Navigation

Inhaltsbereich

Dumonda Thomann-Frank concernent la via dal Güglia ed il sviament dals vitgs dal Surses

Sessiun: 04.12.2019

Ils ultims onns è la via dal Güglia – cun excepziun d'in pèr paucs trajects – vegnida amplifitgada fitg bain. Uschia han las lavurs vi dal traject "Bovas da Rona" cumenzà l'onn 2017 e fin l'onn 2021 duess l'amplificaziun da tut quest traject esser terminada. Er per l'enconuschenta problematica da la stretga a Mulegns po – cun il spustament da la "Chasa alva" – vegnir realisada ina soluziun che stat en l'interess da tuts. Perquai che la via è daventada meglra grazia a las amplificaziuns, è er s'augmentà il traffic, en spezial il traffic pesant. Perquai ch'il traffic passa en il Surses tras tut ils vitgs per lung da l'axa dal Güglia, patescha la populaziun da sias consequenzas. Gia dapi blers onns cuntegna il plan directiv chantunal corridors per sviar ils vitgs Beiva, Cunter e Savognin. En spezial la stretga a Beiva impedescha il traffic e n'è strusch pli supportabla per il lieu turistic.

Cun questa dumonda vulessan nus, ina giada dapli, render attent la regenza a la politica da traffic en connex cun il transit dals vitgs en il Surses.

Nus supplitgain la regenza da respunder las suandantas dumondas:

1.     Co giuditgescha la regenza la capacitad da la via dal Güglia en quai che concerna il transit dals vitgs, spezialmain da Beiva?

2.     Gia l'onn 2007 èn vegnids pretendids projects da sviament concrets per ils vitgs dal Surses. Èn en il fratemp vegnids elavurads projects per sviar ils vitgs dal Surses?

3.     Vegn la regenza a surdar ils projects dals sviaments dals vitgs en il Surses al UVIAS, sche tals èn avant maun?

4.     È la regenza pronta da pretender da la confederaziun ch'ils sviaments dals vitgs dal Surses vegnian realisads bainbaud?

Cuira, ils 4 da december 2019

Thomann-Frank, Crameri, Clalüna, Alig, Berweger, Bettinaglio, Brandenburger, Cavegn, Caviezel (Tavau Clavadel), Danuser, Degiacomi, Ellemunter, Engler, Epp, Flütsch, Giacomelli, Gugelmann, Hardegger, Hartmann-Conrad, Hitz-Rusch, Hohl, Holzinger-Loretz, Kasper, Kienz, Kunz (Fläsch), Kuoni, Lamprecht, Loi, Michael (Donat), Mittner, Natter, Niggli (Samedan), Niggli-Mathis (Grüsch), Noi-Togni, Papa, Paterlini, Pfäffli, Rüegg, Salis, Sax, Schutz, Tanner, Thür-Suter, Ulber, Weber, Weidmann, Widmer (Favugn), Zanetti (Sent)

Resposta da la regenza

En il rom dal nov Conclus da vias naziunalas (NEB) è il traject Tusaun–Casti–Silva­plauna vegnì transfurmà per il 1. da schaner 2020 en la via naziunala N29 e pia transferì en la proprietad ed en la responsabladad da la Confederaziun.

La regenza è conscienta da la situaziun da traffic sin la via dal Güglia e da las con­sequenzas che resultan da quai per la populaziun en il Surses, cunzunt en connex cun il traffic da transit tras ils vitgs. Pervia da quai ha ella – independentamain da l'augment da classa dal traject da via principala Tusaun–Casti–Silvaplauna – giuditgà d'in cuntin ils ultims onns il svilup dal stadi da la via e prendì las mesiras necessarias nua che quai ha stuì esser. D'ina vart han pudì vegnir avert il sviament da Silvaplau­na ils ultims onns e cuntinuà cun l'eliminaziun da la stretga a Mulegns, da l'autra vart èn las lavurs da construcziun vi da las "Bovas da Rona" sco er per remplazzar la punt da Bardella vegnidas prendidas per mauns. Las lavurs correspundentas pon probablamain vegnir terminadas l'onn 2021.

L'evaluaziun dals posts da dumbraziun permanenta dal traffic sin la ruta dal Güglia (Crap Sés, Güglia/La Veduta, Silvaplauna) mussan ch'il volumen da traffic n'è betg creschì signifitgantamain ils ultims var 15 onns. Las dumbraziuns dal traffic corre­spundentas mussan schizunt onns, en ils quals la media dal traffic quotidian (MTQ) è stada pli bassa envers l'onn avant respectiv. L'augment dal traffic tar il post da dum­braziun Güglia/La Veduta importa stgars 5 pertschient per la perioda dals onns 2007 fin 2019. Quai correspunda en media ad in augment annual da main che 0,4 per­tschient.

Tar la dumonda 1: Pervia dal volumen da traffic relativamain constant giuditgescha la Regenza la capacitad da la via dal Güglia – er en quai che reguarda il traffic da tran­sit tras il vitg – vinavant sco suffizienta. En il rom da las pussaivladads existentas restan il meglierament da la qualitad da viver en ils vitgs pertutgads sco er l'augment da la segirezza per las participantas ed ils participants dal traffic e per il traffic betg motorisà però anc adina ina finamira da la Regenza.

Tar la dumonda 2: Las prioritads d'engrondiment da la via dal Güglia eran ils onns passads en spezial sin quels trajects da la via existenta che na bastavan betg a las pretensiuns odiernas. Correspundentamain n'èn oz avant maun – malgrà scleriments preliminars e studis da variantas ch'èn vegnids fatgs per part – nagins projects da sviament concrets, per ils quals pudess vegnir concedida bainbaud in'approvaziun dal project.

Tar la dumonda 3: L'Uffizi da construcziun bassa dal Grischun ha surdà a l'Uffizi federal da vias UVIAS ils documents avant maun (scleriments preliminars, studis e.u.v.) dals sviaments dals vitgs Cunter/Savognin, Mulegns e Beiva. Il UVIAS maina ussa quests projects en la glista dals sviaments pussaivels per trajects NEB ch'èn però suttamess a la priorisaziun ed a la finanziaziun tras la Confederaziun.

Tar la dumonda 4: La Regenza vegn a persequitar er en l'avegnir attentamain il svi­lup dal traffic sin la via dal Güglia ed en spezial en ils vitgs dal Surses ed a s'enga­schar cun ils meds che stattan a disposiziun per ils interess da la populaziun pertu­tgada en il chantun Grischun.

6 da mars 2020