Per reducir blessuras en il sport da scola recumonda il Post da consultaziun svizzer per la prevenziun d'accidents (PPA) d'integrar sistematicamain e sapientivamain la prevenziun d'accidents en las scolas. La plattafurma d'internet dal PPA www.bfu.ch/de/dossiers/sport-in-der-schule porscha sustegn pratic a las scolas. Sin la pagina d'internet stattan a disposiziun infurmaziuns multifaras, glistas da controlla e material d'instrucziun per differentas disciplinas da sport ed activitads da scola.
Instrucziun da nudar
En il Plan d'instrucziun 21 ed en las explicaziuns tar las tavlas da lecziuns èn definids ils suandants puncts concernent l'instrucziun da nudar:
- Las instituziuns responsablas per la scola èn obligadas da porscher – uschenavant sco pussaivel – in'occasiun per l'instrucziun da nudar (p.ex. soluziuns regiunalas, diever da bogns d'hotels durant la stagiun bassa).
- L'instrucziun da nudar dastga mo vegnir dada d'ina persuna d'instrucziun ch'è en possess d'in brevet renconuschì uffizialmain.
- Persunas d'instrucziun da nudar han cumpetenzas en nudar da salvament.
- Sco cumpetenza da basa en il 2. ciclus fixescha il Plan d'instrucziun che tut las scolaras ed ils scolars san sa mover en moda segira en l'aua e san nudar (controlla da segirezza en l'aua).
- Per motivs da segirezza èsi da far stim durant l'instrucziun da nudar da furmar gruppas d'ina grondezza bain survesaivla (betg dapli che 12 scolaras e scolars per gruppa). Pervia da quai vegni recumandà d'engaschar ina persuna accumpagnanta en cas da passa 12 scolaras e scolars.
- L'instituziun ch'è responsabla per la scola fa la surveglianza ed ha la responsabladad.
I vala mintgamai la legislaziun chantunala da scola: Per exempel stoi vegnir resguardà ch'ina persuna d'instrucziun, ch'è responsabla suletta per l'instrucziun da nudar tenor il plan d'instrucziun, haja ubain in diplom renconuschì che correspunda al stgalim u ina permissiun da dar scola ch'è vegnida concedida da l'uffizi.
Controlla da la segirezza en l'aua
Far ina cupitgarola da l'ur dal bogn en l'aua profunda, sa tegnair al lieu sur l'aua per 1 minuta, nudar 50m ed alura sortir da l'aua – quai è la controlla da la segirezza en l'aua (CSA). Cun la CSA vegni examinà, sch'ina persuna ch'è crudada en l'aua, po sa salvar sezza e cuntanscher sezza l'ur u la riva.
Las scolaras ed ils scolars che han absolvì cun success la CSA, survegnan in attest da la persuna d'instrucziun. Quel conferma che la scolara u il scolar ha reussì la CSA e ch'ella u el è cumpetenta u cumpetent avunda per dastgar ir en l'aua profunda survegliada.
En il chantun Grischun duain tut ils uffants avair l'occasiun d'emprender da nudar. La CSA è cuntegnida en il Plan d'instrucziun 21 en il ciclus 1 resp. en il ciclus 2.
La scola populara ha la finamira che las scolaras ed ils scolars possedian il pli tard a la fin da la 4. classa las cumpetenzas da la CSA.
Las persunas d'instrucziun pon empustar ils attests da CSA per lur scolaras e scolars gratuitamain cun quest formular.
Documents