En l'interess d'in provediment medicinal confurm al basegn, d'auta qualitad ed economic èn ils chantuns sa cunvegnids da coordinar e da concentrar la medischina fermamain spezialisada. Per quest intent han els concludì la cunvegna interchantunala davart la medischina fermamain spezialisada (CIMFS). La medischina fermamain spezialisada cumpiglia – tenor la cunvegna – quels secturs e quellas prestaziuns ch'èn caracterisads tras lur rarezza, tras lur grond potenzial d'investiziun, tras lur grond basegn da persunal u d'apparats tecnics ubain tras proceduras da tractament cumplexas. Per l'attribuziun a la medischina fermamain spezialisada ston esser ademplids almain trais dals criteris menziunads qua survart; il criteri da la rarezza sto en mintga cas esser ademplì per l'attribuziun.
En la missiva pertutgant la participaziun dal chantun a la cunvegna ha la regenza explitgà che tras ils criteris prescrits resultia in impediment che garantescha che betg tut las prestaziuns na possian vegnir attribuidas a la medischina fermamain spezialisada (missivas carnet nr. 7/2008-2009, p. 275).
L'ultim temp prendan ils organs cumpetents da la cunvegna (organ che prenda conclus ed organ spezialisà) pli e pli en egl secturs e prestaziuns per l'attribuziun a la medischina fermamain spezialisada, nua ch'ils criteris prescrits en la cunvegna per l'attribuziun a la medischina fermamain spezialisada na vegnan betg ademplids u vegnan ademplids mo per part. Concretamain pertutga quai actualmain en spezial la chirurgia viscerala e l'oncologia. En connex cun in'attribuziun talmain vasta da las prestaziuns da quests secturs a la medischina fermamain spezialisada vegn l'ospital chantunal dal Grischun restrenschì inadequatamain en sia purschida da prestaziuns.
Las deputadas ed ils deputads sutsegnads suttamettan pia a la regenza las suandantas dumondas:
1. Co giuditgescha la regenza il proceder da l'organ spezialisà e da l'organ che prenda conclus da la CIMFS en connex cun l'attribuziun da secturs e da prestaziuns a la medischina fermamain spezialisada?
Quant fitg vegniss l'ospital chantunal dal Grischun restrenschì en sia purschida da prestaziuns pervia da las agiudicaziuns d'attribuziun che stattan actualmain en discussiun?
2. Han la regenza respectivamain il departament cumpetent sviluppà activitads per garantir la purschida da prestaziuns da l'ospital chantunal dal Grischun? Sche gea, tgeninas?
3. Sche gea, quals èn ils resultats da las intervenziuns da la regenza respectivamain dal departament cumpetent?
Cuira, ils 11 da zercladur 2013
Caduff, Gunzinger, Casty, Albertin, Blumenthal, Brandenburger, Caluori, Campell, Casanova-Maron, Casutt-Derungs Silvia, Cavegn, Conrad, Della Vedova, Dermont, Dosch, Fasani, Felix, Gartmann-Albin, Geisseler, Hardegger, Hartmann (Champfèr), Holzinger-Loretz, Jeker, Jenny, Joos, Kleis-Kümin, Kollegger (Malix), Kunz (Fläsch), Kunz (Cuira), Lorez-Meuli, Mani-Heldstab, Meyer-Grass, Niggli-Mathis (Grüsch), Papa, Parolini, Pedrini, Peyer, Pult, Righetti, Tenchio, Tomaschett (Breil), Tomaschett-Berther (Trun), Trepp, Troncana-Sauer, Vetsch (Pragg-Jenaz), Zanetti, Berther (Segnas), Buchli (Favugn), Degonda, Grünenfelder, Hauser, Müller (Susch), Müller (Haldenstein), Preisig
Resposta da la regenza
Resposta a las dumondas
1. La regenza n'è per gronda part betg perencletga cun il proceder da l'organ spezialisà e da l'organ da la CIMFS che prenda conclus. Sin proposta da l'organ spezialisà attribuescha l'organ che prenda conclus pli e pli secturs e pli e pli prestaziuns a la medischina fermamain spezialisada. Tar quests secturs e tar questas prestaziuns n'èn ils criteris ch'èn prescrits en la cunvegna per l'attribuziun a la medischina fermamain spezialisada, cunzunt il criteri da la rarezza dals cas, betg ademplids u èn ademplids mo per part, sch'ins als resguarda objectivamain.
En connex cun la decisiun d'attribuziun ch'è vegnida prendida ils 4 da fanadur 2013 da l'organ da la MFS che prenda conclus pertutgant il sectur da las grondas intervenziuns da la chirurgia viscerala n'è l'ospital chantunal dal Grischun betg vegnì resguardà areguard la resecziun da l'oesophagus (allontanament operativ parzial dal schiliez). L'ospital chantunal dal Grischun perda uschia tschintg fin diesch cas per onn. En ils ulteriurs secturs parzials (chirurgia resecziunanta da la pancrea, chirurgia resecziunanta dal dir, resecziuns profundas dal rectum ed intervenziuns bariatricas cumplexas) ha l'ospital chantunal dal Grischun survegnì mo ina incarica da prestaziun provisorica. Las propostas dal departament e da l'ospital chantunal dal Grischun da na betg attribuir ils secturs parzials menziunads qua survart – pervia da la frequenza dals cas – a la medischina fermamain spezialisada n'èn betg vegnidas acceptadas.
En il sectur da l'oncologia n'ha l'organ da la MFS che prenda conclus betg anc prendì ina decisiun d'attribuziun. Tras l'attribuziun che l'organ che prenda conclus ha prendì en mira na pudessan betg pli vegnir tractads en l'ospital chantunal dal Grischun fin 200 pazientas e pazients per onn.
2. Il departament da giustia, segirezza e sanadad è intervegnì – cun sia brev dals 30 da schaner 2013 – ensemen cun ils departaments cumpetents per ils fatgs da sanadad dals chantuns Glaruna e Turgovia tar l'organ che prenda conclus ed ha supplitgà quel instantamain d'attribuir a la medischina fermamain spezialisada mo secturs e prestaziuns che cumpiglian effectivamain cas uschè rars, sco quai ch'els èn vegnids empermess als chantuns en il rom da la procedura da participaziun a la cunvegna.
A la radunanza plenara dals chantuns commembers da la CIMFS dals 23 da matg 2013 ha il schef dal departament repetì expressivamain questa pretensiun.
Il departament vegn ad insister er vinavant per che las stretgas premissas che valan per l'attribuziun da prestaziuns medicinalas a la medischina fermamain spezialisada e ch'èn statuidas en la cunvegna vegnian observadas. En cas da basegn vegnan ins – ensemen cun auters chantuns – a stuair examinar da sortir da la cunvegna.
3. L'organ che prenda conclus ha empermess al departament en sia resposta dals 13 da mars 2013 da dar – a chaschun da las proximas etappas da planisaziun – dapli attenziun a las dumondas ch'il departament ha mess en discussiun. Fin a la proxima sesida da l'organ che prenda conclus dals 24 da matg 2013 saja avant maun ina planisaziun generala che preschentia, etappeschia e prioriseschia las proximas lavurs e che las adatteschia a las resursas ch'èn avant maun. A la radunanza plenara da la CIMFS dals 23 da matg 2013 vegnia fatg in rapport davart il proceder e davart il resguardar las consideraziuns ch'il departament ha fatg en connex cun il progress da las lavurs.
Il rapport a chaschun da la radunanza plenara da la CIMFS dals 23 da matg 2013 è vegnì fatg mo en ina furma generala, malgrà l'annunzia d'in auter cuntegn. La presidenta da l'organ che prenda conclus ha empermess da deliberar liantamain la priorisaziun ("roadmap da la MFS") per la sesida da l'organ che prenda conclus dals 4 da fanadur 2013. Ils chantuns participads a la cunvegna vegnian alura infurmads immediatamain davart ils conclus.
Suenter la sesida dals 4 da fanadur 2013 ha l'organ da la MFS che prenda conclus communitgà che la discussiun davart la fixaziun da novas prioritads da planisaziun per ils onns 2014 e 2015 saja anc adina averta. L'organ da la MFS che prenda conclus haja discutà l'interpretaziun dal criteri CIMFS da la rarezza ed haja confermà ch'ins stoppia tegnair quint da quest criteri pli fitg en il futur.
23 d'avust 2013