La regenza suttametta al cussegl grond in messadi concernent in
credit d'impegn da 3.1 milliuns francs per la restauraziun cumpletta da
la catedrala Assumziun da Nossadunna a Cuira. L'entschatta da la
restauraziun duai cumenzar l'onn che vegn e durar circa set onns. Ils
patruns da construcziun quintan cun ils custs totals da bunamain 22
milliuns francs. Il credit d'impegn dal chantun è suttamess al
referendum facultativ.
Contribuziuns culturalas ed autras contribuziuns
Contribuziuns cun ina summa totala da 33'000 francs vegnan pajadas a
las suandantas instituziuns culturalas e d'util public:
- festival internaziunal da teater da Tiraun-Val Puschlav
"FestTeatro 2001 Estate",
- concert da l'orchester da chombra turitgais dals 23 da settember
en la baselgia da Ziràn, ed
- ina contribuziun da partenza per l'uniun canorta d'uffants
"Wigwam" a Cuira ch'è vegnida fundada da nov.
Da las vischnancas
La scola chantunala grischuna duai vegnir schlargiada. La regenza
approva ils programs da concurrenza e da spazi "locals d'instrucziun cun
cafetaria e mediateca" sco er "halla da sport tripla e plazzas da sport
el liber". Las formulaziuns cumpigliadas tenor las qualas ils bajetgs
Constantineum, Plessurquai 53 e la fabrica veglia Willy cun la chasa
d'abitar, Münzweg 11 fin 15 cumprais l'implant da la roda d'aua pon
vegnir disfatgs, vegnan sustegnidas expressivamain en l'interess da las
pussaivladads da schlargiament per la scola chantunala grischuna. Dal
reminent vegn preferida la part occidentala da l'areal Kantengut (scola
da dunnas) a Cuira sco futur lieu per il center da scolaziun per
professiuns da la sanadad publica e professiuns socialas.
En general vegn approvà il project preliminar per la sanaziun da
construcziun e la sanaziun concernent la tecnica d'energia da la Casa
Depuoz a Trun. Als purtaders vegn garantì ina contribuziun da
construcziun chantunala dad 80 pertschient dals custs imputabels betg
cuverts entras las contribuziuns federalas. I vegn fatg quint cun custs
totals da set milliuns francs.
Ils reglaments ed ils plans per las zonas da protecziun per las
funtaunas sin l'intschess da Parsenn, sin l'intschess da Wäschchrütern e
per la funtauna Tobelmühle a Tavau vegnan approvads.
En general vegn il project preliminar per la restauraziun da la
chasa da scola e ses schlargiament cun ina scolina ed ina plazza da
sport or en il liber a Versomi approvà. Per ils custs d'investiziun
imputabels da circa 1,8 milliuns francs vegnan garantidas contribuziuns
chantunalas da circa 600'000 francs.
Consultaziun a la confederaziun
Visavi il departament federal per ambient, traffic, energia e
communicaziun s'exprima la regenza davart la sanaziun da canera da las
viafiers e davart l'audienza davart il plan d'emissiun. L'uffizi federal
da traffic (UFT) ha en general approvà il program per sanar la canera
dals vaguns proponì da la VR. El è dentant da l'idea che la VR resp. il
chantun hajan da surpigliar ils custs en la dimensiun da tschintg
milliuns francs per las lavurs da prescrutaziun e da svilup. La regenza
refusa cleramain questa pretensiun da l'UFT. La VR, la FA e la BVZ èn
praticamain las sulettas viafiers en l'Europa che curseschan anc cun
frains da vacum e betg cun frains d'aria cumprimida u cun frains da
rudella. Per sanar la canera da lur vaguns n'existan anc naginas
schliaziuns cumprovadas. La regenza propona che la confederaziun
surpiglia ils custs per las lavurs da perscrutaziun e da svilup
necessarias, da las qualas i vegnan finalmain a profitar tut las
viafiers a binari stretg.
Persunal
La fin da fanadur è Claudio Ghisletti, Cuira, schef-cumissari da
taglia tar l'administraziun da taglia, entrà en pensiun. La regenza
engrazia ad el per ses servetschs prestads al chantun.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun