Cuntrari a l'emprima etappa dal Plan d'acziun «Green Deal per il Grischun» (AGD) è la segunda etappa en emprima lingia in project da legislaziun. La finamira da quest project è da stgaffir las basas legalas per pudair realisar resp. promover novas mesiras en il rom dal AGD. L'element central en quest connex è il Fond per il clima sco er sias funtaunas da finanziaziun. Cun agid dals pachets da mesiras per la segunda etappa, ch'èn vegnids skizzads en la missiva tar l'emprima etappa (carnet nr. 4/2021–2022), vegnan examinadas las adattaziuns giuridicas che ston vegnir proponidas. Ultra da quai vegni constatà, sche talas pon ademplir lur intent. Las directivas legislativas defineschan differents pass ch'ins sto percurrer, fin ch'ina regulaziun entra en vigur: davent da l'examinaziun da la necessitad sur differents pass da la garanzia da la qualitad, la valitaziun da las consequenzas da la regulaziun fin a l'elavuraziun sco tala da las disposiziuns legalas e da las ordinaziuns da la Regenza. I suondan alura la consultaziun, l'evaluaziun da tala, eventualmain in'adattaziun dal project, l'elavuraziun da la missiva, las (pre-)deliberaziuns parlamentaras ed eventualmain la votaziun dal pievel. En la sessiun d'october ha il Cussegl grond pretendì d'examinar ulteriuras funtaunas da finanziaziun e d'elavurar variantas da finanziaziun priorisadas. Quai dovra supplementarmain temp e resursas persunalas. Ultra da quai pertutga il project da legislaziun da la segunda etappa plirs departaments e var ina dunsaina uffizis. Gia quai premetta de facto ina tscherta cumplexitad ed in temp d'elavuraziun minimal da la fatschenta. Las dumondas che la PVL ha tschentà a la Regenza pon pia vegnir respundidas sco suonda:
Tar la dumonda 1:Il AGD è in project da legislaziun fitg voluminus ch'è concepì a lunga vista e che pretenda l'elavuraziun d'in grond dumber da mesiras e da funtaunas da finanziaziun. Ils scleriments respectivs ch'èn necessaris dovran correspundentamain bler temp ed èn fitg cumplexs tut tenor il tema e tut tenor la mesira respectivamain la funtauna da finanziaziun. Ultra da quai ston quests scleriments vegnir coordinads sin plaun interdepartamental ed accordads in cun l'auter areguard il temp. Per elavurar l'urari en la missiva tar l'emprima etappa dal AGD han ins quintà cun temps d'elavuraziun minimals ideals. Las experientschas actualas mussan dentant, ch'il grond basegn da coordinaziun entaifer l'administraziun ed er differents auters projects currents, gist er en connex cun la smanatscha d'avair memia pauca energia, prolungheschan il temp d'elavuraziun.
Tar la dumonda 2: Ins po far quint che la consultaziun tar la segunda etappa possia vegnir lantschada la segunda mesadad dal 2023. Fin la fin da l'onn 2024 duess la missiva vegnir deliberada, uschia che las tractativas en il Cussegl grond pudessan avair lieu l'emprima mesadad dal 2025. Sin basa da quest urari pudess almain in emprim pachet da las revisiuns da leschas vegnir mess en vigur per il 1. da schaner 2026.
Tar la dumonda 3: Per pudair avanzar pli svelt cun tschertas mesiras, pudess la segunda etappa vegnir dividida en ina «etappa IIa» ed en etappas consecutivas. L'etappa IIa cumpigliass alura per exempel – ultra da la creaziun dal Fond per il clima – mo quellas mesiras respectivamain mo quellas midadas da lescha, che ston vegnir consideradas sco relativamain pauc dispitaivlas e sco gia definidas cleramain. Sche necessari pudessan emprimas mesiras vegnir promovidas transitoricamain er sur in ulteriur credit d'impegn, fin ch'il Fond per il clima è creà. In credit d'impegn supplementar pudess daventar necessari er, sche l'interess per ils programs da promoziun da l'emprima etappa fiss uschè grond, ch'i duvrass meds finanzials supplementars, avant ch'il Fond per il clima fiss creà.
Tar la dumonda 4: Il pli tard cura ch'ella ha ils resultats da la consultaziun vegn la Regenza a decider davart in'eventuala divisiun da la segunda etappa ed a concepir la missiva correspundenta al Cussegl grond. Eventualmain s'impona l'etappaziun dal project er gia pli baud.
14 d'october 2022