Ils ultims dis han tut las persunas cun dretg da votar en il Grischun survegnì lur documents per las elecziuns dal cussegl naziunal e dal cussegl dals chantuns 2019. Las commembras ed ils commembers da las duas chombras vegnan elegids a maun da dus differents sistems electorals. Ils cedels electorals vegnan perquai emplenids en differenta maniera. Ma co funcziuna quai puspè e tge stoss jau resguardar? Il nov video da la chanzlia chantunala ed instrucziuns utilas da la chanzlia federala porschan in agid en chaussa.

Ils 20 d'october 2019 tschertga la confederaziun tut en tut 200 represchentantas e represchentants da la populaziun svizra per il cussegl naziunal. Tranter quels tschintg persunas che represchentan l'opiniun da las Grischunas e dals Grischuns. Ultra da quai tschertga il chantun Grischun sez il medem di sias duas represchentanzas en il cussegl dals chantuns. Ch'i sajan da la sanestra, dal center u da la dretga: Las persunas elegidas vegnan a prender ils proxims quatter onns decisiuns che pertutgan nus tuts. Tant pli impurtant èsi che tut las persunas cun dretg da votar chapeschian, co ch'ellas pon exprimer lur meglra decisiun persunala sin ils cedels electorals.

Duas persunas per il Grischun
Per las elecziuns dal cussegl dals chantuns cuntegna il material electoral in cedel electoral cun duas lingias vidas. Sin il cedel electoral sto vegnir scrit il num da la candidata u dal candidat giavischà, ed eventualmain ulteriuras indicaziuns ch'èn necessarias per identifitgar cleramain la persuna. Valair vala: Ina vusch per candidata u candidat. Infurmaziuns detagliadas per emplenir il cedel electoral per il cussegl dals chantuns chattan ins en il portal svizzer per ils burgais ch.ch.

Las elecziuns per la renovaziun totala dal cussegl naziunal
Ils tschintg sezs en il cussegl naziunal vegnan occupads tenor il sistem da proporz. Quai vul dir che las persunas cun dretg da votar en il Grischun pon tscherner tranter differentas glistas cun candidatas e candidats. Quest onn stattan a disposiziun 100 candidatas e candidats sin totalmain 20 differentas glistas. Impurtant èsi ch'ins empleneschia per l'elecziun mo in unic dals cedels electorals uffizials. En quest connex han ins duas pussaivladads: eleger cun in cedel electoral prestampà che cuntegna las differentas partidas sco er gruppaziuns politicas ubain eleger cun in cedel electoral betg prestampà (cedel electoral vid). En l'instrucziun electorala da la chanzlia federala vegnì declerà en moda detagliada e chapaivla, tge ch'ins sto resguardar en mintga cas, cur ch'ins emplenescha il cedel electoral per las elecziuns dal cussegl naziunal. L'impurtant ordavant: L'attest da votar sto vegnir suttascrit en mintga cas.

Colliaziuns per meglras schanzas da vegnir elegì
Per eleger las commembras ed ils commember dal cussegl naziunal ston vegnir resguardadas en spezial las colliaziuns e sutcolliaziuns da glistas da las partidas e da las gruppaziuns politicas. Cun questas colliaziuns augmentan ellas lur schanzas en las elecziuns. Il nov video da la chanzlia chantunala declera en ina furma simplifitgada tge influenza che las colliaziuns da glistas pon avair per il resultat da las elecziuns.
 

Infurmaziuns:
Walter Frizzoni, vicechancelier, chanzlia chantunala dal Grischun, tel. 081 257 22 22, e-mail Walter.Frizzoni@staka.gr.ch


Gremi: chanzlia chantunala
Funtauna: rg chanzlia chantunala