Il chantun Grischun tgira numerus contacts bilaterals cun auters chantuns. D'impurtanza speziala è en quest connex la collavuraziun cun ils chantuns cunfinants.

Ina stretga collavuraziun cun ils auters chantuns datti medemamain en il rom da las conferenzas interchantunalas. En il sistem federal da la Svizra existan conferenzas sin nivel naziunal sco er sin nivel regiunal. Ultra da quai vegn differenzià tranter las Conferenzas da las regenzas dals chantuns che surpiglian funcziuns interdisciplinaras, e las Conferenzas dals directurs chantunals cumpetents che cuvran in tschert sectur politic. Sin nivel da las regenzas e da las administraziuns è il chantun Grischun represchentà en divers gremis interchantunals.

Conferenza da las regenzas chantunalas (CdC)

La Conferenza da las regenzas chantunalas (CdC) ha l'intent da promover la collavuraziun tranter ils chantuns en lur champ da cumpetenza, e da garantir – en fatschentas federalas relevantas per ils chantuns – la coordinaziun e l'infurmaziun necessaria dals chantuns. Ella s'occupa en spezial da dumondas concernent:

• la renovaziun e l'ulteriur svilup dal federalissem;
• la repartiziun da las incumbensas tranter la Confederaziun ed ils chantuns;
• la furmaziun da la voluntad e la preparaziun da las decisiuns en la Confederaziun;
• l'execuziun d'incumbensas federalas tras ils chantuns;
• la politica exteriura e la politica d'Europa.

Da la CdC fan part las regenzas da tut ils 26 chantuns. L'organ principal da la CdC è la radunanza plenara che ha lieu mintga quartal. Qua èn represchentads ils chantuns mintgamai tras ina commembra u in commember da la Regenza cun mintgamai ina vusch, ed i vegn decidì davart las fatschentas politicas da la CdC.

La Cumissiun directiva è l'organ directiv da la CdC. En la Cumissiun directiva preparan nov cusseglieras guvernativas e cussegliers guvernativs da tut las regiuns las fatschentas da la radunanza plenara. Tenor l'urden da gestiun posseda la Svizra rumantscha in sez permanent en la Cumissiun directiva. Commember grischun da la Cumissiun directiva e president da la CdC è il cusseglier guvernativ Christian Rathgeb.

Ulteriuras infurmaziuns: www.kdk.ch

Conferenza da las regenzas dals chantuns alpins (CRCA)

La Conferenza da las regenzas dals chantuns alpins (CRCA) è vegnida fundada l'onn 1981. Ella ha ils suandants intents:

• accordar e represchentar communablamain ils interess rurals ed alpins envers la Confederaziun, envers ils chantuns, envers las federaziuns ed envers la publicitad;
• accentuar efficaziamain il niz dals territoris rurals e dals territoris da muntogna per la coesiun da l'entir pajais;
• collavurar effizientamain cun las administraziuns chantunalas a maun d'infurmaziuns vicendaivlas davart las proximas sfidas per il territori rural e per il territori da muntogna sco er a maun d'ina elavuraziun da propostas da soluziun communablas.

Commembers da la CRCA èn ils chantuns Grischun, Vallais, Uri, Glaruna, Sutsilvania, Sursilvania, Tessin ed Appenzell Dadens.

La conferenza plenara è l'organ suprem da la CRCA e sa raduna quatter giadas l'onn. Il presidi mida en intervals regulars tranter ils chantuns commembers.

Ulteriuras infurmaziuns: www.rkgk.ch

Conferenza da las regenzas dals chantuns da la Svizra Orientala (CRO)

La Conferenza da las regenzas dals chantuns da la Svizra Orientala (CRO) è vegnida fundada l'onn 1964. En la furma actuala exista ella dapi l'onn 1996. Ella ha ils suandants intents:

• procurar per l'infurmaziun vicendaivla e per la coordinaziun tranter ils chantuns da la Svizra Orientala;
• represchentar en moda efficazia ils interess da la Svizra Orientala envers la Confederaziun ed envers auters chantuns;
• preschentar communablamain ils interess e las posiziuns da la Svizra Orientala en las medias;
• collavurar pli stretgamain sin tscherts champs, p.ex. tras instituziuns communablas u tras instituziuns chantunalas coordinadas;
• promover la colleghialitad tranter las commembras ed ils commembers da las regenzas da la Svizra Orientala.

Commembers da la CRO èn ils chantuns Glaruna, Schaffusa, Appenzell Dador, Appenzell Dadens, Son Gagl, Turgovia e Grischun. Il chantun Turitg ed il Principadi da Liechtenstein èn commembers associads.

L'organ suprem da la CRO è la conferenza plenara, a la quala vegnan tractadas fatschentas d'ina impurtanza fundamentala ed actuala per la Svizra Orientala e per ils chantuns commembers. La conferenza plenara sa raduna ina giada l'onn. Ella vegn preparada da la Cumissiun preparatorica (chancelieras e chanceliers dals chantuns commembers). Il secretariat da la CRO vegn manà dal Post da coordinaziun per relaziuns externas da la Chanzlia chantunala da Son Gagl.

Ulteriuras infurmaziuns: www.ork-ostschweiz.ch