graubündenSport iniziescha e coordinescha la promoziun dal sport e dal moviment en il chantun Grischun, stgaffescha las premissas per realisar las mesiras tenor la Lescha da promoziun dal sport e tenor quest concept e realisescha l'ovra federala da promoziun dal sport «Giuventetgna+Sport». Quai cumpiglia l'organisaziun da curs da scolaziun e da furmaziun supplementara multifars per las persunas d'instrucziun dal chantun Grischun sco er las lavurs administrativas per il subvenziunament da las purschidas da sport en las uniuns, federaziuns e scolas.
Cun ina vasta paletta da servetschs e da contribuziuns finanzialas sustegna graubündenSport projects ed activitads che servan ad in svilup positiv dal sport. graubündenSport s'engascha per che las regiuns, las vischnancas, las uniuns e federaziuns da sport sco er ulteriuras acturas ed acturs hajan cundiziuns optimalas per promover il sport.
En il sectur dal sport da scola cumpiglian ils servetschs in'examinaziun da las prestaziuns en furma da l'examen chantunal dal sport da scola, differentas occurrenzas dal sport da scola, curs da furmaziun supplementara per persunas che instrueschan sport sco er la promoziun dal sport da scola voluntar. Per sustegnair il sport da dretg privat vegnan mess a disposiziun meds finanzials or dal fond da sport. En il rom da la promoziun generala dal sport sustegna u lantscha graubündenSport projects u programs per promover il sport ed il moviment confurm al temp.
Basas legalas
Concept per promover il sport
Studi "Sport en il Grischun"