Suenter 30 onns sco tgirader da monuments dal chantun Grischun va Hans Rutishauser en pensiun la fin da zercladur. Durant sia activitad ha el influenzà durablamain la gestiun da monuments architectonics en il chantun Grischun.

Hans Rutishauser, che deriva dal chantun Turitg, aveva stabilì ina relaziun visavi ils monuments d'art dal Grischun tranter auter tras sia lavur da doctorat davart l'anteriura claustra dals premonstratens a Churwalden. L'istoricher d'art ha surpiglià il 1. da zercladur 1978 sia incumbensa dad Alfred Wyss ch'era stà l'emprim tgirader da monuments dal Grischun. Sin el spetgava blera lavur, cunquai che numerus monuments architectonics e maletgs da blers vitgs sa preschentavan en il chantun en in stadi pauc allegraivel. Plaun a plaun è la conscienza per la tgira da monuments, ch'è vegnida influenzada decisivamain da Hans Rutishauser, sa sviluppada e sa consolidada fin a la chapientscha sco ch'ella sa preschenta oz, cun in'avischinaziun considerabla al sectur economic impurtant, il turissem.

A la fin da sia activitad professiunala sa mussi cleramain che Hans Rutishauser ha pudì transferir en fitg blers cas ses entusiassem sin persunas privatas e sin autoritads da construcziun. Oz na chattan ins strusch ina baselgia che n'è betg vegnida restaurada ils ultims decennis. Il tgirader chantunal da monuments ha accumpagnà nundumbraivlas lavurs da renovaziun vi da monuments architectonics da noss chantun. Uschia èn p.ex. vegnidas restauradas e conservadas tut las 17 baselgias e chapluttas da Mustér. Tar "ses" plazzals il pli impurtants tutgan bain la claustra da Müstair - ch'è dapi l'onn 1983 patrimoni mundial da la UNESCO -, la baselgia da Ziràn e - sco in dals ultims - la catedrala da Cuira. El è sa fatschentà cun picturas medievalas en baselgias pli pitschnas sco a Lavin, a Pitasch u a San Gian (Schlarigna), ma er cun baselgias baroccas pli grondas sco a Vrin, a Tinizong u a Sedrun.

Tar ils objects tgirads tutgan tant "classichers" da la tgira da monuments sco er numerus tips da monuments, cun ils quals ins ha chattà champs novs. Bleras ruinas da chastels èn vegnidas conservadas en collavuraziun cun il servetsch archeologic, ma er las incumbensas da la tgira d'ierts istorics - sco tar il parc Fontana a Cuira - èn vegnidas exploradas. L'idea dals hotels istorics - che han oz in grond success turistic - han manà Hans Rutishauser, sco president da la gruppa da lavur correspundenta dal ICOMOS, al success. Trais decennis han er purtà ina tscherta midada en la tenuta da la tgira da monuments: Entant ch'i valeva ina giada da restaurar "natiers" u da reconstruir in tschert stadi istoric d'in edifizi, han ins guardà pli tard da mantegnair senza restricziuns las differentas fasas da construcziun, pia l'entira substanza istorica sco unitad. Tenor questa idea directiva na po in original istoric betg vegnir remplazzà, ed ina copia formala è irrelevanta.

La lavur sco tgirader da monuments na fa natiralmain betg adina mo plaschair. Sco "advocat" dals bains culturals architectonics è el er vegnì confruntà cun perditas dolurusas e cun demoliziuns nungiavischadas. Tras sia tenuta da basa positiva, tras ses engaschi e tras ses entusiassem stimulant ha Hans Rutishauser adina pudì ademplir sia incumbensa cun frestga persvasiun e cun schlantsch giuvenil. Sentiments da ventira ha el gì en tut quels cas, nua che l'anteriura "macla" dal vitg è daventada in bischu custaivel, nua ch'ina chaplutta è sa midada d'ina ruina en in cliniez da l'istorgia d'art u nua ch'in edifizi vegl, che dueva vegnir demolì, è daventà in punct fix dal maletg da la citad.

Sco intermediatur e sco perscrutader da l'istorgia d'art e d'architectura indigena ha Hans Rutishauser cuntanschì renconuschientscha e gronda stima. Legendaras èn ultra da quai gia oz sias visitas guidadas cun explicaziuns precisas e captivantas. I resta il giavisch che Hans Rutishauser fascineschia - sco intermediatur cultural - anc blers onns numerusas audituras e numerus auditurs en noss chantun.

Marcus Casutt daventa nov tgirader da monuments dal chantun Grischun
Successur da Hans Rutishauser sco tgirader da monuments dal chantun Grischun daventa Marcus Casutt, il manader operativ actual da la tgira da monuments. L'istoricher d'art da 42 onns è creschì si a Cuira ed a Favugn, ha frequentà la scola chantunala grischuna ed ha studegià a Turitg ed a Hamburg. Suenter ch'el ha lavurà tar la tgira da monuments dal chantun Turgovia ed a l'institut per la tgira da monuments da la scola politecnica federala a Turitg, è el puspè turnà enavos avant dus onns e mez en il Grischun.

Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient