En Svizra ed en l'Europa è la statistica publica sa sviluppada ils ultims decennis ad ina incumbensa d'infrastructura autonoma dal stadi.
La statistica publica serva al manaschament, a la direcziun dal stadi e metta il medem mument a disposiziun la basa da decisiun objectiva per la politica sco er per interpresas e per instituziuns privatas e publicas. La pretensiun da la statistica publica è quella d'elavurar ina basa objectiva e da gidar ad objectivar la discussiun politica e democratica.
La basa da decisiuns politicas e d'incumbensas da l'administraziun sto vegnir furmada da datas fundadas ch'èn avant maun en furma da cifras, da cumpilaziuns u schizunt sco statisticas. Per pudair quantifitgar midadas en l'economia, en il stadi ed en la societad dovra l'administraziun proceduras adattadas. Uschia èsi indispensabel da metter a disposiziun datas d'ina auta qualitad per proceduras da decisiun politicas en in mund economic e social che daventa adina pli cumplex.
Ultra da quai èn datas e statisticas facilmain accessiblas in servetsch impurtant per nossa populaziun. Pia na serva la statistica publica betg mo a l'administraziun, mabain er en moda essenziala al rinforz da la democrazia.
Cun l'introducziun dal portal da statistica interacti (
www.statistik.gr.ch) (punct central da svilup 3/15, e-government) è vegnì fatg in emprim pass. A disposiziun stat in geoclip cun datas dals suandants sis secturs: populaziun, economia, turissem, fatgs da construcziun e d'abitar, finanzas sco er territori ed ambient.
Impurtants èn però ulteriurs pass ed in'extensiun dal portal. I sa tracta per exempel da la cumplettaziun cun datas dal sectur social, dal sectur da sanadad, dal sectur da furmaziun, da la statistica dal traffic e.u.v.
Blers chantuns han in agen uffizi da statistica u almain in post spezialisà ch'è dotà correspundentamain. En il sectur da l'economia ha il chantun Grischun ina plazza. Abstrahà da quai vegni surlaschà a mintga post da servetsch da generar sez enconuschientschas statisticas.
Las sutsegnadras ed ils sutsegnaders incumbenseschan perquai la regenza da daventar activa en ina moda e maniera adattada (uffizi, post spezialisà engrondì, augment da la dotaziun dal preventiv da plazzas correspundent u chaussas sumegliantas) tenor las explicaziuns qua survart e da rapportar al cussegl grond en ina furma cunvegnenta respectivamain da far ina proposta respectiva al cussegl grond.
Cuira, ils 18 d'avrigl 2012
Peyer, Marti, Caluori, Albertin, Augustin, Baselgia-Brunner, Bucher-Brini, Caduff, Cavegn, Della Vedova, Dudli, Fontana, Frigg-Walt, Gartmann-Albin, Gunzinger, Jaag, Jeker, Jenny, Joos, Kappeler, Koch (Igis), Komminoth-Elmer, Kunz (Fläsch), Mani-Heldstab, Märchy-Caduff, Meyer-Grass, Müller, Noi-Togni, Pfenninger, Pult, Rosa, Stiffler (Cuira), Thöny, Trepp, Waidacher, Wieland, Deplazes, Hensel, Michel (Igis), Monigatti, Schucan