Scolas da talents pussibiliteschan a scolaras ed a scolars dal stgalim secundar I (scola reala e secundara), che han talents en ina disciplina da sport, da frequentar la scola cun in urari ch'è adattà a las concurrenzas ed als trenaments. L'urari adattà cuntegna il trenament polisportiv sco promoziun supplementara al trenament en las uniuns ed en ils centers da prestaziun. Las singulas sequenzas da trenament han adina lieu en cunvegnientscha cun las partenarias ed ils partenaris da sport, per coordinar uschè bain sco pussaivel la scola, la regeneraziun ed ils basegns specifics da la disciplina da sport.

Ina scola da talents dispona d'ina coordinatura u d'in coordinatur che planisescha e coordinescha la collavuraziun tranter ils talents giuvens, ils geniturs, la scola e las uniuns.

En ils ateliers d'emprender pon las scolaras ed ils scolars elavurar cuntegns ch'els han manchentà en scola u ch'els n'han betg chapì, far lur lezias u lur pensums, cumpensar lecziuns, sa preparar per examens a scolas da cuntinuaziun e – cun agid da las persunas d'instrucziun – sa preparar per il mund professiunal resp. tschertgar in emprendissadi.

Examen d'admissiun a las classas da talents

Ils examens d'admissiun 2023 per entrar en ina scola da talents grischuna han lieu sco suonda:

• Termin da l'examen: venderdi, ils 10 da favrer 2023
• Lieu da l'examen: Scola professiunala artisanala a Cuira
• Termin d'annunzia: fin ils 30 da november 2022 a las 16:00!
• Inoltraziun dals mussaments da la federaziun chantunala: fin ils 30 da schaner 2023 (bul postal)
• L'annunzia (persunalias, indicaziuns davart la scola e davart il sectur da talent, garanzia ch'ils daners da scola da candidatas e candidats extrachantunals vegnian surpigliads) sto vegnir fatga online. Annunzias inoltradas memia tard na vegnan betg resguardadas.
• En cas da malsogna u da blessuras sto vegnir inoltrà in attest da la media u dal medi dad ACTIVDISPENS®. Il formular da dispensaziun chattais Vus qua.
• Dumonda da cumpensaziun dals dischavantatgs (p.ex. legastenia) tenor la disposiziun da l'uffizi nr. 305 dals 29 da fanadur 2013: Per plaschair inoltrar per posta u sco agiunta l'expertisa da la media u dal medi ubain dal servetsch psicologic da scola (resguardar l'ultim termin d'annunzia). Dumondas inoltradas memia tard na vegnan betg resguardadas. Inoltrar per plaschair mo dumondas che concernan l'examen d'admissiun a las scolas da talents.
• I vegnan acceptadas mo confermas da la federaziun chantunala grischuna correspundenta (sport u musica) u d'ina federaziun surordinada (interregiunala, naziunala), sche l'annunzia è vegnida inoltrada ordavant a temp. Tgi ch'è s'annunzià entaifer il termin previs, vegn clamà a temp da sia federaziun chantunala per giuditgar e per far la valitaziun dal talent pretendida.
• La taxa d'examen importa 200 francs. Ella vegn messa a quint a las candidatas admessas ed als candidats admess ensemen cun la clamada a l'examen.
  

Infurmaziuns detagliadas davart l'examen dattan ils documents qua sutvart.

Responsabladad per la realisaziun da l'examen d'admissiun

L'examen d'admissiun vegn preparà, manà tras e valità d'ina gruppa directiva. Ella prenda er las decisiuns concernent l'admissiun u l'inadmissiun a l'examen d'admissiun respectivamain concernent la reussida u la nunreussida da l'examen d'admissiun. L'Uffizi per la scola populara ed il sport nominescha las commembras ed ils commembers da questa gruppa directiva.

Trenaments da fufragnadi

En tut las scolas da talents vegnan purschids trenaments da fufragnadi per pudair emprender ad enconuscher las persunas responsablas e per survegnir ina invista da l'examen d'admissiun pratic. Per survegnir ina impressiun èsi giavischà ch'i vegnian frequentads in fin dus trenaments da fufragnadi en la scola giavischada. Ils trenaments da fufragnadi n'èn betg obligatorics (na fan betg part da l'examen d'admissiun) e vegnan organisads da las scolas da talents. En cas da dumondas As drizzai per plaschair directamain a la scola giavischada.