Navigation

Inhaltsbereich

Per ch'il chantun possia far diever dal sistem dad e-voting, ha lieu ina controlla independenta tras expertas ed experts externs per incumbensa da la Chanzlia federala. En quest connex vegni controllà, sch'il sistem ed il manaschi tar la purschidra dal sistem, tar ils chantuns e tar la stamparia correspundan a las pretensiuns dal dretg federal. Ils rapports da controlla vegnan publitgads sin la pagina d'internet da la Chanzlia federala. Supplementarmain dovri per il diever dal sistem ina permissiun fundamentala dal Cussegl federal ed in'admissiun da la Chanzlia federala.

Rapports da la controlla independenta per incumbensa da la Chanzlia federala (admin.ch)
Giudicament da las ristgas da la Chanzlia federala (admin.ch)

En il rom da la procedura da permissiun ha il chantun – en collavuraziun cun ils chantuns Son Gagl, Basilea-Citad e Turgovia – elavurà ils suandants documents (en tudestg).

Il sistem dad e-voting vegn meglierà e sviluppà vinavant cuntinuadamain. Las controllas independentas per incumbensa da la Chanzlia federala vegnan repetidas regularmain. Il basegn d'agir sco er ils ulteriurs svilups planisads vegnan documentads en in catalog da mesiras.

Catalog da mesiras da la Confederaziun e dals chantuns per meglierar e sviluppar vinavant il e-votin (admin.ch) 

Per las suandantas uschenumnadas «Nunconfurmitads» (excepziuns tenor l'art. 16 al. 2 OVE) ha il chantun Grischun survegnì ina permissiun excepziunala:

  • L'urna electronica vegn gia decodada la sonda, malgrà ch'ina decodaziun dastga cumenzar – tenor las prescripziuns dal dretg federal – il pli baud la dumengia da votaziun u d'elecziun. Las basas giuridicas chantunalas pussibiliteschan al chantun Grischun da far la decodaziun la sonda.
  • Pervia da las quantitads creschentas n'èsi betg pussaivel en mintga cas da pachetar ils attests da votar directamain suenter la stampa. I èn vegnidas realisadas differentas mesiras per garantir il deposit temporar segir fin a l'ulteriura elavuraziun u fin a la spediziun postala.

La Posta Svizra publitgescha tut las cumponentas relevantas dal sistem dad e-voting e las lascha testar publicamain (program da bug bounty). Annunzias che gidan a meglierar il sistem, vegnan remuneradas finanzialmain. La Posta Svizra infurmescha la publicitad davart annunzias ch'ella survegn en il rom dal program da bug bounty, sco er davart meglieraments dal sistem realisads u planisads.

Infurmaziuns davart il program dad e-voting community da la Posta Svizra (post.ch)
Plattafurma da publicaziun da la Posta Svizra per il code da funtauna e la documentaziun dal sistem (gitlab.com)