas da la cussegliaziun da construcziun da la tgira da monuments La cussegliaziun da construcziun da la tgira da monuments ha l'incumbensa da cussegliar las proprietarias ed ils proprietaris d'edifizis e da stabiliments istorics da valur en dumondas dal mantegniment e da la tgira da la substanza. En quest connex na vegn betg mo resguardada la substanza architectonica oriunda, mabain vegnan er considerads e valitads ils differents fastizs da la midada en il decurs dal temp.
La cussegliaziun da construcziun da la tgira da monuments na sa restrenscha betg mo a restauraziuns che schanegian la substanza. Sch'ins tracta la substanza architectonica istorica cun respect, po quai er cuntegnair midadas. In midada precauta è la cuntinuaziun da l'istorgia d'in edifizi. Intervenziuns radicalas en la substanza istorica d'objects degns da vegnir protegids, per exempel disfatgas da l'intern u midadas radicalas da la structura architectonica fundamentala, destrueschan percunter la cuntinuitad dal monument ed uschia il monument sez.
Nua ch'in mantegniment da la substanza n'è betg pussaivel u pussaivel mo per part, perquai ch'il stadi da l'edifizi u novs basegns da las utilisadras e dals utilisaders pretendan novas soluziuns, tschertgan nossas collavuraturas e noss collavuraturs – ensemen cun las patrunas ed ils patruns da construcziun – pussaivladads per in'adattaziun architectonica ch'è cumpatibla cun la valur dal monument.
Sch'interess publics pli impurtants pretendan che la substanza architectonica degna da vegnir protegida vegnia remplazzada, duess il remplazzament esser bun da cumpensar las qualitads da l'edifizi vegl. Cun agid d'ina analisa vegnan l'emprim eruidas las qualitads architectonicas, spazialas e socialmain efficazias e lura duvradas sco basa per sviluppar in nov project. En tals process porscha la cussegliaziun da construcziun medemamain savida e valurs d'experientscha, per exempel tras la cooperaziun en gremis spezialisads.
Contactar la cussegliaziun da construcziun
Per chattar ina via adequata per tractar las ovras architectonicas da noss antenats èsi necessari da contactar – avant l'elavuraziun d'in project – ubain l'autoritad communala ubain er directamain la cussegliadra u il cussegliader da construcziun da la tgira da monuments ch'è responsabel per la regiun. Sche l'object respectiv n'è betg anc documentà, vegn quai ordinà per definir la valur da protecziun sco er finamiras da protecziun correspundentas. Suenter po vegnir elavurà e realisà in project.
Sche las persunas che vulan construir communitgeschan a temp a l'autoritad communala ed a la tgira da monuments lur intenziun da midar in edifizi istoric da valur, procura quai per segirezza da planisaziun. A medem temp entran ellas en in dialog infurmativ davart l'impurtanza da l'edifizi istoric e davart ses potenzial. Las proprietarias ed ils proprietaris d'edifizis istorics vegnan perquai supplitgads da contactar la cussegliaziun da construcziun – en il cas ideal – gia avant l'elavuraziun d'in project concret.
Per realisar projects da restauraziun disponan nossas collavuraturas e noss collavuraturs da contacts tar artisanas ed artisans, tar restauraturas e restauraturs sco er tar furnituras e furniturs da material, che han la scolaziun correspundenta e che pon vegnir consultads en cas da basegn. Per mesiras che servan a mantegnair ed a tgirar la substanza architectonica istorica, po vegnir inoltrada ina dumonda da contribuziun a la tgira da monuments.
Repartiziun dal territori da la cussegliaziun da construcziun
Dumonda da contribuziun
Explicaziuns davart la dumonda da contribuziun
Documentaziun finala e rendaquint final