La regenza grischuna è cunter l'iniziativa dal pievel "Scola professiunala da tgira dal Grischun a Glion". En sia missiva per mauns dal cussegl grond propona ella da refusar questa iniziativa. L'iniziativa vul garantir a la scola da tgira da Glion ina posiziun privilegiada. La realisaziun fiss colliada cun grondas difficultads e cun intschertezzas. Il cussegl grond vegn a tractar la fatschenta en la sessiun da favrer 2009.

La regenza ha retschavì dal legislatur l'incumbensa da diriger e da coordinar las purschidas da scolaziun en scola per l'entir sectur da la furmaziun professiunala. Questa incumbensa vul la regenza ademplir er en l'avegnir. Ella propona perquai al cussegl grond da refusar l'iniziativa "Scola professiunala da tgira dal Grischun a Glion". L'iniziativa vul retrair a la regenza questa incumbensa da direcziun e da coordinaziun en il sectur da sanadad e garantir a Glion sco er a la scola professiunala da tgira da Glion ina posiziun privilegiada sco lieu da scolaziun e da furmaziun supplementara.
Suenter avair manà senza success tractativas cun la scola professiunala da tgira dal Grischun a Glion n'aveva la regenza betg acceptà l'october 2006 la dumonda da la scola che vuleva stgaffir ina nova scola professiunala superiura da tgira. Silsuenter è vegnida inoltrada ina iniziativa dal pievel. Quella pretenda che la regenza stoppia vegnir obligada - tras disposiziuns legalas che ston vegnir stgaffidas - da mantegnair e da promover Glion, en spezial la scola professiunala da tgira dal Grischun a Glion, sco lieu da scolaziun e da furmaziun supplementara en il sectur da sanadad. L'iniziativa ch'è reussida cun 3'364 suttascripziuns valaivlas prevesa formalmain ina midada da la lescha davart la furmaziun professiunala e davart purschidas da furmaziun cuntinuanta. Las premissas per renconuscher instituziuns da scola ch'èn fixadas en la lescha na duain betg valair per la scola a Glion. En quest cas excepziunal duai il chantun plitost garantir che la scola possia exister vinavant illimitadamain e senza cundiziuns, pia er independentamain dal basegn d'ina tala purschida da furmaziun.
Sin basa dals scleriments ch'èn vegnids fatgs, ha la regenza constatà ch'i na dettia oz nagin basegn en il chantun per ina segunda scola professiunala superiura da tgira, sco quai ch'i vegn pretendì da l'iniziativa. Er a media ed a lunga vista na sa mussan strusch indizis per in augment dal basegn. Plitost vegn il Grischun a stuair concentrar sias forzas per pudair far frunt a la tendenza naziunala da dapli scolaziuns da scola auta professiunala en il sectur da sanadad e per cumpensar la situaziun perifera dal Grischun. Cun la purschida da scolaziun ch'il chantun metta a disposiziun a Cuira è il Grischun posiziunà actualmain bain sco lieu da furmaziun e sco plazza economica cun ina purschida da scolaziun attractiva e confurma al temp.
La realisaziun da l'iniziativa fiss colliada cun grondas difficultads e cun intschertezzas. Er pervia da quai è l'iniziativa - tenor la regenza - da refusar. Difficultads datti, sch'il legislatur vul observar in tractament giuridicamain egual e distgargiar en general la regenza - almain en il sectur da sanadad - da l'incumbensa da direcziun e da coordinaziun. Dentant dessi er gronds problems, sche Glion vegniss privilegià en il sectur da la furmaziun professiunala da sanadad.
Tenor la regenza èsi pli adequat da mantegnair l'incumbensa da direcziun e da coordinaziun per l'entir sectur da la furmaziun professiunala. Qua tras po il chantun cumpilar la purschida uschia, che la regiun cun avunda plazzas d'emprendissadi u ch'il chantun furman la basa da recrutaziun per las scolas dal stgalim secundar II cun las scolas professiunalas spezialisadas e cun las scolas medias. En il sectur terziar cun las scolas professiunalas superiuras è quai entant per regla l'entir chantun. Che la regenza e ch'il cussegl grond promovan Glion sco in tal center regiunal per il stgalim secundar II, han els mussà cleramain cun agid dal model da splitting a la scola professiunala commerziala e cun la nova scola media professiunala cun maturitad spezialisada en sanadad.
Igl è previs ch'il cussegl grond vegn a tractar l'iniziativa en la sessiun da favrer 2009. En cas che l'iniziativa, ch'è concepida sco proposta generala, vegniss acceptada, fissi d'elavurar entaifer in onn in project da lescha. Quest project da lescha fiss suttamess al referendum legislativ suenter la deliberaziun tras il cussegl grond.

Gremi: regenza
Funtauna: rg chanzlia chantunala dal Grischun