Navigation

Inhaltsbereich

Incumbensa Widmer (Favugn) concernent la flexibilisaziun dal dumber da lecziuns per mez di sin il stgalim primar

Sessiun: 12.02.2020

En l'art. 26 al. 2 da la Lescha davart las scolas popularas dal chantun Grischun vegnan regladas las uras da bloc sco suonda: "Sin il stgalim primar importan las uras da bloc almain quatter lecziuns consecutivas." En l'art. 23 al. 1 da l'Ordinaziun tar la Lescha da scola vegn precisà: "Mintga mez di èn per regla admessas sin il stgalim primar maximalmain 4 lecziuns." Plinavant vegn fixà en l'art. 24 al. 1 da la medema ordinaziun: "Durant las uras da bloc ha per regla lieu l'instrucziun. Ultra da quai pon las uras da bloc er vegnir duvradas per purschidas che han in connex cun l'instrucziun, sco l'agid per far lezias e pensums, la scolaziun musicala da basa u lecziuns da sport supplementaras."

Bleras vischnancas da scola en il chantun Grischun èn situadas en territoris periferics e cumpiglian plirs lieus da scola. Il manaschi da scola vegn, nua che quai è pussaivel, adattà a l'urari uffizial da l'auto da posta per evitar augments dals custs da vart da la vischnanca per transports da scola privats.

Sco exempel serva la suandanta illustraziun fictiva. In pèr uffants dovran in transport (auto da posta normal) da lur lieu da domicil al lieu da scola. Auters uffants na dovran betg quai, perquai che lur chasa da scola sa chatta en lur lieu da domicil.

-

Per quest lieu da scola dessi la pussaivladad d'avair l'avantmezdi fin ad 1 lecziun dapli instrucziun.

L'art. 23 al. 1 da l'Ordinaziun tar la Lescha da scola na permetta per regla betg da porscher dapli che 4 lecziuns instrucziun per mez di sin il stgalim primar. Questas lecziuns che na vegnan betg dadas l'avantmezdi ston vegnir cumpensadas il suentermezdi. Dis da scola fitg lungs èn la consequenza, en spezial per ils uffants che dovran in transport da scola (traffic public [TP]). Actualmain èsi mo pussaivel d'endrizzar in'ura da recepziun u in'ura per far lavurs da scola (pensums, lezias) avant u suenter il temp d'instrucziun sco tal da 4 lecziuns l'avantmezdi. Quest temp na vala però betg sco temp d'instrucziun. Tras quai vegnan ils dis da scola prolungads artifizialmain – il transport vegn er anc vitiers. Ils uffants che dovran supplementarmain in transport, n'han da quai nagin profit areguard il temp.

Regulaziuns armonisadas davart il cuntegn da las cumpetenzas d'instrucziun che ston vegnir intermediadas (PI 21) e davart la durada da las lecziuns èn raschunaivlas sin plaun chantunal e naziunal, per che tut ils uffants possian ademplir sche pussaivel las medemas premissas.

Regulaziuns unitaras per la dumonda, cura precis che l'instrucziun stoppia avair lieu, negligeschan però relaziuns geograficas e pussaivladads per territoris periferics. Da gronds dischavantatgs èn pertutgadas oz regiuns perifericas cun plirs lieus da scola che ston adattar lur temps d'instrucziun uschè bain sco pussaivel al med da transport public (auto da posta normal uffizial). La plivalur per uffants (main scola il suentermezdi e dis da scola pli curts) e per la vischnanca (nagin augment dals custs pervia da transports da scola privats e pervia da lecziuns d'assistenza [uras da recepziun]), che vegn stgaffida cun la pussaivladad da concepir en moda pli flexibla ils temps d'instrucziun, è incontestabla.

Las sutsegnadras ed ils sutsegnaders pretendan:

I duai vegnir tegnì quint da las premissas structuralas e geograficas e da las pussaivladads da las scolas en territoris da muntogna. La regulaziun concernent l'admissibladad dal dumber da lecziuns per mez di da scola sin il stgalim primar duai vegnir flexibilisada e las vischnancas da scola duain survegnir la suveranitad per concepir sezzas l'urari da l'instrucziun – resguardond las relaziuns perifericas.

Cuira, ils 12 da favrer 2020

Widmer (Favugn), Flütsch (Spleia), Lamprecht, Berther, Berweger, Brunold, Buchli-Mannhart, Caluori, Cantieni, Casty, Cavegn, Clalüna, Crameri, Della Cà, Deplazes (Rabius), Derungs, Dürler, Ellemunter, Epp, Favre Accola, Felix, Gartmann-Albin, Giacomelli, Grass, Gugelmann, Hartmann-Conrad, Hitz-Rusch, Hofmann, Hohl, Jenny, Jochum, Kienz, Kohler, Kuoni, Loepfe, Loi, Maissen, Märchy-Caduff, Müller (Susch), Müller (Favugn), Natter, Niggli-Mathis (Grüsch), Paterlini, Preisig, Rettich, Ruckstuhl, Rüegg, Sax, Schmid, Schneider, Schutz, Thomann-Frank, von Ballmoos, Wellig, Widmer-Spreiter (Cuira), Zanetti (Sent), Costa, Stieger, Ulber Daniel

Resposta da la regenza

En l'Ordinaziun tar la Lescha da scola (Ordinaziun da scola; DG 421.010) èsi fixà en l'art. 23 al. 1 ch'i èn admissiblas per regla maximalmain 4 lecziuns per mez di sin il stgalim primar. La finamira da questa directiva è quella d'accordar l'instrucziun en moda optimala cun ils basegns e cun las capacitads da las scolaras e dals scolars (SeS) dal stgalim primar e da cuntanscher ina buna ritmisaziun dal di da scola resp. da l'emna da scola. Las 5 lecziuns per mez di pretendidas en l'incumbensa stattan en cuntradicziun cun quests aspects pedagogics e didactics. Ils ultims onns èn ultra da quai cumparids studis che crititgeschan in cumenzament da scola la damaun marvegl, perquai che la prontezza da recepir e las capacitads dals SeS èn manglu­sas (p.ex. prof. dr. Lemola, Universitad da Basilea). Ma er per las persunas d'instruc­ziun resultass ina chargia da lavur betg equilibrada, perquai ch'ellas avessan savens liber il suentermezdi.

Per 4 lecziuns per mez di sin il stgalim primar vegn duvrà – inclusiv pausas – in temp total da circa 210 minutas. Quai correspunda a la durada d'in mez di en la scolina da circa 210 minutas temp d'instrucziun e temp da recepziun. In'extensiun dal temp d'in­strucziun sin 5 lecziuns per mez di aboliss questa parallelisaziun dal temp d'instruc­ziun en scolina e sin il stgalim primar e chaschunass novas difficultads organisatori­cas per tut ils lieus dal stgalim primar che mainan er ina scolina.

In urari da 5 lecziuns per mez di chaschuna in temp total inclusiv las pausas da circa 260 minutas. Per questa durada stuess l'instrucziun cumenzar il pli tard a las 7.30 e finiss pir a las 12.00. Sch'ins considerescha anc la lunghezza da la via da scola en cas da lieus periferics, poi vegnir constatà ch'ils SeS stuessan bandunar lur dachasa gia a las 7.00 u schizunt pli baud e fissan pir vers las 12.30 puspè da return. L'avantmezdi daventass fitg lung per ils SeS, e quai pudess chaschunar ina sur­chargia. Il temp da mezdi cuminaivel cun la famiglia vegniss restrenschì.

Pervia dal dumber da lecziuns obligatoricas en las singulas classas dal stgalim pri­mar resultassan il suentermezdi blocs da mo 1 lecziun u da 2 lecziuns, e quai cha­schunass alura in temp da tgira e da surveglianza supplementar cun custs corre­spun­dents. L'emprima classa primara avess ultra da quai adina liber il suentermezdi.

Las tavlas da lecziuns chantunalas èn vegnidas relaschadas da la Regenza. Per ils purtaders da scola furman ellas la basa per concepir ils uraris dals SeS e da las persunas d'instrucziun. Il spustament da la cumpetenza da far las tavlas da lecziuns dal chantun sin ils singuls purtaders da scola sco ch'i vegn proponì en l'incumbensa, na po betg succeder, perquai ch'i ston vegnir previssas las medemas dotaziuns en ils singuls roms per cuntanscher las cumpetenzas tenor il Plan d'instrucziun 21. Mo uschia poi vegnir segirà ch'ina qualitad da scola cumparegliabla po vegnir garantida en tut las vischnancas dal chantun per realisar l'egualitad da las schanzas per tut ils SeS.

La Lescha davart las scolas popularas dal chantun Grischun (Lescha da scola; DG 421.000) e l'Ordinaziun da scola fan prescripziuns generalas. Ma ellas porschan als purtaders da scola la pussaivladad d'inoltrar dumondas per permissiuns excep­ziunalas a l'Uffizi per la scola populara ed il sport en situaziuns spezialas. La cum­petenza per permetter talas excepziuns sto restar en mintga cas tar il chantun. Gra­zia a questa pratica cumprovada èn vegnidas dumandadas mo paucas permissiuns excepziunalas en il passà, en emprima lingia da scolas pitschnas. En collavuraziun tranter l'Inspecturat da scola ed il purtader da scola ha pudì vegnir concedida per regla ina permissiun che tegna quint dal lieu e da la situaziun.

Sa basond sin questas explicaziuns propona la Regenza al Cussegl grond da refusar questa incumbensa.

23 d'avrigl 2020