Il sectur da la promoziun dal sport en scola s'occupa da tut las dumondas specificas dal sport da scola:
Dis chantunals da sport da scola
graubündenSport coordinescha ils dis chantunals da sport da scola e gida las organisaturas ed ils organisaturs ad administrar tals. En tut cumbattan var 2000 giuvenils durant l'onn als divers dis da sport da scola en las disciplinas ballarait, unihockey, ballabasket, cursa d'orientaziun sco er ballape per la qualificaziun per il di svizzer da sport da scola.
Cussegliadras e cussegliaders da gimnastica
En il chantun Grischun è en vigur l'uschenumnà sistem da cussegliaziun da gimnastica. En tut sustegnan 38 spezialistas e spezialists las scolas da lur circul da cussegliaziun da gimnastica. Cussegliadras e cussegliaders da gimnastica becusseglian la magistraglia en dumondas da l'instrucziun da sport sco er dal sport da scola voluntar. Ellas ed els han ina scolaziun d'in coach da scola G+S ed èn pia er las persunas da contact per ils fatgs da Giuventetgna+Sport.
Examen da sport da scola
La cussegliadra u il cussegliader da gimnastica è cumpetent per organisar e per realisar l'examen da sport da scola a la fin dal 8. onn da scola.
Quest test da sport obligatoric è in med impurtant per controllar la qualitad da l'instrucziun da sport. In ulteriur test facultativ en la 5. classa cumplettescha quel en moda preparativa.
Furmaziun supplementara da las persunas d'instrucziun
In ulteriur instrument per garantir la qualitad en il rom Moviment e sport è la furmaziun supplementara da las persunas d'instrucziun. graubündenSport organisescha e coordinescha differents curs da perfecziunament per persunas d'instrucziun.
Per ademplir questa furmaziun supplementara obligatorica d'in mez di pon las persunas d'instrucziun frequentar tranter auter in curs regiunal.
Las cussegliadras ed ils cussegliaders da gimnastica organiseschan mintga onn in tal curs regiunal davart temas actuals dal sport en lur circul da cussegliaziun da gimnastica. Ils curs regiunals vegnan adina publitgads directamain tras las scolas. Supplementarmain vegnan els publitgads sin la pagina d'internet.