Dumonda urgenta Caduff concernent in segund tunnel da via tras il Gottard
Sessiun: 11.06.2012
Il tunnel da via tras il Gottard sto vegnir sanà cumplettamain ils onns 2020 fin 2025. Per che las lavurs da sanaziun possian vegnir exequidas, sto il tunnel da via tras il Gottard vegnir serrà per il traffic durant las lavurs da sanaziun, e quai per ina durada da circa 900 dis. En vista a l'impurtanza naziunala ed internaziunala dal tunnel da via tras il Gottard è il manaschament dal traffic central durant la sanaziun. Al traffic da persunas e da rauba ston vegnir messas a disposiziun alternativas durant quest temp.
Senza la construcziun d'in segund tunnel da via tras il Gottard stoi vegnir fatg quint ch'ina part considerabla dal traffic vegnia a duvrar la ruta dal San Bernardin sco alternativa durant las lavurs da sanaziun. Per il chantun Grischun avess quai consequenzas negativas considerablas. Per quest motiv è la construcziun d'in segund tunnel da via tras il Gottard da gronda impurtanza per il chantun Grischun.
Tenor rapports da la Sonntagszeitung dals 10 da zercladur 2012 n'excluda il departament federal per ambient, traffic, energia e communicaziun DATEC betg pli la construcziun d'in segund tunnel da via tras il Gottard. Il motiv, hai num, sajan il lung temp, durant il qual il Gottard è serrà, e las prognosas dals custs da la sanaziun che vegnan curregidas permanentamain vers ensi. Anc la primavaira ha il DATEC fatg quint ch'ina sanaziun saja realisabla en dus onns e mez, sch'il tunnel da via vegnia serrà per quest temp. En il fratemp èn ins da l'avis ch'ina serrada totala na saja betg pussaivla. Perquai fan ins ussa quint cun ina sanaziun che dura trais onns e mez e cun ina serrada totala durant 280 dis per onn. Mo quai augmentass ils custs da sanaziun da 650 sin 750 milliuns francs. Vitiers vegn che las mesiras accumpagnantas ch'èn necessarias durant la sanaziun vegnan ad esser pli charas che stimadas. Entant ch'il tunnel è serrà sto il traffic vegnir svià ed er manà sco via rullanta cun la viafier tras il tunnel da viafier dal Gottard. Ils custs èn oriundamain vegnids fixads sin 500 milliuns francs, pli tard sin 700 ed ussa sin 900 milliuns francs. La sanaziun senza in segund tunnel custass uschia circa 1,65 milliardas francs, la sanaziun inclusiv la construcziun d'in segund tunnel per 2 milliardas francs fiss mo 1 milliarda francs pli chara, custass pia circa 2,65 milliardas francs. Quai mussan – tenor persunas involvidas – las cifras da l'uffizi federal da vias (UVIAS).
In segund tunnel da via, cun bischens d'in vial separads per direcziun augmenta la segirezza da l'axa da transit dal Gottard, permetta en il futur dapli flexibilitad en cas ch'i vegn serrà in bischen, na chaschuna – cumpareglià cun oz – betg ina capacitad da transit supplementara e respecta uschia l'artitgel correspundent da la constituziun federala.
Tenor la communicaziun tracta il cussegl federal questa fatschenta concernent la sanaziun dal tunnel da via tras il Gottard anc avant las vacanzas da stad 2012. Al cussegl federal duain vegnir preschentadas duas variantas. Suenter duai vegnir instradada ina consultaziun. Sco chantun ch'è pertutgà spezialmain ferm da la sanaziun dumondan las sutsegnadras ed ils sutsegnaders la regenza:
1. Tge posiziun ha la regenza grischuna envers la construcziun d'in segund tunnel da via tras il Gottard?
2. È la regenza pronta da s'engaschar per la construcziun d'in segund tunnel da via tras il Gottard en la consultaziun previsa?
Samignun, ils 11 da zercladur 2012
Caduff, Nick, Felix
Resposta da la regenza
Cun il tema da la sanaziun dal tunnel da via tras il Gottard sa fatschentan la regenza ed en spezial il departament da construcziun, traffic e selvicultura cumpetent intensivamain dapi passa 3 onns. Ils dubis e las resalvas concernent in augment pussaivel dal traffic sin la ruta dal San Bernardin durant las lavurs da sanaziun èn vegnids suttamess en scrit al departament federal per ambient, traffic, energia e communicaziun (DATEC) gia curt suenter l'assegnaziun d'in postulat dal cussegl dals chantuns davart l'elavuraziun d'in concept per la sanaziun. Quest rapport è silsuenter vegnì redigì e publitgà senza la participaziun e l'infurmaziun giavischada dal chantun Grischun. La regenza ha dumandà immediatamain ina discussiun ed è s'exprimida per la soluziun cun in segund tunnel da via. L'onn 2011 èn alura vegnids fatgs differents ulteriurs scleriments sin plaun federal, en spezial pervia da l'intervenziun dals chantuns ch'èn pertutgads principalmain Tessin, Uri e Grischun. Per la preschentaziun dals resultats ha dunna cussegliera federala Doris Leuthard envidà quests chantuns a Berna. Anc adina stevan en quest connex en il center las soluziuns da sanaziun cun serrar il tunnel. Il traffic supplementar spetgà per il Grischun è vegnì giuditgà sco fitg minim, cun la motivaziun ch'i vegnian prendidas mesiras voluminusas sin l'axa dal Gottard e ch'i vegnian stgaffidas pussaivladads efficazias da transportar rauba e vehichels cun la viafier. En spezial ils chantuns Tessin e Grischun han però insistì che la varianta cun construir da nov in segund tunnel vegnia examinada anc ina giada detagliadamain per avair propi ina pussaivladad da cumparegliar. Ina resposta concreta resp. ina infurmaziun uffiziala da vart da la confederaziun n'è betg arrivada enfin ussa. Sco menziunà en la dumonda urgenta, para il DATEC da vulair preschentar ussa duas variantas al cussegl federal.
Davart las dumondas concretas s'exprima la regenza sco suonda:
1. A chaschun da dar resposta a differentas dumondas en il cussegl grond ed envers las valladas pertutgadas sco er a chaschun da diversas posiziuns e preschentaziuns envers la confederaziun è la regenza adina s'exprimida cleramain – per ils motivs ch'èn bain enconuschents – cunter in engrevgiament supplementar da la ruta dal San Bernardin ed ha adina dà cleramain la preferenza a la construcziun d'in tunnel da via nov tras il Gottard. En quest reguard n'è sa midà nagut per la regenza.
2. La construcziun d'in segund tunnel da via tras il Gottard è anc adina la soluziun ch'il Grischun preferescha. En il rom d'ina eventuala consultaziun, ma er a mintga occasiun che sa porscha vegn la regenza a s'engaschar energicamain per quai. En quest connex è ella però cleramain da l'opiniun ch'i dastgia star a disposiziun mo in vial per direcziun per il manaschi futur dal tunnel da via. In augment da la capacitad na vegn betg en dumonda per la regenza.
12 da zercladur 2012