Il program da prevenziun «cool and clean» da Swiss Olympic stat per sport curunà da success, fair e net. El sustegna las manadras ed ils manaders d'uniuns e da federaziuns da sport, sch'i sa tracta da promover las cumpetenzas da vita dals uffants e dals giuvenils, da percepir a temp svilups privlus e da reagir correctamain.
La finamira da «cool and clean» è quella da motivar – cun infurmaziuns, preschentaziuns e lavuratoris – uniuns da sport da sustegnair in sport net e fair e da s'annunziar per «cool and clean». Temas sco tubac ed alcohol, ma er fairplay u l'agen team vegnan intermediads tras il gieu. Per realisar il program cun ils giuvenils servan las sis empermischuns (uschenumnads «commitments»):
- Jau vi cuntanscher mias finamiras!
- Jau ma deport en moda faira!
- Jau fatsch mias prestaziuns senza doping!
- Jau desist da tubac!
- Jau desist d'alcohol! (U16) / Sche jau baiv alcohol, alura senza donnegiar mai ed auters! (16+)
- Jau ... ! Nus ... ! (atgna empermischun)
Infurmaziuns ed annunzia sut www.coolandclean.ch.
Cussegliaziun e sustegn
Uniuns e federaziuns che s'annunzian tar «cool and clean» vegnan sustegnidas cun material didactic sco sets da gieus, videos e broschuras d'infurmaziun ch'èn adattadas per giuvenils sco er tras la cussegliaziun da l'ambassadura chantunala u da l'ambassadur chantunal.
Sets da cartas cun differentas furmas da gieus per trenaments u per champs pon vegnir empustads gratuitamain en il shop per als duvrar silsuenter.
Tar la controlla da l'uniun profitan uniuns d'ina cussegliaziun gratuita tras l'ambassadura u l'ambassadur, co che l'ambient da l'uniun po vegnir concepì uschia ch'el promova la sanadad. Cur che las mesiras definidas èn vegnidas realisadas cun success survegn l'uniun in sustegn da 1000.– francs.
Ultra da quai sustegna «cool and clean» organisaturas ed organisaturs da sport e gestiunarias e gestiunaris d'implants da sport tar la realisaziun da mesiras per proteger la giuventetgna, da mesiras per proteger cunter il fimar passiv e da mesiras per schubradad e cunter littering.
Material d'occurrenza
«cool and clean» maina ina butia d'internet (webshop) cun material d'occurrenza gratuit sco bindel da bloccada, bandierinas per marcar u placats davart la protecziun da la giuventetgna tar occurrenzas da sport.
A Cuira stat a disposiziun er auter material per emprestar:
- tenda plegabla
- bar
- bandieras e banderolas da reclama
Il material sto vegnir prendì en consegna e puspè returnà a Cuira. Empustaziuns pon vegnir fatgas sur il suandant link (tscherner Centrala per stampats e material dal chantun Grischun [CSM]): Cool and Clean - Shop.
Contact
Martina Gäumann
Ambassadura da «cool and clean»
martina.gaeumann@avs.gr.ch
+41 79 176 29 54