Cun paucs clics da la mieur èn disponiblas las cifras las pli impurtantas davart la pestga en il Grischun. Quest servetsch porscha l'uffizi da chatscha e pestga dal Grischun da nov sin sia pagina d'internet. Quai è ina nova via per tut la Svizra.

Ils resultats da la pestga en la stagiun 2009 n'èn bain anc betg avant maun e tuttina po l'uffizi da chatscha e pestga porscher ina novitad concernent la statistica da pestga. Sin la pagina d'internet da l'uffizi è endrizzà in link, nua ch'ins po retrair in'evaluaziun da la statistica da pestga che resguarda ils agens basegns.

Sco utilisadra u sco utilisader da l'internet han ins la pussaivladad da consultar en mo trais pass ils indicaturs ils pli impurtants areguard la pestga sco il dumber dals peschs ch'ins po pigliar, il dumber d'eveniments da pestga ed il success da la pestga tenor regiun, tenor onn e tenor gener d'aua. Er pon ins consultar il svilup dals indicaturs da pestga dapi l'onn 2002. Tras quai survegnan ins svelt ina impressiun, co che la pestga è sa midada ils ultims onns. Il resultat giavischà po vegnir arcunà sco datoteca da PDF e stampà u exportà parzialmain sco tabella per in'ulteriura elavuraziun individuala.

Cun questa pussaivladad da pudair installar in'evaluaziun persunala sin mesira da la statistica da pestga porscha l'uffizi da chatscha e pestga a la clientella in servetsch che na steva fin oz betg a disposiziun en in tal gener en Svizra. Persunas interessadas han natiralmain er vinavant la pussaivladad – ultra d'applitgar quest nov instrument da consultaziun – da prender invista dals rapports annuals da la statistica da pestga publitgada sin la pagina d'internet da l'uffizi da chatscha e pestga.

Link: www.jagd-fischerei.gr.ch (Rubrik: Dienstleistungen - Fischfangstatistik)


Infurmaziuns:
- dr. Marcel Michel, biolog da peschs, uffizi da chatscha e pestga dal Grischun, tel.: 081 257 38 94


Gremi: uffizi da chatscha e pestga
Funtauna: rg uffizi da chatscha e pestga