Las vischnancas grischunas èn vegnidas orientadas suenter l'ultima sesida da la regenza ch'ella haja concludì da curreger las cifras da la gulivaziun da finanzas 2017 e 2018 che n'èn betg correctas pervia da sbagls tar l'elavuraziun da las datas. La correctura vegn fatga confurm a la perioda en il rom da las contribuziuns 2017.

Cun il conclus dals 22 d'avust 2017 ha la regenza fixà las contribuziuns da gulivaziun 2018 sco er la gulivaziun da las grevezzas socialas 2016. Sinaquai èn las vischnancas vegnidas orientadas immediatamain davart las contribuziuns ch'ellas survegnan u davart ils imports ch'ellas ston surpigliar. Differentas vischnancas prendan la communicaziun da ls contribuziuns da gulivaziun mintgamai sco occasiun per s'infurmar davart las basas da datas ch'èn vegnidas duvradas en il cas concret. En quest connex preschenta l'uffizi da vischnancas (UV) avertamain tut las datas ch'el dovra e las metta a disposiziun a las vischnancas. En in cas èsi sa mussà che las datas ch'èn vegnidas elavuradas per calcular la gulivaziun da finanzas 2018 na correspundevan betg a las datas cudeschadas en il quint annual da la vischnanca u als imports ch'ella stuess realisar.

Controlla da las datas fiscalas elavuradas
Il departament da finanzas e vischnancas (DFV) ha laschà controllar immediatamain en moda cumplessiva las datas fiscalas ch'èn vegnidas duvradas per calcular la gulivaziun da finanzas. En quest connex èn er vegnidas verifitgadas detagliadamain las cifras ch'eran vegnidas duvradas en il passà. Per controllar la nova elavuraziun da las datas tar l'administraziun chantunala da taglia ha il departament da finanzas e vischnancas ultra da quai engaschà la controlla da finanzas (CF) independenta. En il rom da las lavurs cumplessivas èsi resultà che l'elavuraziun da las datas per las taglias sin il gudogn e sin il chapital da l'onn fiscal 2015 cuntegneva sbagls. Sco en ils onns precedents sut il reschim oriund da la taglia supplementara è la transfurmaziun vegnida fatga sin basa dal pe da taglia communal mintgamai vertent. Tenor la regulaziun transitorica al sistem nov da la gulivaziun da finanzas che vala a partir da l'onn 2016 avess la transfurmaziun mo stuì vegnir fatga dal pe da taglia unitar da la taglia supplementara. Tar vischnancas cun in pe da taglia bass èn perquai vegnids duvrads tendenzialmain retgavs memia auts per las calculaziuns e tar vischnancas cun in pe da taglia aut retgavs memia bass. Quest sbagl pertutga mo las calculaziuns da las cifras da la gulivaziun da finanzas 2018. Plinavant èsi sa mussà che er l'elavuraziun da las datas da las taglias a la funtauna 2014 e 2015 cuntegneva sbagls. Er qua è vegnida fatga ina calculaziun approximativa a maun dal pe da taglia communal. Ed i èn er vegnids resguardads tschains da retard ch'eran vegnids mess a quint. Las datas incorrectas da las taglias a la funtauna èn vegnidas duvradas per calcular las cifras da la gulivaziun da finanzas 2017 e 2018.

La CF independenta conferma en ses rapport che las datas elavuradas da nov da la ACT possian servir al UV sco basa da partenza correcta che correspundia a las basas giuridicas per far la calculaziun successiva da la gulivaziun da finanzas.

Las calculaziuns da la gulivaziun da finanzas 2017 e 2018 ston vegnir curregidas
Ils sbagls tar l'elavuraziun da las datas han chaschunà pia tant per l'onn 2017 sco er per l'onn 2018 che la fermezza da las resursas da las vischnancas è vegnida fixada en moda incorrecta. Quai ha consequenzas concretas per las contribuziuns da la gulivaziun da finanzas a la gulivaziun da las resursas a la gulivaziun da las grevezzas geografic-topograficas e da scola sco er a la gulivaziun limitada pervia da la midada da sistem. Per la regenza n'èsi sta nagina dumonda che las calculaziuns da la gulivaziun da finanzas 2017 e 2018 ston vegnir curregidas immediatamain.
Las valurs curregidas per l'onn 2017 vegnan messas a quint a las segundas ratas dals 20 da december 2017 dal pajament da gulivaziun resp. da las contribuziuns da finanziaziun. Las valurs curregidas per l'onn 2018 vegnan duvradas l'onn proxim.

La regenza deplorescha che quai vegn a chaschunar divergenzas envers ils preventivs communals 2017 e ch'il process da budgetaziun 2018 è per part gia progredì uschè ferm che las cifras correctas da differentas vischnancas na pon betg pli vegnir surpigliadas en il preventiv da l'onn proxim. Perquai ch'i sa tracta da la vart da las expensas però d'expensas liadas, na ston vegnir dumandads nagins credits posteriurs. Il chantun sa perstgisa en tutta furma per las malempernaivladads chaschunadas.

Il chantun è conscient dal fatg che las vischnancas pertutgadas na vegnan betg ad avair plaschair da far pajaments pli gronds resp. d'acceptar entradas pli pitschnas. El quinta però ch'ellas mussian chapientscha per l'execuziun correcta da las leschas.

Las cifras curregidas 2018 han anc pudì vegnir resguardadas en il preventiv 2018 dal chantun.


Infurmaziuns:
- presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, e-mail: Barbara.Janom@dfg.gr.ch  
- Thomas Kollegger, manader da l'uffizi da vischnancas, tel. 081 257 23 81, e-mail: Thomas.Kollegger@afg.gr.ch  


Gremi: regenza
Funtauna: rg chanzlia chantunala dal Grischun