Navigation

Inhaltsbereich

Dumonda Perl concernent la cuvrida dals custs per colliar implants fotovoltaics relevants per il sistem cun la rait

Sessiun: 15.02.2023

Per cuntanscher las finamiras dal clima e per garantir la segirezza dal provediment ha la Confederaziun en mira in grond augment dal dumber d'implants fotovoltaics. L'augment duai en spezial vegnir fatg là, nua ch'ils stabiliments èn relevants per il sistem, pia nua ch'els contribueschan considerablamain a la producziun d'electricitad durant l'enviern. Per il Grischun èn questas stentas ina gronda schanza per sviluppar ultra da la forza idraulica ina segunda pitga en la producziun d'electricitad. Il zercladur 2022 ha il Cussegl grond surdà correspundentamain ina incumbensa concernent in'offensiva solara per il Grischun.

Ils gronds custs per colliar implants fotovoltaics ordaifer la zona da construcziun cun la rait s'opponan a las stentas da la Confederaziun e dals chantun. Quai pertutga en emprima lingia stabiliments pli gronds sin edifizis agriculs, che furneschan ina quantitad d'electricitad che surpassa la capacitad da l'infrastructura da la rait existenta. En tals cas desistan las puras ed ils purs pertutgads per regla da realisar in stabiliment pli grond, schebain che gist ils edifizis agriculs fissan savens situads optimalmain per promover la producziun d'electricitad decentrala durant l'enviern.

Sche la Societad naziunala da raits d'electricitad cuvriss ils custs per colliar stabiliments correspundents cun la rait, fiss quai ina schanza economica e da la politica d'energia per ils territoris alpins tut en tut e per l'agricultura da muntogna en spezial.

Las sutsegnadras ed ils sutsegnaders fan perquai las suandantas dumondas:

  1. Co stima la Regenza las schanzas respectivas per il Grischun ed en spezial per la l'agricultura da muntogna?
  2. Tge pussaivladads d'agir areguard la cuvrida dals custs da colliaziun a la rait existan sin plaun chantunal?
  3. È la Regenza pronta da s'engaschar sin plaun naziunal, per exempel en la CDEn, per ch'ils custs da colliaziun a la rait vegnian cuvrids per implants fotovoltaics relevants per il sistem concernent la producziun d'electricitad durant l'enviern?

Cuira, ils 15 da favrer 2023

Perl, Kappeler, Gredig, Atanes, Bachmann, Bardill, Baselgia, Bavier, Biert, Bischof, Bisculm Jörg, Bleuler-Jenny, Cahenzli-Philipp (Vaz Sut), Censi, Danuser (Cuira), Degiacomi, Della Cà, Dietrich, Gansner, Gartmann-Albin, Hoch, Hofmann, Lamprecht, Loi, Mazzetta, Messmer-Blumer, Müller, Nicolay, Oesch, Pajic, Preisig, Rageth, Rettich, Roffler, Rusch Nigg, Rutishauser, Saratz Cazin, Tanner, von Ballmoos, Walser, Zaugg-Ettlin

Resposta da la regenza

Il cunfin per ils implants fotovoltaics «relevants per il sistem» menziunads en questa dumonda (uschenumnads implants fotovoltaics d'interess naziunal) sa chatta tar ina producziun annuala minimala da 10 uras gigawatt (GWh) (cf. art. 71a al. 2 lit. a da la Lescha d'energia [LEn; CS 730.0]). Tals implants dovran ina surfatscha d'almain set plazzas da ballape (50 000 m2) en in lieu adattà. En quest connex sa tracti da fitg gronds implants che n'èn betg cumparegliabels cun implants fotovoltaics pli gronds sin edifizis agriculs.

Tar la dumonda 1: Il potenzial da la producziun d'electricitad sin edifizis agriculs è in­contestà. Tar ina colliaziun d'edifizis agriculs cun la rait sto la persuna che survegn la colliaziun cun la rait pajar custs unics per la colliaziun cun la rait sco er ils custs da la rait. Questa contribuziun per la colliaziun cun la rait correspunda als custs per con­stru­ir la colliaziun cun la rait fin al punct da colliaziun. Actualmain èn circa 12 per­tschient da las surfatschas da tetg adattadas sin edifizis agriculs en il chantun Gri­schun equipadas cun implants fotovoltaics. Sin ulteriurs 62 pertschient da las sur­fatschas da tetg adattadas pudess in tal implant vegnir realisà senza gronda lavur resp. cun paucs custs per la colliaziun cun la rait. Las surfatschas da tetg adattadas restantas èn dapli che 400 m davent d'ina staziun da transfurmaziun. Ina colliaziun da quests lieus cun la rait è greva da giustifitgar areguard ils custs.

Pli impurtant ch'ils custs per la colliaziun cun la rait è il rinforzament da la rait che daventa necessari en cas singuls per construir in implant fotovoltaic. Perquai ch'ils rinforzaments da la rait fan part dals servetschs da sistem da la Societad naziunala da raits d'electricitad Swissgrid, èn quels gia oz restituabels, sch'els vegnan appro­vads da la ElCom.

Tar las dumondas 2 e 3: Sch'ins considerescha las surfatschas da tetg agriculas che stattan a disposiziun per la producziun fotovoltaica sut ils aspects rentabilitad e ne­ces­­si­tad, n'èsi betg necessari che la Confederaziun resp. il chantun cuvrian ils custs per la colliaziun cun la rait. Sco gia explitgà en la resposta a la dumonda 1, èn avant maun avunda surfatschas da tetg libras en las zonas agriculas che pon vegnir fatgas accessiblas cun bass custs la colliaziun cun la rait. Ils implants correspundents pon vegnir gestiunads economicamain cun las pussaivladads da promoziun che stattan a disposiziun oz (l'uschenumnada indemnisaziun unica da la Confederaziun tenor l'art. 25 LEn ed eventualmain la promoziun d'electricitad durant l'enviern tenor l'art. 23a da la Lescha d'energia dal chantun Grischun [LEG; DG 820.200]). 

26 d'avrigl 2023