Sin l'entir mund demonstreschan millis scolaras e scolars cunter la midada dal clima e pretendan audienza politica. Er a Cuira han demonstrà il mais passà pliras tschient persunas giuvnas engaschadas. Il president da la regenza Jon Domenic Parolini ha envidà ier saira il cusseglier guvernativ Mario Cavigelli sco er represchentantas da questa demonstraziun davart il clima ad ina maisa radunda..

Tenor la direcziun da la strategia chantunala da clima sa fan tant il president da la regenza Jon Domenic Parolini sco er il cusseglier guvernativ Mario Cavigelli ils medems quitads sco las scolaras davart las sfidas da la midada dal clima. Ma en il discurs han els cunzunt tadlà las dunnas giuvnas. Quellas han pudì deponer lur giavischs e lur temas en moda fitg extendida.

Surveglianza da la strategia chantunala da clima
Gia oz coordinescha e realisescha il chantun Grischun las mesiras per proteger il clima sco er per adattar a la midada dal clima. Il president da la regenza Jon Domenic Parolini, maina – sco schef dal departament d'educaziun, cultura e protecziun da l'ambient – la cumissiun chantunala directiva da clima. La cumissiun exista dapi l'onn 2015 ed ha l'incumbensa da survegliar la realisaziun da la strategia chantunala da clima. Questa strategia cuntegna dus accents d'acziun pertutgant la protecziun dal clima e set accents d'acziun pertutgant l'adattaziun al clima. Ils accents d'acziun èn per gronda part en realisaziun. Ulteriurs commembers da la cumissiun directiva èn il cusseglier guvernativ Mario Cavigelli, sco schef dal departament da construcziun, traffic e selvicultura, sco er ils manaders da l'uffizi d'energia e da traffic, da l'uffizi per la natira e l'ambient e da l'uffizi da guaud e privels da la natira.

Influenza en il process politic
La regenza vegn ad empruvar da surpigliar ils giavischs da las represchentantas da la demonstraziun davart il clima e d'als integrar uschè bain sco pussaivel en il process politic. Ina schanza respectiva sa porscha en il rom da l'incumbensa inoltrada al cussegl grond e suttascritta dad 80 deputadas e deputads "Green Deal per il Grischun: nizzegiar la protecziun dal clima sco schanza".

Fotografias agiuntadas:

 

Infurmaziuns:
president da la regenza dr. Jon Domenic Parolini, schef dal departament d'educaziun, cultura e protecziun da l'ambient, tel. 081 257 27 01, e-mail Jondomenic.Parolini@ekud.gr.ch


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient