Navigation

Inhaltsbereich

Incumbensa da la fracziun da la PS concernent la retratga da la "Rezia energia" dals projects per ovras electricas a charvun (emprim sutsegnader Pfenninger)

Sessiun: 08.12.2008
L'opposiziun cunter la participaziun da la rezia energia SA a las ovras electricas a charvun a l'exteriur ch'èn climaticamain ed ecologicamain fitg problematicas crescha. Dapi la fin da l'onn 2007 hai dà pliras vuschs criticas cunter questa participaziun ed il tema è vegnì tractà er en ils meds da massa.

Suenter l'opposiziun cunter il project cun ina participaziun da la rezia energia en l'Italia dal sid ch'è vegnì enconuschent il settember, sa manifestescha ussa l'entira problematica per l'ovra electrica a charvun ch'è planisada a Brunsbüttel (Germania dal nord). La populaziun da la Germania dal nord ch'è pertutgada directamain da l'ovra n'è betg pronta d'acceptar questas emissiuns da CO2. Er numerusas Grischunas e numerus Grischuns sa smirveglian pli e pli davart il fatg che la rezia energia insista d'amplifitgar la forza electrica a charvun a l'exteriur. Gist en vista a la midada dal clima na po la construcziun d'ovras electricas a charvun cun in'emissiun enorma da CO2 betg vegnir responsada. I sto vegnir agiuntà che a Brunsbüttel duai schizunt vegnir ars charvun da l'America dal sid. Quai è in'absurditad nunditga.

Ma er la rentabilitad da questas ovras electricas è fitg contestada en il fratemp, perquai che la forza electrica a charvun vegn concurrenzada zunt fitg da la forza dal vent. Investiziuns en talas ovras cuntegnan numerusas intschertezzas; cunzunt èn quai l'acceptanza tar la populaziun ch'è directamain pertutgada, la procedura da permissiun, ils custs da construcziun, dentant er il svilup dal martgà e dals pretschs.

La strategia d'expansiun da la rezia energia na po pia betg vegnir responsada dal puntg da vista ecologic ed è fitg ristgada dal puntg da vista economic. Tge consequenzas che strategias da creschientscha e da gudogn han, avain nus stuì sentir malamain ils ultims mais. Igl è pia absolutamain urgent che las responsablas e ch'ils responsabels da la rezia energia sa suttamettian ad ina reflexiun. Pervia da la participaziun dal chantun da 46% a la rezia energia SA ha er la regenza ina responsabladad speziala.

Las sutsegnadras ed ils sutsegnaders incumbenseschan la regenza da far valair tut sia influenza tar las responsablas e tar ils responsabels da la rezia energia, per che:

1. la rezia energia sa retiria dals projects e da las participaziuns previsas en connex cun la construcziun d'ovras electricas a charvun a l'exteriur;
2. la rezia energia sa restrenschia en ses engaschaments a l'exteriur (ovras da producziun) sin novas funtaunas d'energia regenerabla en spezial sin l'energia dal sulegl, sin l'energia dal vent e sin stabiliments da geotermia;
3. la rezia energia surpiglia dapli responsabladad per augmentar l'effizienza energetica e fetschia er las investiziuns correspundentas;
4. la rezia energia s'engaschia – en il chantun Grischun – en moda pli intensiva per ina meglra utilisaziun dal potenzial ch'è avant maun d'uschenumnadas "novas energias regenerablas" en spezial en il sectur da l'energia dal sulegl;
5. las consumentas ed ils consuments d'electricitad en il territori da provediment da la rezia energia hajan ina transparenza (decleraziun) illimitada areguard la provegnientscha ed areguard il gener da producziun da l'energia ch'ellas e ch'els retiran.

Cuira, ils 8 da december 2008

Pfenninger, Arquint, Bucher-Brini, Frigg-Walt, Gartmann-Albin, Jaag, Jäger, Menge, Meyer Persili (Cuira), Peyer, Pfiffner-Bearth, Thöny, Trepp, Brasser, Locher Benguerel, Michel (Cuira)


Resposta da la regenza

Pervia da la liberalisaziun dal martgà sin plaun internaziunal sto er la Rezia energia SA (RE) sa confruntar cun novas sfidas pretensiusas. En quest connex stoi vegnir resguardà che la RE è ina societad anonima (SA) ch'è quotada a la bursa. Consequentamain surpiglia unicamain ses cussegl d'administraziun la responsabladad per la strategia da l'interpresa, perquai che prender las decisiuns da princip da la politica da fatschenta tutga tar las cumpetenzas centralas intransferiblas e nunprivablas dal cussegl d'administraziun d'ina SA (art. 716a DO).

Davart las pretensiuns da l'incumbensa prenda la regenza posiziun sco suonda:

1. La RE è ina interpresa d'electricitad ch'è activa sin plaun internaziunal e che ha la finamira da posseder atgnas ovras electricas, da disponer da participaziuns ad ovras electricas u da contracts da lunga durada per utilisar electricitad en ils martgads centrals. Tgi che vul numnadamain esser activ sin il martgà d'electricitad, sto prender en mira ina maschaida equilibrada – tant pertutgant la geografia sco er pertutgant las funtaunas d'energia – per pudair garantir la capacitad da rendita e per pudair reducir las ristgas da l'interpresa. Enconuschentamain ha la Germania decidì da sortir da l'energia nucleara e dovra cunzunt il charvun, il gas ed il vent per la producziun d'electricitad. Perquai che l'efficacitad da las novas ovras electricas a charvun è bainquant meglra che quella dals vegls implants e perquai che las novas ovras electricas a charvun consumeschan main charvun, sminuescha cleramain er l'impestaziun cun CO2 per KWh. Ultra da quai ha la politica dal clima da la Germania la finamira da substituir pass per pass las veglias ovras electricas a charvun cun novs stabiliments. La regenza è da l'avis che quest engaschament da la RE a l'exteriur saja chapaivel dal puntg da vista da la politica da provediment e da la politica regiunala. Quant enavant che l'investiziun ch'è necessaria per l'engaschament cumpiglia ristgas finanzialas, tecnologicas u politicas, sto percunter giuditgar e valitar unicamain il cussegl d'administraziun en il rom da sia decisiun d'investiziun.

2. La RE investescha constantamain en ovras idraulicas (mo ils ultims 5 onns passa 70 milliuns francs en noss chantun); ella vegn a s'engaschar er en il futur per la forza idraulica. Ma er l'engaschament a l'exteriur sin il champ da la producziun d'electricitad or d'energias regenerablas è gia ina realitad tar la RE. Uschia ha la RE gidà a realisar in parc da turbinas da vent en l'Italia dal sid. Il parc consista dad 11 implants che tiran a niz la forza dal vent ed ha ina prestaziun da passa 9 MW. Quai correspunda circa ad in terz da la prestaziun da tut ils implants fotovoltaics ch'eran colliads en la rait da la Svizra la fin da l'onn 2007. In provediment d'electricitad fidà na po dentant betg vegnir garantì a vista mesauna mo cun novas energias regenerablas sco l'energia dal vent u sco l'energia solara.

3. Las mesiras da l'effizienza energetica èn in element da la cussegliaziun d'energia da la RE. La cussegliaziun sa drizza tenor ils basegns e tenor las pretensiuns da sias 75'000 clientas e clients en il chantun. Uschia analisescha la RE – en il rom da ses servetsch a la clientella – adina e dapertut il basegn d'electricitad da la clientella gronda, e quai per evitar in consum maximal tar l'utilisaziun d'electricitad e per spustar il consum sin las uras cun pauca utilisaziun. Quai permetta a la RE d'applitgar ses sistem general d'ovras electricas en moda raschunaivla, uschia ch'i dat er in effect ecologic positiv.

4. La RE promova l'energia solara ed er la producziun d'electricitad or da la fotovoltaica, or dal biogas ed or da l'energia dal vent. La cumpra da "PurePower Graubünden" garantescha che almain 2.5 % da l'energia che vegn vendida deriva da novas energias regenerablas. Ina commerzialisaziun ch'è concepida a lunga vista e la vendita da quest product d'electricitad ecologica han gia pudì finanziar divers da quests implants. Il dumber creschent da las clientas e dals clients da l'electricitad ecologica vegn considerà da la RE sco in'obligaziun da realisar ulteriurs implants da quest gener.

5. La transparenza areguard la provegnientscha da l'electricitad è reglada en ina lescha e vegn er garantida da la RE. La prescripziun vertenta da caracterisar l'electricitad oblighescha dapi l'onn 2006 tut las furnituras e tut ils furniturs d'electricitad da declerar a las clientas ed als clients lur "maschaida d'electricitad".

La finala èsi da dir che dal puntg da vista da la politica economica fissi irresponsabel da restrenscher nunnecessariamain tras prescripziuns politicas l'abilitad d'agir da la societad d'electricitad RE ch'è activa en la furma d'ina interpresa. Per ils motivs menziunads propona la regenza da refusar questa incumbensa.

13 da mars 2009