La regenza ha avert la consultaziun davart las disposiziuns
executivas tar la lescha davart il sustegn da persunas basegnusas. Dals
documents da la consultaziun pon ins prender invista en la homepage dal
departament da giustia, polizia e sanitad (http://www.jpsd.gr.ch). Els
pon er vegnir chargiads sin l'agen computer. Circuls interessads èn
envidads d'inoltrar lur opiniuns fin ils 14 d'october 2005. La
conferenza svizra da l'agid social (COSAS) ha revedì l'onn 2005 las
directivas per la concepziun e la calculaziun da l'agid social. Questa
revisiun è succedida cunzunt er sut il squitsch dals chantuns che sa
sentan confruntads cun dumbers da cas creschents e cun resursas che
daventan adina pli stgarsas. Cun las directivas han ins - tenor il
rapport explicativ tar las disposiziuns executivas - l'intenziun da
segirar l'existenza, da rinforzar ils impuls finanzials, da promover
l'integraziun e da cumbatter abus. Concretamain cuntegnan las novaziuns
la fixaziun nova dal basegn fundamental per l'existenza, l'introducziun
d'in import liber da taglia da las entradas per persunas cun activitad
da gudogn, l'introducziun d'in supplement d'integraziun per persunas
senza activitad da gudogn sco er l'amplificaziun da las sancziuns ed il
cumbat da l'abus.
La regenza prenda posiziun en connex cun la consultaziun davart "la
midada e la realisaziun da l'armonisaziun da taglia"
La regenza grischuna sustegna da princip la finamira da la
confederaziun davart "la midada e la realisaziun da l'armonisaziun da
taglia". L'element da quest project è da stgaffir ina cumissiun da
controlla. L'incumbensa da questa cumissiun duai esser, da vegnir activa
en quels cas, en ils quals la legislaziun chantunala u la pratica porta
- per persunas natiralas u giuridicas ch'èn obligadas da pajar taglia en
il chantun - avantatgs da taglia che n'èn betg cumpatibels cun la lescha
d'armonisaziun da taglia (LATD). Malgrà la tenuta positiva da la regenza
fa ella attent a differents aspects problematics sco per exempel al fatg
che la confederaziun survegnia memia blera impurtanza tras la
cumposiziun paritetica da la cumissiun. A l'avis da la regenza sto
questa cumissiun consister per almain dus terzs da represchentantas e
represchentants dal chantun. Ultra da quai rinviescha ella al fatg che
sco consequenza da tantas regulaziuns ch'ils chantuns acceptan en lur
dretg chantunal na possian betg vegnir examinadas tuttas arreguard lur
concordanza cun la LATD.
Da vischnancas e regiuns
- Samedan, Ramosch: La regenza ha concludì d'acceptar la mesiraziun
uffiziala da las vischnancas en il program da mesiraziun 2005.
- Schiers: Il plan da zonas parzial 1:1'000 "scola media evangelica
nord" dal 1. da fanadur 2005 vegn approvà.
- Peist: Per cumplettar il provediment d'aua vegn garantida ina
contribuziun chantunala da maximalmain 26'600 francs.
- Siat: La regenza conceda ina contribuziun da maximalmain 57'000
francs per sanar e per engrondir il provediment d'aua
- Medel (Valragn): Per sanar il provediment d'aua vegn concedida ina
contribuziun chantunala da maximalmain 35'700 francs.
Contribuziuns chantunalas a differentas instituziuns
- Viafier retica (VR): La regenza approvescha a la VR contribuziuns
d'investiziun da totalmain 5'240'000 francs. Ils meds servan a la
construcziun nova dal tunnel da Saas sin la lingia dal Partenz, a la
renovaziun da la staziun da l'Alp Grüm sin la lingia dal Bernina, a la
renovaziun da la staziun da Vaz sut inclusiv la part dals binaris dubels
da la vart da Trimmis sco er a la sanaziun dal viaduct da Langwies sin
la lingia dad Arosa. Per construir la fermada nova da la VR
Cuira-Wiesental vegn concedida ina contribuziun chantunala supplementara
da 273'000 francs.
- Lia rumantscha: Per metter a disposiziun novs meds d'instrucziun
en il rom dal project "rumantsch grischun en scola" conceda la regenza
totalmain 61'000 francs.
- SRG SSR idée suisse Svizra orientala: Per il project da giubileum
"75 onns societad da radio e televisiun da la Svizra orientala" vegn
pajada ina contribuziun unica da maximalmain 5'250 francs.
Projects da vias
- La regenza ha approvà totalmain circa 2,1 milliuns francs per
construir e per sanar divers trajects da via:
- A13/H13 Pian San Giacomo - Malabarba
- A13, San Bernardin, vart dal nord dal tunnel - La Punt
Fatgs dal persunal
- Rico Nussbaumer, actualmain a Cuira, vegn schef da l'uffizi
districtual da construcziun bassa 5 cun lieu da lavur a Tavau.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun