Navigation

Inhaltsbereich

Postulat concernent l'augment da las limitas en las proceduras da submissiun

Sessiun: 27.11.2002
Il 1. da fanadur 1998 è entrada en vigur la lescha chantunala da submissiun. Quella è sa cumprovada en general.
Gia a chaschun da la debatta en il cussegl grond eran contestadas las limitas per las differentas proceduras da submissiun. La proposta Widmer da lezza giada da fixar las limitas per la procedura averta correspundentamain a la recumandaziun da la conferenza dals directurs da construcziun e da la protecziun da l'ambient e da las augmentar consequentamain per incaricas da construcziun sin fr. 500000 e per incaricas da prestaziun da servetschs e da furniziun sin fr. 250000 è vegnida refusada cun ina relativamain pitschna differenza da las vuschs 42 : 64. Lezza giada n'eri betg enconuschent tar tge valurs ch'ils chantuns vischins vegnissan a fixar lur limitas. En il fratemp han tranter auter fixà ils chantuns da Glaruna, Son Gagl e Turitg questas valurs correspundentamain a la proposta Widmer. Las limitas per la procedura directa èn per part er vegnidas fixadas sin ina summa pli auta. Per la procedura directa en connex cun ovras da construcziun vala en il chantun Glaruna la summa da fr. 250000 e per prestaziuns da furniziun e da servetsch da fr. 100000 (en il Grischun fr. 50000 e fr. 25000 resp. fr. 50000) sco limita maximala.
Dapi l'entrada en vigur da la lescha da submissiun il 1. da fanadur 1998 è la libertad d'agir dals incumbensaders vegnida restrenschida anc pli ferm tras las dretgiras.
Las postulantas ed ils postulants èn da l'avis che la libertad d'agir legala per las limitas en il chantun Grischun duess medemamain vegnir tratga a niz. Cun augmentar las limitas vegn er extendida in pau la libertad d'agir da las autoritads da surdada. Qua sa tracti d'ina vart da stgaffir medemas schanzas envers noss chantuns vischins, da l'autra vart da pudair tegnair meglier quint da las structuras economicas decentralas da noss chantun.

Per ils motivs menziunads supplitgain nus la regenza:

1. da cumparegliar las limitas valaivlas en il chantun Grischun cun quellas dals chantuns vischins.

2. da trair a niz la libertad d'agir legala almain en la dimensiun sco ils chantuns vischins fan quai e d'augmentar correspundentamain las limitas.

Cuira, ils 26 da november 2002

Nums: Beck, Casanova (Vignogn), Battaglia, Biancotti, Bischoff, Brüesch, Butzerin, Cathomas, Catrina, Cavegn, Caviezel (Pitasch), Cavigelli, Christ, Christoffel, Crapp, Dalbert, Dermont, Donatsch, Geisseler, Göpfert, Gross, Hardegger, Heinz, Hess, Hübscher, Jeker, Joos, Kessler, Lemm, Loepfe, Luzi, Luzio, Maissen, Marti, Möhr, Nigg, Patt, Peretti, Pleisch, Portner, Quinter, Ratti, Robustelli, Stiffler, Thöny, Tremp, Tscholl, Vetsch, Wettstein, Zarro, Zinsli

Session: 27.11.2002
Vorstoss: rg Postulat



Resposta da la regenza

Ils 15 da mars 2001 ha la conferenza dals directurs da construcziun, planisaziun e protecziun da l'ambient deliberà, en vista a la cunvegna bilaterala tranter la Communitad europeica (CE) e la Svizra davart tscherts aspects da las acquisiziuns publicas, la nova cunvegna interchantunala davart las acquisiziuns publicas (rev. CIAP). Ultra da la realisaziun da las obligaziuns internaziunalas che resultan da la cunvegna bilaterala represchenta l'armonisaziun da las limitas maximalas en il martgà intern in'ulteriura novaziun. Quant ferm ch'ins duai mantegnair las limitas da fin uss tenor la lescha da submissiun, vegn a sa mussar en connex cun la participaziun dal chantun Grischun a la CIAP revedida. Ins ha l'intenziun d'avrir ina procedura da consultaziun davart questa revisiun il pli tard il matg 2003. Qua duai vegnir proponì in augment commensurà da las limitas da fin uss.

Cunter in augment maximal da las limitas vertentas pledan particularmain ils sequents motivs:

a) In tal augment n'avess betg per consequenza che la situaziun dal martgà sa meglierass, mabain in regress, a moda ch'ils martgads chantunals e communals s'isolassan. Las stentas da fin uss per garantir ina concurrenza effizienta sparissan puspè.

b) En la pratica na sa laschan percorscher, pervia da las limitas pli bassas, nagins dischavantatgs dal martgà per la mastergnanza indigena. L'evaluaziun statistica dal departament cumpetent mussa ch'ins ha pudì resguardar offerents dal chantun per la gronda part da las acquisiziuns en il martgà intern, surprendentamain daplirs en la procedura averta ch'en quella directa. Uschia èn vegnidas assegnadas l'onn 2001 da las totalmain 4'145 surdadas annunziadas, 3'408 (82 %) ad offerents indigens. Cumpareglià cun il volumen d'incaricas da var 289 milliuns francs munta la quota da las firmas grischunas per tut ils geners
d'incaricas ad 86 %. Sco che la pratica da surdada da fin uss mussa, ademplescha la protecziun natirala che la distanza garantescha pervia da la situaziun geografica dal chantun, malgrà che l'avertura dal martgà è succedida, ina rolla ch'i n'è betg da sutvalitar en favur da la mastergnanza indigena. Sch'ins considerescha las incaricas da construcziun surdadas en il rom d'ina procedura averta, alura èn ids var 172 milliuns da var 186 milliuns francs (93 %) da las summas d'incaricas ad interpresas dal Grischun.

c) Aifer tschertas valurs d'incarica pon las incaricas vegnir surdadas per procedura directa u per procedura d'invit. Las evaluaziuns statisticas mussan che las instanzas da surdada na fan savens betg cumplettamain diever da lur libertad d'agir e ch'ellas elegian libramain ina procedura superiura u envidan offerents extrachantunals. Surprendent è il fatg, che l'onn 2001 han cuntanschì tant las incaricas da construcziun sco er quellas da prestaziuns da servetsch ch'èn vegnidas publitgads per la libra concurrenza en il Fegl uffizial en ina procedura averta, ina quota da retschaviders da l'agiudicaziun pli auta ch'en la procedura directa, nua che l'incumbensader ha fixà sez il circul dals offerents.

d) Singuls offerents crain da pudair pertschaiver en la realisaziun da proceduras formalas da submissiun il motiv per in "augment fraudulant e ruinus dals pretschs". Il squitsch da la concurrenza vegn dentant a restar er cun in augment da las limitas, perquai che malgrà la tscherna d'ina procedura directa vegnan dumandadas per regla ulteriuras offertas da cumparegliaziun. Da quai pudessi schizunt vegnir fatg abus per organisar rundas per tractar las offertas inoltradas e per opponer ils offerents in a l'auter, ina furma che vegn impedida en ina procedura formala da submissiun grazia al scumond da tractativas.

Ord vista da las ponderaziuns preschentadas è la regenza pronta d'acceptar il postulat en quel senn, ch'in augment da las limitas vegn examinà pli detagliadamain en il decurs da la proxima procedura legislativa e duai vegnir respundì en il rom d'in vast process da la furmaziun da la voluntad. Ina tala moda da proceder permetta er da far las cumparegliaziuns cun ils chantuns vischins ch'èn vegnidas pretendidas en l'intervenziun ed a medem temp er da resguardar las futuras lavurs da revisiun da quels.


Datum: 11 da favrer 2003