Il Grischun survegn ina nova fatscha visuala. Il film d'image "Graubünden Grischun Grigioni" è fatg. La regenza grischuna l'ha preschentà oz a chaschun d'ina scuntrada cun las medias a Cuira.
La finamira è simpla: Il film "Graubünden Grischun Grigioni" vul intermediar ina impressiun simpatica dal Grischun. En il center dal film stat in Grischun che sesa sin in banc da staziun cotschen e mussa a las aspectaturas ed als aspectaturs durant 9,30 minutas il Grischun cun tut sias fassettas. Il film tracta dal Grischun sco chantun alpin ferm ed independent che metta a disposiziun impurtantas resursas futuras e servetschs, ademplind uschia ina dumonda da la populaziun e da l'economia extraalpina. Il messadi central è quel da preschentar il Grischun sco partenari, sco provedider, sco furnitur da servetschs, sco lieu da recreaziun e sco original.
L'intenziun da la regenza è quella da mussar il Grischun en ina moda e maniera surprendenta e divertenta. Il punct spezial da quest film è ch'el ha ina vera acziun da basa e ch'el preschenta il Grischun en ina maschaida captivanta da film d'image e da film dramatic. Cun sia istorgia emoziunala e cun sia lingua metaforica vul il film appellar al nivel persunal da las aspectaturas e dals aspectaturs, rendend uschia – cun in tschegn – il Grischun fitg simpatic. Il film duai vegnir duvrà per la lavur da publicitad e mussà tar occurrenzas dal chantun. El sa drizza en emprima lingia a giasts, ad ospitants sco er a partenaris internaziunals, naziunals, chantunals e communals da la regenza, dal parlament e da l'administraziun. El stat però er a disposiziun ad ulteriuras persunas interessadas.
Il film "Graubünden Grischun Grigioni" è vegnì producì durant in onn ed en quatter dis da film sut la batgetta da la chanzlia chantunala dal Grischun en collavuraziun cun l'agentura moinz, cun la firma da producziun Abrakadabra, cun la scenarista Tina Ackermann, cun il reschissur Roman Vital e cun l'actur Nikolaus Schmid. L'ovra stat a disposiziun sin l'internet sut
www.gr.ch sco er sco DVD che po vegnir empustada gratuitamain tar la chanzlia chantunala dal Grischun (tel. 081 257 22 23) en tudestg, rumantsch, talian, franzos ed englais.
Gremi: regenza
Funtauna: rg chanzlia chantunala dal Grischun