Per federaziuns ed uniuns furma la Charta d'etica la basa per l'agir etic en il mintgadi da sport. Ils nov princips èn in'obligaziun per tuttas e tuts: per in sport saun, plain respect e fair:
- tractament egual per tuttas e tuts
- accordanza tranter sport ed ambient social
- rinforzament da l'atgna responsabladad e da la conresponsabladad
- promoziun cun respect empè da surpretensiun
- educaziun a la fairness ed a la conscienza per l'ambient
- cunter violenza, explotaziun ed agressiuns sexuals
- renunzia a doping ed a drogas
- renunzia a tubac ed ad alcohol durant il sport
- cunter mintga furma da corrupziun
Ils princips vegnan declerads pli detagliadamain en ils sutchapitels da la Charta d'etica. Els defineschan l'agir etic da Swiss Olympic e da las federaziuns. Sche l'uniun u la federaziun è commembra da Swiss Olympic, èn las manadras ed ils manaders da G+S suttamess al statut d'etica. Per las manadras ed ils manaders sco er per las atletas ed ils atlets vala da princip in'obligaziun d'annunzia e da provediment.
Il project «Etica en il sport», lantschà da l'Uffizi federal da sport e da Swiss Olympic, vul rinforzar e francar liantamain ina basa etica en il sistem svizzer da sport. Dapli infurmaziuns davart il project e davart il stadi actual chattais Vus qua.