Il project «Cupitgarola» porta moviment en il mintgadi da scolina. Persunas d'assistenza e d'instrucziun survegnan sustegn en dumondas dal moviment e dal nutriment. Ils uffants profitan da pussaivladads da sa mover multifaras e da pasts sauns.

«Cupitgarola» na porscha betg mo furmaziuns supplementaras davart il nutriment e davart il moviment, mabain er cussegliaziun e sustegn per transfurmar la stanza da scola en in local che resguarda e che promova il moviment. Cun agid da differents materials vegnan creads chantuns da moviment per sa sfugar. Las localitads èn concepidas uschia ch'ellas promovan il moviment e porschan als uffants la pussaivladad da sa mover libramain. Uschia sa movan ils uffants pli savens e sviluppan in meglier sentiment dal corp. Cun empruvar e far moviments difficils augmentan ils uffants lur inschign, lur curaschi e la confidenza en sasez.

In nutriment saun vegn promovì grazia a marendas cuminaivlas saunas l'avantmezdi ed il suentermezdi e grazia a pasts principals equilibrads. Ils uffants vegnan integrads activamain en la preparaziun dals pasts ed emprendan uschia ad enconuscher ed a stimar l'alimentaziun da basa.

Il project promova er il barat ed il transfer da savida tranter las persunas d'assistenza e d'instrucziun.

Ultra da las scolaziuns da basa (en etappas) han er lieu regularmain scuntradas da barat regiunalas.

Quest film curt declera il project a maun d'in bun exempel: https://youtu.be/H1JtAwDC-PI

Contact:
Sabine Neuwirth
Uffizi per la scola populara ed il sport
graubündenSport
Telefon: +41 81 257 27 54
E-mail: sabine.neuwirth@avs.gr.ch