La dumengia d'elecziun vegnan ils resultats intermediars publitgads a partir da las 12.00 mintga ura en l'internet, e quai sut www.gr.ch/nrw (elecziuns dal cussegl naziunal) sco er sut www.gr.ch/srw (elecziuns dal cussegl dals chantuns).

La chanzlia chantunala dal Grischun ha cumenzà gia a l'entschatta da l'onn cun las preparativas per las elecziuns dal cussegl naziunal e dal cussegl dals chantuns 2019. Latiers tutgan cunzunt las instrucziuns da las vischnancas sco er da las commembras e dals commembers dal biro electoral chantunal cun las cussegliadras ed ils cussegliaders electorals. I han gì lieu scolaziuns e tests correspundents. Plinavant han stuì vegnir controlladas, stampadas e tramessas tut las glistas electoralas. Ultra da las numerusas funcziunarias e dals numerus funcziunaris communals èn engaschads il di d'elecziun sco tal er var ina dunsaina collavuraturas e collavuraturs chantunals dal biro electoral chantunal. Ellas ed els sustegnan las vischnancas cun dar infurmaziuns al telefon. Quest servetsch duai gidar ch'ils resultats en las vischnancas vegnian eruids ed endatads correctamain. Ils cedels electorals entrads per las elecziuns dal cussegl naziunal sco er ils resultats communals da las elecziuns dal cussegl dals chantuns vegnan endatads da las vischnancas en in program chantunal che serva ad eruir ils resultats. Per ils resultats che vegnan endatads da las vischnancas èn responsabels unicamain ils biros electorals communals.

Resultats intermediars e finals dal Grischun sin www.gr.ch
Il biro electoral chantunal lavura la dumengia, ils 20 d'october 2019, en la chasa grischa a Cuira. La chasa grischa n'è betg accessibla a persunas externas. Las medias e la publicitad vegnan orientadas periodicamain davart il stadi da las elecziuns. Ils resultats intermediars (totals intermediars da las vuschs da partida per glista e da las vuschs da partida per glista e per vischnanca sco er totals intermediars da las vuschs da candidat) ed il resultat final vegnan tramess al center da medias en l'edifizi da Radiotelevisiun Svizra Rumantscha (RTR) a Cuira sco er publitgads a partir da las 12.00 mintga ura en l'internet, e quai sut www.gr.ch/nrw (elecziuns dal cussegl naziunal) e www.gr.ch/srw (elecziuns dal cussegl dals chantuns). Cun resalva che la dumbraziun haja lieu sco planisà, pon ins far quint ch'ils resultats finals sajan avant maun il suentermezdi u vers saira. Las exponentas politicas ed ils exponents politics sco er las collavuraturas ed ils collavuraturs da las medias sa radunan ca. a partir da las 13.00 en il center da medias a Cuira.

Calculaziuns approximativas naziunalas da la SSR
Per incumbensa da la societad svizra da radio e televisiun (SSR) fa la "gfs.bern ag" er quest onn puspè calculaziuns approximativas. Las emprimas calculaziuns approximativas vegnan ad esser avant maun per tscherts chantuns gia il suentermezdi; baud la saira suonda in'emprima calculaziun approximativa da las novas fermezzas da las partidas sco er dals novs dumbers da sezs sin plaun naziunal. Questas calculaziuns approximativas vegnan publitgadas en spezial sin ils chanals da la SSR.


Gremi: chanzlia chantunala dal Grischun
Funtauna: rg chanzlia chantunala dal Grischun