L'uffizi da cultura dal chantun Grischun ha elavurà – ensemen cun ils var 90 museums ed archivs culturals en il chantun – il portal www.museen-graubuenden.ch ed il guid "Ils museums en il chantun Grischun". Quests projects èn vegnids realisads en il rom d'in punct central da svilup dal program da la regenza 2009 – 2012.

Ils museums ed ils archivs culturals en il chantun Grischun sa preschentan a partir dals 26 d'avrigl 2013 per l'emprima giada sin in portal d'internet cuminaivel. La finamira era da preschentar cuminaivlamain las 93 instituziuns en il chantun e da render attent uschia a la gronda diversitad. La preschentaziun visuala dal portal da museum www.museen-graubuenden.ch è a medem temp ludica e simpla: La charta dal Grischun interactiva permetta ina visita directa da mintga singul museum. Ils museums pon ultra da quai vegnir mussads tenor categorias e tenor criteris regiunals ed in joker mussa tar mintga clic in nov museum sco surpresa.

Mintga regiun vegn caracterisada en in curt purtret, mintga museum preschenta cun texts e cun maletgs ses puncts centrals dal cuntegn e sias particularitads culturalas. Cunquai vegn purschida a las visitadras ed als visitaders potenzials da la Svizra e da l'exteriur ina survista davart las singulas chasas cumplessiva, cumpacta e concepida cumplettamain. Medemamain publitgadas èn infurmaziuns generalas per visitadras e visitaders (adressa, uras d'avertura, pretschs d'entrada) ed actualitads. Ultra da las instituziuns gia etablidas duain era vegnir preschentads museums ed archivs culturals main enconuschents. Il portal infurmescha en quatter linguas (tudestg, rumantsch, talian ed englais).

Ensemen cun lantschar il portal da museums è cumparida ina broschura practica da 244 paginas cun infurmaziuns centralas davart mintga museum. Il guid "Ils museums en il chantun Grischun" po vegnir retratg tar la promoziun da la cultura dal Grischun, Loëstrasse 26, 7000 Cuira; e-mail: andrea.conrad@afk.gr.ch; tel. 081 257 48 04. 
 
 
Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: Martin.Jaeger@ekud.gr.ch  
- Barbara Gabrielli, manadra da l'uffizi da cultura, tel. 081 257 48 01, e-mail: Barbara.Gabrielli@afk.gr.ch  
- Armon Fontana, promoziun da la cultura dal Grischun, tel. 081 257 48 02, e-mail: Armon.Fontana@afk.gr.ch  


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient