Per l'engrondiment da la mediateca e dals auditoris da la scola auta da pedagogia dal Grischun (SAPGR) a Cuira ha gì lieu ina concurrenza d'art a l'edifizi. L'artista Lydia Wilhelm da Kriens ha gudagnà la concurrenza cun sia proposta artistica "Pensari".

Per la scola auta da pedagogia dal Grischun ha la colliaziun tranter furmaziun, art ed architectura ina tradiziun che vegn cuntinuada tras la concurrenza d'art per l'engrondiment da la mediateca e dals auditoris da la scola auta da pedagogia dal Grischun. L'invit da sa participar è vegnì drizzà a las artistas ed als artists Zilla Leutenegger, Turitg ("Spiegelzeichnungen"), Catrin K. Lüthi, Riehen ("Intarsien als Flecken"), Gabriela Gerber/Lukas Bardill, Maiavilla ("Der Esel und die Brücke"), Pascale Wiedemann/Daniel Mettler, Cuira ("Bücherreihe") e Lydia Wilhelm, Kriens ("Pensari").

Da tschintg propostas ha la giuria da set persunas tschernì unanimamain il project da Lydia Wilhelm. Tras sia intervenziun grafica persvada sia proposta tras l'integraziun natirala dal project en l'edifizi nov. La tematica ch'è vegnida tschernida per il motiv da la localitad da pensar ("Pensari") regorda la finala a las picturas da paraid e da palantschieu sura ed ha l'intenziun d'unir l'architectura e la pictura ad in maletg virtual cumplessiv. Il dissegn da grafit è ina contribuziun persvadenta a favur da l'art a l'edifizi.

Tut ils projects artistics èn exponids publicamain dals 27 d'avrigl fin il 1. da matg e dals 4 da matg fin ils 8 da matg 2009, mintgamai da las 8.00 fin las 17.00, en il foyer da la scola auta da pedagogia dal Grischun a la Scalärastrasse 17, 7000 Cuira. L'ovra d'art vegn realisada curt avant l'avertura da l'edifizi nov la stad 2010.

Infurmaziuns:
Markus Dünner, architect chantunal, uffizi da construcziun auta dal Grischun, tel. 081 257 36 31

Gremi: uffizi da construcziun auta dal Grischun
Funtauna: rg uffizi da construcziun auta dal Grischun