Navigation

Inhaltsbereich

Stipendi d'atelier a Roma

L'atelier d'abitar sa chatta en il quartier San Lorenzo en la Via dei Latini 18. Il chantun Grischun metta a disposiziun gratuitamain las localitads e paja in supplement mensil da 3000 francs als custs da viver. La dimora dura mintgamai 3 mais:

- dal 1. da zercladur fin ils 31 d'avust 2023;
- dal 1. da settember fin ils 30 da november 2023.

Cun la dimora en l'atelier d'abitar a Roma promova il chantun Grischun artistas ed artists sco er scienziadas e scienziads da cultura, e quai cun cleras finamiras e sa referind a l'ovra. Ils projects che vegnan sustegnids duain:
- persvader artisticamain u istoricamain;
- esser autonoms e realisabels;
- avair in connex cun la citad u cun il territori urban.

Ulteriurs criteris da giudicament èn la relevanza, la professiunalitad ed il resun dal project inoltrà.

Premissas
Envidads da candidar èn artistas professiunalas ed artists professiunals che han
- lur domicil dapi almain 2 onns en il chantun Grischun u
- ina stretga relaziun cun il chantun Grischun u cun la cultura grischuna.

Annunzias èn pussaivlas en las suandantas spartas
- art figurativ;
- art applitgà;
- film;
- litteratura;
- musica;
- saut;
- teater;
- istorgia e memoria;
- intermediaziun e barat.

Documents d'annunzia
La dumonda cumpiglia:
- ina brev d'annunzia / da motivaziun e l'indicaziun dal termin da dimora preferì (max. duas paginas A4);
- il curs da la vita cun indicaziuns davart la persuna (num cumplet, adressa, numer da telefon, adressa dad e-mail,
  relaziun bancara e.u.v.), davart la scolaziun e davart l'activitad professiunala (max. quatter paginas A4);
- indicaziuns precisas davart il connex cun il chantun;
- ina descripziun dal project che ha in connex cun la citad da Roma u cun il territori urban (max. trais paginas A4);
- ina documentaziun davart la lavur da fin ussa (max. quatter paginas A4).

Sustegnidas prioritarmain vegnan activitads culturalas che adempleschan – en il rom d'ina consideraziun cumplessiva – particularmain bain ils criteris.
La dimora en l'atelier na vegn betg intermediada sco distincziun per prestaziuns furnidas e na vegn er betg fatga en il rom da la scolaziun u per incumbensa da terzas persunas.
S'annunziar danovamain pon ins il pli baud il terz onn suenter avair survegnì in stipendi d'atelier. Ina persuna po survegnir maximalmain trais giadas in stipendi d'atelier.

Ils documents d'annunzia ston vegnir inoltrads fin venderdi, ils 28 d'october 2022 (data dal bul postal) a la suandanta adressa:

Promoziun da la cultura dal Grischun / Uffizi da cultura
"Atelier Roma 2023"
Gürtelstrasse 89
7001 Cuira