Navigation

Inhaltsbereich

Dumonda Cortesi concernent la duplicaziun da la quantitad da producziun da l'ovra idraulica Plessur

Sessiun: 15.02.2023

Ils 2 da favrer 2023 ha il cussegl communal da Cuira surdà a la suprastanza da la citad unanimamain l'incumbensa «Augment da la quantitad da producziun da l'ovra electrica Cuira-Sand» en il senn da las consideraziuns.

Qua tras vegn la suprastanza da la citad incumbensada da promover – ensemen cun las vischnancas partenarias e cun il consorzi da project – cun gronda prioritad il «Project da forza idraulica Plessur».

Elements centrals dal project èn l'amplificaziun da las ovras idraulicas en il Scanvetg cun in nov stgalim d'ovra electrica «Litzi­rüti-Pradapunt» e la sanaziun da la «ovra electrica Lüen». Quai permetta da dublegiar la quantitad da producziun actuala en la Plessur sin ca. 185 uras gigawatt per onn (quintà inclusiv ils 55 GWh/onn en l'ovra electrica Cuira-Sand).

La suprastanza da la citad da Cuira sustegna quest proceder, è dentant da l'avis ch'i saja necessari da stgaffir tant sin plaun naziunal sco er sin plaun chantunal las cundiziuns generalas necessarias, per che quest project possia vegnir realisà svelt.

Dumondas a la Regenza:

  1. È er la Regenza da l'opiniun ch'il project da l'ovra idraulica Plessur – che purtass al chantun in augment considerabel da la quantitad d'energia electrica or da la forza idraulica – duai vegnir promovì cun gronda prioritad?
  2. È la Regenza pronta da sustegnair quest project e da stgaffir las cundiziuns generalas necessarias?
  3. Sche gea: co vul la Regenza proceder en quest reguard e tge mesiras prevesa ella?

Cuira, ils 15 da favrer 2023

Cortesi, Schneider, Kappeler, Adank, Altmann, Bachmann, Biert, Bischof, Brandenburger, Bundi, Butzerin, Candrian, Casutt, Censi, Collenberg, Danuser (Cuira), Degiacomi, Della Cà, Dietrich, Dürler, Favre Accola, Gartmann-Albin, Hug, Jochum, Koch, Krättli, Luzio, Maissen, Menghini-Inauen, Morf, Oesch, Rageth, Roffler, Salis, Schutz, Spagnolatti, Stiffler, Thür-Suter, Walser, Weber

Resposta da la regenza

Dapi il zercladur 2014 examinescha il consorzi da project «Forza idraulica Plessur» (Axpo SA, IBC Energie Wasser Cuira sco er Arosa Energie) l'optimaziun e l'extensiun da la forza idraulica en il Scanvetg. Quest consorzi da project s'occupa tranter auter da la realisaziun d'in nov stgalim d'ovra electrica «Litzirüti-Pradapunt». La realisaziun da quest nov stgalim d'ovra electrica duai purtar ina producziun da 42 uras gigawatt (GWh). Ultra da quai pussibilitescha quest stgalim d'ovra electrica da sanar las im­missiuns actualas tras midadas da la deflussiun da l'aua en l'ovra electrica Litzirüti ch'è situada survart. Pervia da la situaziun economica difficila (situaziun dal martgà d'electricitad e contribuziuns d'investiziun da la Confederaziun) han las partidas con­cludì l'onn 2017 d'interrumper il project. Perquai che questas cundiziuns generalas èn puspè sa meglieradas, èn las lavurs per il project vegnidas reprendidas la fin da l'onn 2022.

Tar la dumonda 1: L'optimaziun e l'extensiun da la forza idraulica da la Plessur ve­gnan beneventadas e sustegnidas da la Regenza. Quest project correspunda a las finamiras chantunalas dal Rapport d'electricitad 2012 en quai che reguarda l'exten­siun da la forza idraulica (cf. missiva carnet nr. 6/2012–2013, p. 389). Cun in'aspec­tativa da producziun da 42 GWh, da quai 12 GWh durant il mez onn d'enviern, pu­dess la producziun actuala da la forza idraulica en il Scanvetg pia vegnir augmen­tada considerablamain da var 130 GWh sin 172 GWh. Tras la realisaziun da quest nov stgalim d'ovra electrica vegniss la Plessur utilisada nuninterruttamain entaifer ina differenza d'autezza da var 1000 m tranter la tschiffada da la serra d'accumulaziun «Isel» ad Arosa fin a la restituziun da l'aua da l'ovra electrica «Sand» a Cuira.

Tar la dumonda 2: Ils posts spezialisads cumpetents dal chantun han accumpagnà las lavurs dal consorzi da project. Questa collavuraziun ha gì la finamira d'elavurar soluziuns approvablas. La Regenza è vinavant pronta da laschar accumpagnar e sustegnair ils posts chantunals spezialisads cumpetents il consorzi da project en il rom da las activitads d'enfin ussa. Sin il stgalim dal chantun è il Plan directiv chantu­nal vegnì revedì essenzialmain ils onns passads en il sectur da l'energia (PDChant-E). Questa revisiun è vegnida fatga en cooperaziun cun las pli impurtantas parts invol­vidas (tranter auter las societads d'ovras electricas e las federaziuns da l'ambient). L'avrigl 2023 è il sboz dal plan directiv vegnì suttamess ad ina vasta publicitad per la consultaziun. Il project menziunà en questa dumonda, pia la construcziun d'in nov stgalim d'ovra electrica «Litzirüti-Pradapunt», è previs en il PDChant-E (status: pre­orientaziun).

Tar la dumonda 3: Ultra dals fatgs menziunads – vul dir il sustegn dal consorzi da project tras ils posts chantunals spezialisads cumpetents e l'integraziun en il Plan di­rectiv chantunal – s'engascha la Regenza er per ina meglieraziun da las cundiziuns generalas per la forza idraulica, quai en il rom da las debattas parlamentaras sin plaun federal en connex cun la tractativa davart il relasch general d'energia (adatta­ziun da la Lescha d'energia [LEn] e da la Lescha davart il provediment d'electricitad [LPrEl]). 

2 da matg 2023