La flexibilisaziun da las furmas da lavur è in element central da la posiziun pli ferma prendida en mira dal chantun sco patrun attractiv tenor il Program da la Regenza 2021-2024. Furmas da lavur flexiblas gidan en moda essenziala a render cumpatibla la professiun cun la famiglia. En il rom da las mesiras da corona èn vegnidas fatgas bunas experientschas cun il homeoffice. Pervia da quai ha la Regenza decidì ch'il homeoffice, respectivamain ch'il lavurar independentamain dal lieu, duai esser pussaivel en l'administraziun chantunala tenor prescripziuns unitaras.

La revisiun parziala da la planisaziun locala da la vischnanca da Schlarigna, ch'è vegnida concludida ils 21 da zercladur 2020, vegn approvada da la Regenza. L'object da la revisiun parziala è la realisaziun planisada d'in flow trail tranter la staziun da muntogna da la funiculara Chantarella-Corviglia e la staziun da muntogna Marguns. Il flow trail duai cumplettar la purschida da la rait da mountainbike ch'exista gia en il territori da skis Corviglia sur San Murezzan e Schlarigna.

©swisstopo

La Regenza ha approvà il project per la correcziun da la via da Trin davent dal spartavias Mulin fin Porclis. Sin quest traject da via curseschan savens scolaras e scolars cun velo. Lur segirezza stradala è restrenschida fermamain pervia da las stretgas relaziuns da spazi. Vitiers vegn in nausch stadi architectonic da la cuvrida da la via e da trais punts a spunda. En il rom dal project duain las trais punts a spunda vegnir renovadas, construidas da nov u remplazzadas tras mirs da sustegn. Ultra da quai duai vegnir renovada la cuvrida da la via sco er schlargià il spazi da la via cun agid d'emplenidas e da mirs da sustegn da la vart da la val. Quai permetta tranter auter da construir in vial da velo che maina vers ensi e ch'è 1,5 meters lad. Cun quest vial da velo vegni er pussibilità da cumplettar la rait, sco pretendì en il Plan sectorial Velo dal chantun Grischun. Tut en tut custa il project 5,35 milliuns francs.

Il Riale Bess è in torrent che po chaschunar bovas. El nascha sut la Cima de Gagela, curra amez tras il center dal vitg da Mesauc e sbucca la finala en la Moesa. Gia durant ils onns 1930 èn vegnidas construidas dustanzas en l'aual per proteger ils abitadis cunfinants ed ils indrizs d'infrastructura cunter aua gronda. Questas dustanzas èn sa cumprovadas da princip, mussan però – tenor las ultimas controllas – deficits.

La Regenza ha ussa approvà in project per construir dustanzas en il Riale Bess. En il rom dal project duain otg dustanzas da torrent donnegiadas sco er ils rempars da la riva respectivs vegnir construids da nov respectivamain reparads. Questas dustanzas e quests rempars reduceschan l'erosiun dal letg da l'aual e da las scarpas da la riva sco er la mobilisaziun da gera e da crappa. Tut en tut custa il project circa 1,65 milliuns francs.

A la vischnanca da Bravuogn Filisur ha la Regenza concedì ina contribuziun chantunala da circa 81 000 francs per restaurar totalmain la punt Jenisberg tenor criteris da la tgira da monuments. Gia l'onn 1721 è vegnida menziunada ina punt sur la Landwasser a Jenisberg. L'onn 1858 ha il maister Caspar Willi da Schiers construì ina nova punt da lain suspendida, ch'è vegnida remplazzada l'onn 1906 cun la punt artgada da crap actuala. Questa punt ha ina lunghezza da 24 meters e figurescha – grazia a sia architectura, a sia moda da construir, a sia autezza sco er a ses bun stadi – en l'Inventari da las vias da communicaziun istoricas da la Svizra. Il tip d'ina punt artgada da crap è senz'auter usità en il Grischun per sendas e vias. Pervia da l'autezza spectaculara è la punt da Jenisberg però  – ensemen cun la punt da Solas – in object extraordinari e rar. La punt stat en la proxima vischinanza dal viaduct da Wiesen da la Viafier retica, cun il qual ella furma ina tscherta unitad ed a medem temp in cuntrast impressiunant tranter natira e tecnica. Ils patruns da construcziun han l'intenziun da restaurar la punt artgada da crap e da la schlargiar levamain da la vart da la muntogna.