Il project "IPM en acziun: structuras favuraivlas per famiglias sco factur da success", ch'è vegnì lantschà l'onn 2011, va en la fasa finala. Nov interpresas pitschnas e mesaunas (IPM) da la Val dal Rain grischuna cun var 700 collavuraturas e collavuraturs han lavurà ils ultims 2 onns vi da la concepziun e vi da l'extensiun da cundiziuns da lavur favuraivlas per famiglias en lur manaschi. Gievgia, ils 6 da zercladur 2013, ha lieu a Cuira l'occurrenza finala publica.

Sco lieu economic stat il Grischun oz en ina fitg ferma concurrenza per bunas collavuraturas e buns collavuraturs e cunzunt per forzas spezialisadas. En tut las branschas observan ins ina mancanza da forzas spezialisadas, e questa mancanza daventa anc pli critica pervia da la situaziun periferica dal chantun. Per pudair subsister en questa concurrenza dovri bunas cundiziuns generalas. In factur pli e pli impurtant daventa en quest connex er la cumpatibilitad da la professiun cun la famiglia per dunnas e per umens. Investiziuns che portan ultra da quai in niz economic, sco quai che studis mussan.

En il rom dal project "IPM en acziun: structuras favuraivlas per famiglias sco factur da success", ch'è vegnì purtà dal chantun Grischun, han nov interpresas da la Val dal Rain grischuna pudì profitar d'ina analisa dal center UND che ha controllà, quant enavant che lur cundiziuns da lavur èn favuraivlas per famiglias. Analisads èn vegnids champs d'acziun sco il temp da lavur, la recrutaziun resp. il svilup dal persunal, la cultura dal manaschi, la direcziun, las prestaziuns d'assistenza, las cundiziuns d'engaschament ed ils cuntegns da lavur. Ultra d'ina registraziun da las datas focussada hai dà discurs cun la direcziun da l'interpresa resp. dal persunal sco er cun ina schelta da collavuraturas e da collavuraturs. Alura è vegnì fatg in rapport da la situaziun cun recumandaziuns specificas per l'interpresa. Las interpresas èn vegnidas accumpagnadas tar la realisaziun dals plans da mesiras.

Plinavant han las interpresas pudì discutar ina cun l'autra. Quest barat ha gì lieu en furma da discurs a la maisa radunda. Ina valitaziun fitg positiva ha survegnì il sguard sur l'atgna branscha ora. Gia a chaschun dal segund discurs a la maisa radunda èsi sa mussà, co che temas tuttavia delicats sco "plans da temp da lavur favuraivels per famiglias en interpresas cun lavur da squadra", "jobsharing", "dapli dunnas en il cader", "tschertgar sistematicamain forzas spezialisadas" sco er "egualitad dals salaris e transparenza" sa laschan realisar cun success. 

Occurrenza finala publica
Gievgia, ils 6 da zercladur 2013, a las 17.00, ha lieu en l'aula da la scola spezialisada superiura da la Svizra sidorientala (IFSP) a Cuira (Gürtelstrasse 48) l'occurrenza finala dal project. L'occurrenza è publica e sa drizza ad interprendidras ed ad interprendiders dad IPM, a persunas spezialisadas en fatgs da persunal, a persunas da la politica e da l'economia sco er a lavurantas ed a lavurants che s'engaschan per mesiras economicas innovativas e favuraivlas per famiglias e ch'èn interessads vi d'ina ballantscha positiva tranter la famiglia e la professiun. Envidadas èn en spezial er interpresas ch'èn interessadas vi d'in project successur.

Persunas da cader, collavuraturas e collavuraturs sco er persunas participadas al project discuteschan davart lur experientschas durant il project, davart lur mesiras e davart ils success concrets. Plinavant vegn preschentà in project successur che vul derasar la favuraivladad per famiglias er en las regiuns dal chantun.

Las nov IPM participadas vegnan ultra da quai undradas perquai ch'ellas èn sa participadas al project e s'engaschadas per la favuraivladad per famiglias (dapli infurmaziuns davart l'occurrenza sut www.stagl.gr.ch). 

Las nov IPM grischunas "en acziun"
IBC Energia Aua Cuira, Merz Gastro SA, Josias Gasser Materialias da construcziun SA, Do it Martgà da construcziun SA, spitex Cuira, Bus da la citad da Cuira SA, Lia rumantscha, hotel Stern Cuira SA e Wenzel Metromec SA. Dapli infurmaziuns sut www.stagl.gr.ch, www.und-online.ch e http://www.berufundfamilie.admin.ch  
 

Infurmaziuns:
Susanna Mazzetta, manadra dal project, post da stab per l'egualitad da las schanzas, telefon mobil 079 483 74 01, e-mail: Susanna.Mazzetta@stagl.gr.ch  


Gremi: post da stab per l'egualitad da las schanzas
Funtauna: rg post da stab per l'egualitad da las schanzas