En il Grischun sto vegnir constatà che la pratica da permetter implants da fotovoltaica chaschuna adina puspè problems, saja quai entaifer u ordaifer las zonas da construcziun. Ils patruns da construcziun vegnan adina puspè confruntads cun decisiuns da construcziun negativas.
L'art. 18a LPT prescriva che implants solars entaifer sco er ordaifer las zonas da construcziun ston esser integrads bain en tetgs ed en fatschadas.
En quest connex sa tschentan las suandantas dumondas:
1. Co interpretescha la regenza l'expressiun "bain" en l'art. 18a LPT?
2. Èsi correct che implants che vegnan construids en moda moderada cun pitgas verticalas entaifer sco er ordaifer las zonas da construcziun na dastgan betg vegnir permess?
3. Tge pratica applitgescha il chantun per permetter edifizis e stabiliments ordaifer la zona da construcziun (p.ex. edifizis d'economia, stallas e.u.v.)?
4. N'èn zonas d'industria betg suttamessas a l'art. 18a LPT?
Cuira, ils 2 da settember 2011
Albertin, Valär, Augustin, Berther (Mustér), Berther (Camischolas), Bezzola (Samedan), Bondolfi, Brandenburger, Buchli-Mannhart, Burkhardt, Caluori, Campell, Candinas, Casty, Casutt, Casutt-Derungs, Clavadetscher, Conrad, Darms-Landolt, Della Vedova, Dermont, Dosch, Fontana, Furrer-Cabalzar, Gasser, Geisseler, Giacomelli, Gunzinger, Hartmann (Champfèr), Heiz, Hitz-Rusch, Holzinger-Loretz, Joos, Kappeler, Kleis-Kümin, Koch (Tumein), Kollegger (Malix), Krättli-Lori, Kunz (Cuira), Märchy-Caduff, Marti, Meyer-Grass, Michael (Castasegna), Montalta, Niggli (Samedan), Niggli-Mathis (Grüsch), Papa, Parpan, Pedrini, Sax, Stiffler (Tavau Plaz), Tenchio, Tomaschett (Breil), Tomaschett-Berther (Trun), Troncana-Sauer, Vetsch (Claustra Vitg), Waidacher, Wieland, Zanetti, Zweifel-Disch, Bricalli, Müller (Haldenstein), Patt, Rodigari, Schucan, Wolf
Resposta da la regenza
Promover energias regenerablas sco la forza idraulica, la fotovoltaica, l'energia dal vent, la geotermia e la biomassa è ina necessitad en l'ambient actual da la politica d'energia. Il maun public metta a disposiziun per quai annualmain plirs milliuns francs en furma da meds da promoziun. Chapaivel ch'ins è interessà vi da proceduras da permissiun uschè sveltas e simplas sco pussaivel. Quai vala per tut ils implants che servan per promover energias regenerablas, betg mo per ils implants solars tematisads qua survart. Che la permissiun d'implants solars chaschunia effectivamain (citat) "adina puspè" problems e decisiuns negativas, sco ch'i vegn ditg pauschalmain en la dumonda qua avant maun, na po la regenza dal rest betg confermar en questa furma. Betg cuntentaivlas èn segiramain las differenzas da pratica tranter las singulas vischnancas sco er las lungas glistas da spetga en connex cun l'indemnisaziun per cuvrir ils custs da la furniziun d'electrici-tad (ICF); in fatg che dastgass dentant sa meglierar durant l'onn 2012.
Pertutgant las dumondas s'imponan las suandantas remartgas:
1. Per permetter implants solars e pia per interpretar la noziun "bain" da l'art. 18a LTP èn cumpetentas las vischnancas ed – ordaifer las zonas da construcziun – l'uffizi per il svilup dal territori (UST). En quest sectur n'ha la regenza sezza betg sviluppà ina pratica d'interpretaziun, davart la quala ella pudess dar infurmaziuns. Tenor il commentari tar la LPT valan implants solars sin tetgs u vi da fatschadas alura sco integrads accuratamain, sch'els vegnan montads "parallelamain a la surfatscha u a l'ur", en moda che elevaziuns da fin a 20 cm entaifer in profil vegnan toleradas per regla, e quai per resguardar ils collecturs da sulegl pli gross per la producziun d'aua chauda. Excepziuns valan per tetgs plats, nua ch'i vegnan acceptadas posas.
2. L'art. 18a LPT fixescha che implants solars integrads accuratamain, pia parallels a la surfatscha ed a l'ur, stoppian vegnir permess (permissiun automatica). Cun questa prescripziun vuleva il legislatur federal evidentamain garantir en l'entir pajais il dretg minimal d'obtegnair ina permissiun per implants che cuntanschan ina tscherta dimensiun d'accuratezza. Da quai na po dentant betg vegnir deducì che implants che sa chattan sut la limita d'accuratezza na dastgian insumma betg vegnir permess. Tals implants èn mo exceptads da la permissiun automatica, q.v.d. tals implants ston anc vegnir examinads concretamain en mitga cas singul, sch'els pon vegnir approvads u betg. En il Grischun èn las vischnancas cumpetentas e dumandadas per quest intent. Ellas ston far ina ponderaziun tranter ils interess da la furmaziun architectonica e da la tgira da monuments per l'ina e l'interess per la promoziun d'energias regenerablas per l'autra. Bleras autoritads communalas da construcziun èn malsegiras en chaussa. La regenza ha perquai annunzià gia la sessiun d'avrigl 2011 a quest cussegl ch'ella veglia laschar elavurar in agid d'execuziun cun buns exempels da classificaziun. Perquai che l'art. 18a LPT vegn gist revedì, fai senn da spetgar anc in pau cun l'agid d'execuziun.
3. Davart la pratica da permissiun EOZ da l'uffizi per il svilup dal territori (UST) en connex cun implants solars vi d'edifizis agriculs ordaifer las zonas da construcziun è la regenza s'exprimida mo dacurt en quest cussegl, cur ch'ella ha respundì dumondas correspundentas dal deputà Jenny. Ella ha rendì attent ch'ils uffizis pertutgads sajan vidlonder da laschar elavurar soluziuns per pudair tegnair quint dals interess per part cuntradictorics (promoziun d'energias regenerablas; concepziun architectonica; segirezza en vista al privel da la naiv glischnanta).
4. Zonas d'industria èn er suttamessas giuridicamain a l'art. 18a LPT, en moda ch'en talas zonas pon l'estetica architectonica ed ils interess da la protecziun dal maletg dal vitg obtegnair en la ponderaziun dals interess, per natira, ina impurtanza main ferma.
2 da november 2011