En il rom da la nova politica regiunala (NPR) ha la regenza grischuna prendì enconuschientscha dal "program da realisaziun dal Grischun 2008-2011" e l'ha inoltrà a la confederaziun entaifer il termin fixà. Il departament d'economia publica e fatgs socials è vegnì incumbensà da manar las tractativas detagliadas davart las prestaziuns da sustegn da la confederaziun. Il punct central dal program da realisaziun prevesa da sviluppar cun cleras finamiras las branschas d'export (turissem, industria e servetschs, energia, furmaziun e sanadad, export da resursas natiralas). A medem temp duai vegnir rinforzà er il management regiunal. Il chantun ha l'intenziun da far cunvegnas da prestaziun correspundentas cun las corporaziuns regiunalas per promover cun cleras finamiras la basa regiunala per il svilup economic.
En il rom da la NPR ha la confederaziun envidà ils chantuns d'inoltrar fin ils 31 da fanadur 2007 in program da realisaziun per ils onns 2008 fin 2011 che definescha las finamiras da la politica regiunala. La regenza ha prendì enconuschientscha dal "program da realisaziun dal Grischun 2008-2011" ed ha incumbensà il departament d'economia publica e fatgs socials da manar cun la confederaziun las tractativas davart las prestaziuns da sustegn en furma da contribuziuns à fonds perdu. La confederaziun ha l'intenziun da terminar las tractativas cun ils chantuns fin mez december 2007.

Program da realisaziun dal Grischun 2008-2011
Il "program da realisaziun dal Grischun 2008-2011" è vegnì elavurà en collavuraziun cun las corporaziuns regiunalas dal Grischun e cun lur uniun "Las regiuns GR".
En il chantun Grischun sa mussan difficultads tipicas dal territori svizzer da muntogna. En il Grischun sa sentan bleras persunas sfurzadas d'emigrar. Quest fatg dastgass er avair consequenzas negativas per il bainstar da las abitantas e dals abitants che restan en il Grischun. Tras ina politica economica cun cleras finamiras duai quest svilup vegnir cumbattì. Per la creschientscha economica en il chantun Grischun han cunzunt las branschas d'export ina impurtanza decisiva. Per la perioda 2008-2011 duain perquai en emprima lingia las branschas d'export (turissem, industria e servetschs, energia, furmaziun e sanadad, export da resursas natiralas) vegnir promovidas e sviluppadas cun cleras finamiras en tut las regiuns dal chantun. Questa finamira vegn accumpagnada da mesiras per rinforzar la collavuraziun interchantunala ed internaziunala, d'ina meglra coordinaziun da las politicas secturialas sco er da l'installaziun d'in management regiunal.
Per ils onns 2008 fin 2011 èn vegnids dumandads tar il secretariat da stadi per l'economia (SECO) 15 milliuns francs en furma da contribuziuns à fonds perdu e 36 milliuns francs en furma d'emprests da daners. Per il chantun Grischun vul quai dir ch'el stoppia impunder sez 5.6 milliuns francs per onn en il svilup regiunal.

Management regiunal
A medem temp sco l'elavuraziun dal "program da realisaziun dal Grischun 2008-2011" è vegnida iniziada - sco emprima mesira accumpagnanta - l'installaziun dal management regiunal. En il center stat ina separaziun consequenta tranter incumbensas administrativas ed incumbensas dal svilup economic en las corporaziuns regiunalas. Las contribuziuns chantunalas per la lavur dal secretariat vegnan remplazzadas tras contribuziuns per promover il svilup economic. Questas contribuziuns èn colliadas da nov cun servetschs da las regiuns, e quels vegnan reglads en in contract cun il chantun. En il center stat in model organisatoric che prevesa d'ina vart ch'il chantun accumpogna tecnicamain e professiunalmain il management regiunal e da l'autra vart che las regiuns incumbenseschan persunas ch'èn responsablas per il svilup economic.
Actualmain vegn quest model concretisà tras l'uffizi per economia e turissem e tras las corporaziuns regiunalas. Las corporaziuns regiunalas èn vegnidas envidadas d'inoltrar al chantun fin la fin da settember 2007 propostas davart il cuntegn sin basa dal "program da realisaziun dal Grischun 2008-2011".
Las tractativas detagliadas davart las cunvegnas da prestaziun per mintga singula regiun duain avair lieu l'october ed il november 2007. La finamira: Suenter che las tractativas cun la confederaziun davart il "program da realisaziun dal Grischun 2008-2011" èn terminadas, duain vegnir suttascrittas uschè svelt sco pussaivel las cunvegnas da prestaziun per mintga singula regiun ed alura prendids per mauns projects concrets.

Gremi: departament d'economia publica e fatgs socials
Funtauna: rg departament d'economia publica e fatgs socials