Navigation

Inhaltsbereich

Incumbensa da la fracziun da l'Allianza dal Center concernent «Per in adempliment effizient da las incumbensas statalas, che resguarda ils basegns dals burgais!» (emprim sutsegnader Crameri)

Sessiun: 16.02.2022

Durant ils ultims onns han las structuras dal chantun Grischun survegnì ina concepziun dal tuttafatg nova: Il plaun d'amez che sa cumponiva pli baud da las corporaziuns regiunalas, dals districts e dals circuls, è vegnì resumà – tenor il princip da bottom-down – ad in unic plaun, las regiuns. Ellas han cumenzà cun lur lavur il 1. da schaner 2016. En connex cun la refurma da vischnancas è sa cumprovada la strategia da bottom-up, sco ch'ins po leger en la missiva da la Regenza al Cussegl grond, carnet nr. 8/2018-2019, 11. Rapport davart las structuras communalas. Durant ils ultims 15 onns è il dumber da vischnancas sa reducì da 206 l'onn 2007 a 101 l'onn 2022. Resultadas èn vischnancas fermas ed efficazias ch'èn ablas d'ademplir lur incumbensas svelt, en moda effizienta sco er resguardond ils basegns dals burgais. Suenter che la refurma da vischnancas (formala) è progredida bain en il chantun Grischun, èsi uras d'examinar, tge incumbensas publicas che pon vegnir transferidas (enavos) dal chantun a las vischnancas, per che quellas hajan lur libertad da decider e lur autonomia en lur territori (refurma da vischnancas materiala). En il senn dal princip da subsidiaritad ch'è francà en la Constituziun federala (art. 5a Cst.) e che vala per tut ils plauns statals, duain però instanzas statalas surordinadas surpigliar incumbensas mo, sch'ellas èn ablas d'ademplir talas meglier che las corporaziuns territorialas pli engiu en l'ierarchia. Da l'autonomia communala ch'è tradiziunalmain gronda en il chantun Grischun stoi vegnir tegnì quint commensuradamain, e las vischnancas ston pudair mantegnair resp. survegnir enavos incumbensas materialas che han ina libertad da decider relativamain considerabla e ch'ellas pon ademplir en moda pli effizienta, resguardond meglier ils basegns dals burgais e cun l'autonomia respectiva. Per l'ina stoi vegnir distinguì tranter novas incumbensas statalas ed incumbensas publicas che vegnan ademplidas gia oz dal stadi. Ma er areguard questas incumbensas ston vegnir eliminads ils obstachels legals nunnecessaris ch'èn ina chargia per l'autonomia communala.

Sut quest aspect incumbenseschan las sutsegnadras ed ils sutsegnaders la Regenza:

a)     da suttametter al Cussegl grond in rapport ed ina proposta che cuntegna tge incumbensas materialas che han ina libertad da decider relativamain considerabla, che vegnan ademplidas oz dal chantun e che pudessan vegnir ademplidas meglier u almain uschè bain da las vischnancas resp. tgeninas da questas incumbensas che pudessan vegnir transferidas (enavos) a las vischnancas.

b)    da mussar – en il rom dal rapport e da la proposta tenor la lit. a – tgeninas disposiziuns giuridicas da singuls secturs ch'impedeschan da sviluppar cumplainamain l'autonomia communala.

c)     da mussar – en la missiva da la Regenza al parlament – tge consequenzas ch'il project ha per las vischnancas, e co che la regulaziun proponida sa cumporta cun il princip da subsidiaritad e cun il federalissem (cf. er art. 141 al. 2 lit. ater ed f da la Lescha federala dal parlament).

d)    d'integrar las regiuns en las consideraziuns che vegnan fatgas per ademplir las incumbensas tenor las lit. a fin c.

Cuira, ils 16 da favrer 2022

Crameri, Maissen, Bettinaglio, Berther, Bondolfi, Brunold, Buchli-Mannhart, Caluori, Casty, Casutt-Derungs, Clalüna, Danuser, Della Vedova, Deplazes (Rabius), Derungs, Ellemunter, Epp, Fasani, Felix, Florin-Caluori, Föhn, Geisseler, Hardegger, Kohler, Kunfermann, Lamprecht, Loepfe, Michael (Donat), Müller (Susch), Niggli-Mathis (Grüsch), Paterlini, Sax, Schmid, Schneider, Tanner, Tomaschett (Breil), Ulber, Widmer (Favugn), Widmer-Spreiter (Cuira), Zanetti (Landquart), Bürgi-Büchel, Collenberg, Gujan-Dönier

Resposta da la regenza

Pertutgant l'intenziun da princip sajetta l'incumbensa cunter chastels sblundregiads tar la Regenza. La Regenza ha realisà ils onns passads differents projects da structura che rinforzan il federalissem en general ed il princip da subsidiaritad en spezial. L'incumbensa pertutga in aspect central da la «gulivaziun da finanzas en il senn pli vast», dal qual fan part la structura statala, la repartiziun e la finanziaziun da las incumbensas. Quests elements influenzeschan, cundiziuneschan e cumpletteschan in l'auter. Correspundentamain è vegnì stgaffì, ils 28 da november 2004, l'art. 5a da la Constituziun federala (Cst.), quai en il rom da la Nova concepziun da la gulivaziun da finanzas e da la repartiziun da las incumbensas tranter la Confederaziun ed ils chantuns (NGF).

En il rom da la NGF tranter il chantun e las vischnancas (NGF grischuna) ha la Regenza proponì ina reorganisaziun cumplessiva da las incumbensas (missiva carnet nr. 20/2008-2009). Da las 130 incumbensas cuminaivlas ch'èn vegnidas examinadas quella giada, avess quasi la mesadad pudì vegnir detretschada. Ils 7 da mars 2010 è il project vegnì refusà stgarsamain en la votaziun da referendum. Il project successiv, la Refurma da la GF (missiva carnet nr. 7/2013-2014), ha puspè examinà detagliadamain la repartiziun e la finanziaziun da las incumbensas. Per l'attribuziun da las incumbensas è stà decisiv – ultra dal princip da l'equivalenza fiscala – er il princip da subsidiaritad.

En l'Examinaziun currenta da las incumbensas e da las prestaziuns (EIP) ha la Regenza fixà – en il concept da basa dals 6 d'avrigl 2021 – ch'i stoppia vegnir examinà da transferir a las vischnancas las incumbensas che vegnan ademplidas sin plaun chantunal, dentant senza las indossar grevezzas finanzialas. Il concept detaglià ch'è vegnì deliberà ils 21 da settember 2021, prescriva ch'incumbensas duain vegnir attribuidas ad in auter plaun statal (p.ex. a las vischnancas), sch'i resultan augments d'effizienza da quai.

Dapi onns persequitescha la Regenza consequentamain la strategia «Fermas vischnancas – in ferm chantun». La Refurma da vischnancas che duai vegnir realisada tenor il princip da bottom-up, ha gì success fin ussa. Quest process n'è, betg sco sugerì en l'incumbensa, però insumma betg terminà en il Grischun. Cumbain ch'il dumber da vischnancas è sa smesà entaifer dus decennis, è la cuntrada da vischnancas dal Grischun anc adina fitg eterogena e la grondezza media d'ina vischnanca tenor il dumber d'abitants è anc adina pitschna en cumparegliaziun interchantunala.

Tar las dumondas a e b: Las vischnancas pon giuditgar sezzas il meglier, tgeninas incumbensas ch'ellas vulan surpigliar e tgeninas betg (applicaziun dal princip da subsidiaritad). La proposta pretendida pudess pia vegnir realisada mo integrond substanzialmain, q.v.d. cunzunt persunalmain las vischnancas. L'installaziun d'ina organisaziun da project che fiss occupada pariteticamain da represchentants communals e chantunals, resguardond l'eterogenitad communala, fiss obligatorica. Ins po sa dumandar, sche sut quest aspect ed uschè curt suenter la Refurma cumplessiva da la GF che ha mo gist gì lieu, duai vegnir lantschà in nov project pli grond e segiramain da plirs onns. En il rom da la EIP vegn la Regenza plinavant – cun la finamira d'obtegnair in adempliment da las incumbensas statalas pli effizient – ad examinar da transferir incumbensas dal plaun chantunal al plaun communal senza chaschunar custs supplementars, sco quai ch'ella ha prendì en vista en il Cussegl grond.

Tar la dumonda c: Sco consequenza da l'incumbensa Albertin concernent il rinforzament da las vischnancas, ch'è vegnida acceptada en la sessiun d'avust 2015, mussa la Regenza gia en il rom d'ina consultaziun e pli tard er en las missivas al Cussegl grond, tge consequenzas ch'in project ha per las incumbensas, per las cumpetenzas e per las finanzas da las vischnancas. Ils giavischs da la dumonda c) èn dapi lura vegnids ademplids cuntinuadamain.

Tar la dumonda d: En il rom da la Refurma dal territori han il pievel ed il parlament acceptà la concepziun vertenta da las regiuns. Tenor questa concepziun pon las vischnancas surdar independentamain incumbensas communalas ad ina regiun. In giudicament dal chantun na para betg cunvegnent a la Regenza e cuntrafaschess plinavant a l'intenziun da l'incumbensa qua avant maun, particularmain da rinforzar las vischnancas.

La Regenza propona al Cussegl grond da refusar questa incumbensa. 

22 d'avrigl 2022