La regenza vegn incumbensada da prender per mauns il project per in tunnel da viafier Tavau – Scanvetg e da preschentar quest project al cussegl grond. En il temp dad oz daventan talas colliaziuns pli e pli impurtantas. Cun la teleferica da colliaziun Lai – Arosa han questas vischnancas prendì ina decisiun ch'è stada fitg prospectiva: Ussa stuain nus far in ulteriur pass impurtant!
Per quest project èn gia vegnidas inoltradas differentas dumondas ed incumbensas. La situaziun turistica ed economica actuala duess esser per nus in motiv suffizient da reponderar anc ina giada il project Tavau – Scanvetg.
Grazia al curaschi ed a las visiuns da noss perdavants datti p.ex. la Viafier retica. Bleras ovras da construcziun curaschusas èn vegnidas tituladas l'emprim sco chaussas abstrusas, ed oz na san ins betg s'imaginar ch'ellas n'existissan betg.
Arosa, ils 17 da zercladur 2015
Stiffler (Tavau Plaz), Waidacher, Jenny, Aebli, Blumenthal, Brandenburger, Buchli-Mannhart, Burkhardt, Casanova-Maron (Domat), Casty, Caviezel (Tavau Clavadel), Danuser, Davaz, Engler, Felix (Haldenstein), Felix (Scuol), Giacomelli, Holzinger-Loretz, Jeker, Kasper, Koch (Tumein), Kollegger, Komminoth-Elmer, Lamprecht, Mani-Heldstab, Mathis, Müller, Niggli-Mathis (Grüsch), Noi-Togni, Papa, Pedrini, Salis, Schutz, Stiffler (Cuira), Thomann-Frank, Valär, von Ballmoos, Weber, Bossi, Erhard
Resposta da la regenza
Er la regenza è da l'avis ch'ina colliaziun da viafier directa tranter Tavau ed Arosa permettess d'augmentar la valur da tuttas duas destinaziuns turisticas. En il rom da las lavurs per il rapport "Planisaziun da novas colliaziuns da traffic" (NCT; missiva da la regenza al cussegl grond, carnet nr. 12/2012-2013, p. 751 ss.) è vegnida approfundada ina varianta che collia Tavau Islen cun Litzirüti. Ils custs d'investiziun per il tunnel d'in binari d'ina lunghezza da 7,7 kilometers cun dus lieus da guntgida vegnan stimads a circa 480 milliuns francs, ils custs consecutivs annuals per la viafier a circa 9 milliuns francs. In viadi tranter Arosa e Tavau durass circa 25 minutas. Per l'onn 2030 vegn prognostitgada ina dumonda supplementara da circa 3100 viadis da persunas per di; ina gronda part da quai fiss traffic supplementar da temp liber, en spezial in barat da giasts tranter Arosa e Tavau.
La regenza ha evaluà tut ils projects NCT resp. attribuì quels a trais categorias da prioritad. Il tunnel da la Viafier retica Arosa – Tavau è vegnì classifitgà sco project B che sto vegnir remess per entant e che po eventualmain puspè vegnir persequità pli tard. Ord vista da la tecnica da traffic è il project bain interessant, a las regiuns resp. al chantun sco unitad porta el dentant mo in niz modest (cf. missiva NCT, p. 783 ss.). Tut ils projects èn vegnids analisads areguard lur consequenzas a maun d'in sistem da finamiras unitar (cf. missiva NCT, p. 797 ss.). Quest sistem sa basa sin las finamiras da la confederaziun tenor ils criteris NIBA (indicaturs da duraivladad per projects d'infrastructura da viafier) ch'èn tranter auter vegnidas applitgadas per valitar il "Program da svilup strategic da l'infrastructura da viafier" (PROSSIV 2025). NIBA giuditgescha ils projects areguard lur contribuziun ad in svilup duraivel. Consideradas vegnan finamiras ecologicas, economicas e socialas. Per resguardar ils interess dal chantun èn las finamiras vegnidas extendidas cun l'indicatur monetar "augment da la valurisaziun dal chantun tras il turissem e tras pendularis". Giuditgond il tunnel Arosa – Tavau è resultada, cumpareglià cun auters projects, ina relaziun relativamain nauscha tranter ils custs ed il niz.
Vi da la situaziun dals fatgs n'hai dà naginas midadas essenzialas dapi la terminaziun dal studi. Ord vista da la regenza duai il giudicament da quella giada valair er vinavant.
Tras il project FAIV (finanziaziun ed amplificaziun da l'infrastructura da viafier) hai dà midadas considerablas vi da la finanziaziun e vi da la repartiziun da las incumbensas tranter la confederaziun ed ils chantuns en connex cun l'amplificaziun d'infrastructuras da viafier. La cofinanziaziun directa da projects d'infrastructura tras ils chantuns scroda. Percunter pajan ils chantuns a partir da l'onn 2016 contribuziuns pauschalas en il fond per l'infrastructura da viafier (FIV). Tras quests meds finanzials dal FIV vegnan segirads a lunga vista tant ils custs per la gestiun e per il mantegniment da l'infrastructura existenta sco er ils custs d'amplificaziun. La rolla dals chantuns e da las vischnancas tar la planisaziun da las amplificaziuns da l'infrastructura è perquai restrenschida cumpareglià cun pli baud. Tras quai che las lavurs per il pass d'amplificaziun 2030 han cumenzà gia l'onn 2014, pudess il tunnel Arosa – Tavau vegnir integrà il pli baud en in pass d'amplificaziun 2035.
Per ils motivs menziunads propona la regenza da refusar questa incumbensa. Sche la situaziun descritta duess sa midar considerablamain, sa declera la regenza dentant pronta d'examinar danovamain la realisaziun d'in tunnel da viafier Tavau – Scanvetg en il rom da la planisaziun dal program da svilup strategic da l'infrastructura da viafier (PROSSIV) dal pass d'amplificaziun 2035 e d'eventualmain integrar il tunnel en il program.
2 da settember 2015