Il Grischun è stà dus onns a la testa da la cumissiun cultura e furmaziun da la cuminanza da lavur dals pajais da las Alps (Arge Alp). Sut il presidi dal president da la regenza Claudio Lardi èn vegnids realisads plirs projects da sport e da cultura. Venderdi proxim surdat il chantun Grischun il presidi da questa cumissiun al chantun Son Gagl.

A la 33avla conferenza annuala dals schefs da las regenzas da la Arge Alp da venderdi proxim a Ragaz Bogn midan duas da las quatter cumissiuns il presidi. La presidenta da la regenza Kathrin Hilber (Son Gagl) surpiglia dal president da la regenza Claudio Lardi il presidi da la cumissiun cultura e furmaziun. Cusseglier guvernativ Marco Borradori (Tessin) presidiescha da nov la cumissiun traffic. Uschia èn duas da las quatter cumissiuns da la Arge Alp sut il presidi svizzer. Il presidi da la cumissiun ambient, urden dal territori ed agricultura resta tar Dario Pallaoro (Trentino) ed assessur Werner Frick (Bozen-Tirol dal sid) è vinavant president da la cumissiun economia e lavur.

Il sport sco liom
Sut il presidi grischun ha furmà la cumissiun cultura e furmaziun in program multifar. Ils eveniments sportivs che vegnan fatgs en las regiuns da la Arge Alp èn stads in element impurtant da la cooperaziun sur ils cunfins. Ils ulteriurs puncts centrals da la lavur da la cumissiun sa èn stads la collavuraziun culturala ed il tema famiglia, la telecommunicaziun ed il salvament aviatic sur ils cunfins.

Il Tirol surpiglia da Son Gagl
Suenter dus onns a la testa da la Arge Alp surdat il chantun Son Gagl per dus onns il presidi al Tirol. Il tema principal dal guid songagliais è stà: "Novas tecnologias en l'artg alpin". Il tema principal dal Tirol dat la preferenza a la "europeisaziun da la Arge Alp" ed instradescha cun quai ina offensiva per temas specifics dals culms e per far vegnir vesaivel lur niz per burgaisas e burgais. A la conferenza dals schefs da las regenzas è represchentà il chantun Grischun cun president da la regenza Claudio Lardi, cussegliera guvernativa Eveline Widmer-Schlumpf e chancelier Claudio Riesen.

30 onns Arge Alp
Per il giubileum da 30 onns da la Arge Alp ha lieu ils 11 e 12 d'october a Telfs (Tirol) in simposi ed in act festiv. Al simposi davart il tema "Viver e surviver en l'artg alpin" vegnan a pled politichers, experts, burgais engaschads e represchentants d'interess. Per l'act festiv èn planisads ina missiva or dal territori alpin per l'Europa, in referat dal cumissari da la UE Franz Fischler davart l'avegnir da las Alps ord vista europeica, in sguard retrospectiv ed ina perspectiva sin las incumbensas da la Arge Alp, l'undrientscha da trais ambassadurs per ils zains da la pasch da l'artg alpin sco er in discurs da pressa cun ils responsabels politics.
L'onn passà ha la sutgruppa lavur da publicitad scret ora il premi da la Arge Alp 2002 per exempels reussids da novas tecnologias, raits da perscrutaziun e da collavuraziun en il territori alpin. Quest premi vegn surdà en il rom da la conferenza annuala. La summa dal premi da 16'500 euros va ad in project ch'ina giuria internaziunala sut il presidi dal president da la Arge Alp, cusseglier guvernativ Peter Schönenberger, ha tschernì da totalmain 17 lavurs preselecziunadas.

Numerus novs projects
Il preventiv 2003 da la Arge Alp prevesa expensas totalas da circa 566'000 euros. Quellas vegnan cunzunt duvradas per la lavur da project en il rom da las quatter cumissiuns. Las propostas da projects èn avant maun. Ellas cumpiglian:

Per la cumissiun I - cultura e furmaziun
- far in program da sport cun 15 fin 18 eveniments sportivs che vegnan organisads da differentas regiuns da la Arge Alp;
- far in program da sport per persunas impedidas en la regiun da Salzburg;
- realisar la 3. ediziun dal premi da lectura da la Arge Alp cun belletristica tudestga-taliana e
- cuntinuar cun il project diever da la telecommunicaziun per cas d'urgenza.

Per la cumissiun II - ambient, planificaziun dal territori ed agricultura
- sviluppar in concept da marketing 2003 e 2004 per l'aviez;
- mantegnair, sviluppar e colliar spazis da viver elegids d'impurtanza cuminaivla cun resguard particular dals territoris da protecziun "Natura 2000" (2003 fin 2005) ed
- prestar ina contribuziun per il seminar "territori da protecziun e cuminanza locala per in svilup persistent da las muntognas".

Per la cumissiun III - economia e lavur
- professiunalisar e sviluppar la rait d'economia e partenadi Alp Net;
- sviluppar e professiunalisar la direcziun dal project Alp Net
- sco er dal project "New Born in the Alps" per la rescuverta da la stad en las Alps e
- realisar il "cudesch alv per posiziunar las Alps".

Per la cumissiun IV - traffic
- cuntinuar cun il concept da traffic da la Arge Alp che serva sco basa da datas e da decisiun a la politica e l'administraziun sin plaun regiunal e naziunal e
- realisar il studi SMA "traffic da persunas cun la viafier sur ils cunfins" en mesiras per la realisaziun sperta da las propostas da meglieraziun, cumplettà cun ina analisa da potenzial per il traject dal Brenner.
A la 33avla conferenza annuala dals schefs da las regenzas da la Arge Alp vegnan spetgads commembers dals pajais, da las provinzas e dals chantuns suandants: Baden-Württemberg, Baviera, Bozen Tirol dal sid, Grischun, Lumbardia, Salzburg, Son Gagl, Tirol, Tessin, Trentino e Voralberg.

Gremi: regenza
Funtauna: rg chanzlia chantunala dal Grischun