La regenza ha concludì da suttametter a la votaziun dal pievel mez
matg il credit d'impegn da 98 milliuns francs bruts per l'execuziun dal
project general "construcziun nova e sanaziun da la scola chantunala da
Cuira" sco project chantunal. Il medem di vegnan elegidas las dretgiras
districtualas ed i vegn votà davart trais projects federals:
- midada dals 3 d'october 2003 da la lescha federala davart
l'assicuranza per vegls e survivents (LAVS) (11avla revisiun da la AVS);
- conclus federal dals 3 d'october 2003 davart la finanziaziun da la
AVS/AI cun auzar las tariffas da la taglia sin la plivalur
- lescha federala dals 20 da zercladur 2003 davart las midadas da
decrets concernent l'imposiziun da taglia sin conjugals e sin famiglias,
l'imposiziun da taglia sin la proprietad d'abitar e las taxas da bul.
IRF ed URC daventan IRRC
L'inspecturat dal register funsil IRF e l'uffizi dal register da
commerzi URC vegnan fusiunads. Il nov post da servetsch vegn numnà
"inspecturat dal register funsil e register da commerzi" IRRC. Ils
respargns effectivs da la fusiun na sa laschan anc betg quantifitgar en
detagl. En il sectur da l'organisaziun e da la structura da la
clientella exista dentant in potenzial da sinergia considerabel. Il nov
post da servetsch vegn ad esser operativamain activ il cumenzament da
l'onn 2005.
Questa fusiun era vegnida concludida dal cussegl grond en la sessiun
da zercladur 2003 en il rom da l'examinaziun da las structuras e da las
prestaziuns per sanar las finanzas dal chantun.
Gulivaziun da finanzas: reintroducziun da la part dals custs
administrativs
Ils custs administrativs da la gulivaziun directa da finanzas vegnan
finanziads a partir dal 1. da mars dal fond da gulivaziun da finanzas.
La part dals custs administrativs importa annualmain var in mez milliun
francs. La regenza ha approvà la revisiun parziala correspundenta da las
"disposiziuns executivas tar la lescha davart la gulivaziun da finanzas
intercommunala".
La part dals custs administrativs era gia vegnida incassada da 1958
fin 1989. Sco "levgiament per vischnancas cun dretg d'ina gulivaziun da
finanzas" ha la regenza concludì 1991 da renunziar a quella part. La
reintroducziun è ina mesira en il rom da l'examinaziun da las structuras
e da las prestaziuns per sanar las finanzas dal chantun.
Da vischnancas e regiuns
- Limitas da pais pli autas: Sin la via da colliaziun da la
bifurcaziun S. Catrina da la via da Val S. Pieder fin Tersnaus vegn
dauzà il pais maximal da 18 sin 28 tonnas e sin la via da colliaziun
tranter Rueun e Siat da la bifurcaziun da la via sursilvana fin tar la
bifurcaziun da la via da Panix da 13 sin 18 tonnas.
- Vischnanca da Tavau: Las votantas ed ils votants avevan concludì
la fin da november 2003 la reorganisaziun da las structuras da las
autoritads e da las proceduras d'elecziun e da votaziun. La regenza ha
approvà questa revisiun parziala da la constituziun communala.
Contribuziuns chantunalas a differentas instituziuns
- Agid d'investiziun: Per construir la telecabina dad otg a Val S.
Pieder e per renovar la sutgera da dus a Veulden ha la regenza deliberà
contribuziuns chantunalas da totalmain var 470'000 francs e credits
d'agid d'investiziun da la confederaziun da var 2 milliuns francs.
Projects da vias
- Punt sur il Rain d'Avras a Cröt: Per var 1,3 milliuns francs vegn
la punt sanada e rinforzada. Per quai ha la regenza deliberà ils credits
necessaris.
Chaussas persunalas
- Othmar Schnoz da Domat è vegnì elegì sco manader da la partiziun
"organisaziun ed edifizis" sco er sco substitut dal manader dal post da
servetsch en l'uffizi da militar e da protecziun civila.
chanzlia chantunala dal Grischun
Gremi: regenza
Funtauna: rg chanzlia chantunala dal Grischun