En curt na dastgan camiuns betg pli charrar a tras ils vitgs da Panaduz e Razén. Quest scumond na vala betg per furniturs. La finamira da quest scamond è d'augmentar la segirtad per pedunsas e peduns per lung da la via taliana e da proteger la populaziun da Panaduz e da Razén cunter la canera e l'impestaziun da l'aria. Questa mesira va en vigur suenter ch'il termin da recurs è scrudà e suenter che la signalisaziun correspundenta è montada. Suenter che la taxa sin il traffic da camiuns pesants dependenta da la prestaziun (TTCP) è entrada en vigur registreschan las vischnancas da Panaduz e Razén in augment considerabel da traffic da camiuns pesants. Quai è collià cun in privel considerabel per pedunsas e peduns en il vitg e cun in augment marcant da grevezzas per l'ambient.

Gruppa da sculpturas "grossicorpirossi" da Miguela Tamò per la scola da dunnas
Sin l'areal da la scola da dunnas dal chantun Grischun a Cuira duain tschintg grondas plasticas cotschnas e tarlischontas da Miguela Tamò chattar lur plaz definitiv. Il chantun cumpra ils "grossicorpirossi" (gronds corps cotschens) per in pretsch da 80'000 francs. La scola da dunnas dil chantun Grischun è colliada tradiziunalmain cun l'art da dunnas. Quai sa mussa cunzunt tar l'art a l'edifizi. Quai che ha mancà enfin uss èn sculpturas ed objects che n'èn betg liads vid in plaz. Ils "grossicorpirossi" ord rascha d'epoxid che mesiran 100 x 100 x 100 cm pon vegnir plazzads tant en l'intern sco er a l'extern.

Gremi: regenza
Funtauna: rg Chanzlia chantunala